Kasi Mukunozgekera Chikumbusko?

Paska laumaliro ilo Yesu wakachita likaŵa lakuzirwa chomene. Pakuti wakaŵa pafupi kukomeka, iyo wakanozga vyakuti warye Paska pamoza na ŵapositole ŵake na kwambiska Mugonero wa Fumu uwo ukwenera kuchitika chaka na chaka. Ntheura wakatuma Petrosi na Yohane kuti ŵakanozge chipinda chakuchitiramo. (Lu 22:7-13; wonani chithuzi cha pa chikopi.) Ichi chikutikumbuska kuti tikwenera kunozgekera Chikumbusko icho chizamuchitika pa Malichi 27. Mipingo yikwenera kuti yasanga kale uyo wazamuyowoya nkhani, chingwa na vinyo, na vinyake vyantheura. Kweni kasi waliyose payekha wangachita vichi pakunozgekera Chikumbusko?

Nozgekereskani Mtima Winu. Ŵazgani na kughanaghanirapo malemba gha mu nyengo ya Chikumbusko. Ndondomeko ya kuŵazga Baibolo mungayisanga mu kabuku ka Kusanda Malemba Zuŵa na Zuŵa. Pa Vyakusazgirapo B12 ivyo vili mu Baibolo la Malemba Ghakupatulika mu Mang’anamuliro gha Charu Chiphya paliso ndondomeko yiwemi iyo yili na fundo zinandi. (Wonaniso kabuku ka Uteŵeti na Umoyo Wachikhristu—Kabuku ka Maungano ka Epulero 2020.) Mbumba zingapenja fundo zinyake izo zingadumbiskana pakusopa kwa mbumba pa nkhani ya kuzirwa iyi ya sembe yakuwombora mu Watch Tower Publications Index panji mu Buku Lakupenjera Nkhani la Ŵakaboni ŵa Yehova.

Chemeraniko Ŵanji. Muzakachiteko mwakukwana mulimo wakuchemera ŵanthu ku Chikumbusko. Ghanaghanirani ŵanthu awo mungaŵachemerako ku Chikumbusko, nga ni awo mukuwelerako, awo mukasambiranga nawo Baibolo kumasinda, awo mukumanyana nawo kweniso ŵachibali. Ŵalara ŵakwenera kuŵikapo mtima kuchemerako ŵakulopwa. Usange munthu munyake wakukhala mu chigaŵa chinu yayi, mungasanga nyengo na malo uko kwamuchitikira Chikumbusko kufupi na uko iyo wakukhala para mungadofya pa MANYANI VYA ISE pa peji lakwambilira pa jw.org na kusankha apo ŵalemba kuti “Chikumbusko.”

Kasi ni vichi vinyake ivyo tingachita kuti tinozgekere chikumbusko?