Kasi Musangirengepo Mwaŵi?
Cikumbusko Citipenge Mwaŵi Wakulongora Kuti Tikuwonga
1. Kasi Cikumbusko cikutipa mwaŵi wuli?
1 Cikumbusko ico cizamuŵako pa Epulero 14, cizamutipa mwaŵi wapadera wakulongora kuti tikuwonga uwemi wa Yehova. Nkhani iyo yili pa Luka 17:11-18 yikulongora umo Yehova na Yesu ŵakuwonera kuwonga. Cacitima nchakuti pa ŵanthu 10 awo Yesu wakacizga, yumoza pera ndiyo wakawonga. Kunthazi, sembe ya Yesu yizamovwira kuti matenda ghose ghamare. Ici cizamupangiska kuti taŵanthu tikhale kwamuyirayira. Panyengo iyo, tizamuwonga Yehova zuŵa lililose cifukwa ca vitumbiko ivi. Kweni kasi tingalongora wuli kuwonga mu nyengo ya Cikumbusko?
2. Nchivici cingatovwira kuwonga sembe ya Yesu?
2 Ŵani Ŵakuwonga: Kuti munthu wawonge, wakwamba kughanaghanirapo dankha. Ndondomeko ya kuŵazga Baibolo panyengo ya Cikumbusko yingatovwira kuwonga sembe ya Yesu. Ndondomeko iyi yikusangika mu kalendara na mu kabuku ka Kusanda Malemba Zuŵa na Zuŵa. Tingacita makora kuŵazga mavesi agha na mbumba yithu. Para ndimo ticitirenge, tiwongenge comene sembe ya Yesu. Ndipo ici citovwirenge kuti tisinthe nkharo yithu.—2 Kor. 5:14, 15; 1 Yoh. 4:11.
3. Kasi tingalongora wuli kuwonga mu nyengo ya Cikumbusko?
3 Longorani Kuti Mukuwonga: Vyakucita vya munthu ndivyo vikulongora kuti wakuwonga. (Kol. 3:15) Munthu wavyoni uyo Yesu wakamucizga wakayezgayezga kumupenja kuti wamuwonge. Tikukayika yayi kuti wakaphalirangaso ŵanthu mwakukhuka vya munthondwe uwu. (Luka 6:45) Kasi ticemerenge ŵanji mwamwamphu ku Cikumbusko kulongora kuti tikuwonga sembe ya Yesu? Nthowa yimoza iyo tikulongolera kuwonga nkhucita upayiniya wakanyengo panji kusazgirako uteŵeti mu nyengo ya Cikumbusko. Pa zuŵa la Cikumbusko namise, tingalongora kuti tikuwonga para tikupokelera ŵalendo na kuzgora mafumbo ghawo.
4. Nchivici ico tikwenera kucita kuti tizakaleke kudandawura para Cikumbusko cajumpha?
4 Kasi cikumbusko ici ciŵenge caumaliro? (1 Kor. 11:26) Tikumanya yayi. Kweni tikumanya kuti para cajumpha, mwaŵi wapadera wakulongolera kuwonga nawo wajumpha. Kasi musangirengepo mwaŵi? Mphanyi mazgu ghithu ghakuwonga na ivyo tikughanaghana mu mtima withu vyakondweska Yehova, uyo wali kutipa sembe.—Sal. 19:14.