Ivyo Tikuŵika pa Malo Ghakwamba
1. Kasi Yesu wakalongora wuli kuti uteŵeti ukaŵa wakuzirwa kwa iyo?
1 Yesu wakaŵika mulimo wa kupharazga pa malo ghakwamba. Wakalimbikiranga comene uteŵeti, wakendanga mitunda yitali mu Palestina mose kuti wapharazgire ŵanthu ŵanandi. Wakaŵa na umoyo wambura kukhumba vinandi mwakuti waŵe na nyengo yakukwana yakucitira uteŵeti wake. (Mat. 8:20) Apo wumba ukayezga kumukanizga kufumako kwa iwo mwakuti waŵacizgire ŵalwari, iyo wakati: “Ku misumba yinyake nako nkhwenera kupharazga makani ghawemi gha ufumu wa Ciuta, pakuti ndico nkhatumikira.”—Luka 4:43.
2. Cifukwa wuli Yesu wakazirwiskanga comene uteŵeti?
2 Cifukwa wuli Yesu wakazirwiskanga comene uteŵeti? Cifukwa cikuru cikaŵa cakuti wakakhumbanga kutuŵiska zina la Yehova. (Mat. 6:9) Wakatemwanga comene Awiske ŵakucanya ndipo wakakhumbanga kuti wafiske khumbo lawo na kupulikira dango lililose ilo ŵakamupa. (Yoh. 14:31) Kweniso, wakafipiranga comene mtima ŵanthu ndipo wakakhumbanga kuŵawovwira.—Mat. 9:36, 37.
3. Kasi tingalongora wuli kuti tikuŵika mtima withu wose pa uteŵeti?
3 Citani nga ni Yesu: Kuŵika uteŵeti pa malo ghakwamba nga ni Yesu kungaŵa kwakusuzga cifukwa caru cili na vinthu vinandi ivyo vingatilyera nyengo ndiposo ivyo vingatitimbanizga. (Mat. 24:37-39; Luka 21:34) Ntheura, tikwenera kusanda ivyo ni vinthu vyakuzirwa, tipaturenge nyengo ya kunozgekera ivyo tamuyowoya mu upharazgi na kucita mulimo uwu nyengo zose. (Fil. 1:10) Tikweneraso kuyezgayezga kuti tileke kukhumba vinandi pa umoyo na kuleka kugwiliskira nchito caru mwakufikapo.—1 Kor. 7:31.
4. Cifukwa wuli nchakuzirwa kulutilira kuŵika vinthu vyakuzirwa pa malo ghakwamba?
4 Para nyengo njicoko, munthu wavinjeru wakucita dankha vinthu vyakuzirwa. Mwaciyelezgero, para wamanya kuti kwizenge cimphepo cikuru, wakumalira nyengo yake na nkhongono pa kusanga nthowa izo wangavikilira mbumba yake ndiposo kucenjezga ŵazengezgani ŵake. Wangasuŵilira na vinthu vyambura kuzirwa yayi. Nyengo yakuti cimphepo ca Haramagedoni cize yafupiskika. (Zef. 1:14-16; 1 Kor. 7:29) Kuti tijiponoske taŵene na awo ŵakutipulika, nyengo zose tikwenera kuŵa maso pa taŵene na pa cisambizgo cithu, kwali tili pa maungano panji yayi. (1 Tim. 4:16) Enya, kuti tizakapone tikwenera kuŵika uteŵeti pa malo ghakwamba.