“Cakurya pa Nyengo Yakwenelera”
1 Para tawera ku ungano wapadera, kanandi tikuyowoya kuti, “Ungano uwu tasanga nawo candulo comene.” Mulaŵiliri wa dera munyake wakalemba kuti, pamanyuma pa kupulikizga ungano, ŵanji mu dera lake ŵakayowoya kuti ŵakukhumba kusazgirako uteŵeti. Mulaŵiliri wa dera munyake wakati, “Ungano wapadera ukatovwira kuti timanyenge nyengo iyo tilimo apo tikusankha vyakucita mu umoyo withu.” Ndipo munyakeso wakati, “Ŵapharazgi ŵanandi ŵakayowoya kuti ungano ukaŵakumbuska kuti ŵaŵikenge mtima pa uteŵeti, uwo ngwakuzirwa comene.” Kasi ungano wapadera ukamovwirani wuli?
2 Ungano wapadera wa cilimika ciphya ca uteŵeti nawoso uzamutovwira comene. Mutu wake ngwakuti ‘Gomezgani Yehova,’ wafuma pa Salmo 118:8, 9. Nkhani zinyake izo zizamuyowoyeka pa ungano uwu ni izi: “Kasi Yehova Wakuŵa Wuli Linga Lithu mu Nyengo ya Suzgo?,” “Wovwirani Ŵanji Kuti Ŵabisame Kusi ku Mapapindo gha Yehova,” “Ŵani Cakubisamamo Nga ni Yehova,” “Ŵawukirano, Gomezgani Yehova,” ndiposo “Paradiso Withu Wauzimu Nchakubisamamo Ico Yehova Wapeleka.”
3 Kuti Tizakasange Candulo: Para deti lapharazgika waka, muzakambe kunozgekera kuti muzakafikepo ndiposo muzakacemereko awo mukusambira nawo Baibolo. Kuti ‘tipambike cipambi pamoza na cizizipizgo,’ tikwenera kusungilira ivyo tapulika. (Luka 8:15) Ntheura, muzakategherezge mwakupwelelera para nkhani zikuyowoyeka na kulemba mwakudumura fundo zikuruzikuru ndiposo ulongozgi uwo ungamovwirani pa umoyo winu ndiposo mu uteŵeti. Pamanyuma pa ungano sangani nyengo yakuti mudumbiskane na mbumba yinu fundo izo mwangupulika pa ungano ndiposo umo mungalondezgera fundo izi.
4 Nga umo cikuŵira cakurya cakunowa, ungano wapadera wa cilimika cino wanozgeka mwacitemwa ndipo uzamutipa ivyo tikukhumbikwira. Mphanyi Yehova watumbika ivyo mukucita kuti muzakafikepo pa ungano uwu na kusanga candulo na cakurya ico capelekeka pa nyengo yakwenelera kuti muzakakhozgeke mwauzimu.—Mat. 24:45.
[Mafumbo]
1. Kasi ungano wapadera uwo tikaŵa nawo ukamovwirani wuli imwe ndiposo ŵanji?
2. Kasi ni nkhani wuli izo zizamuyowoyeka pa ungano wapadera wa cilimika ciphya ca uteŵeti?
3. Kasi tingacita wuli kuti tizakafikepo pa ungano wapadera na kusanga candulo?
4. Cifukwa wuli tikwenera kulindilira mwakunweka ungano wapadera uwo ukwiza?