Mazgu gha Ciuta Ngankhongono

1. Kasi mutu wa ungano wapadera wa caka ca uteŵeti ca 2014, ngwakuti wuli?

¹ Mwakupambana na cilicose cakufuma ku ŵanthu, Baibolo lili na nkhongono kutisintha. Lingatovwira kuti tambe kughanaghana na kucita vinthu mwakuyana na khumbo la Yehova. Kasi Mazgu gha Ciuta ngankhongono wuli? Kasi tingacita wuli kuti ghatovwire pa umoyo withu? Kasi tingacita wuli kuti tovwire ŵanyithu na Mazgu gha Ciuta? Tikugomezga kuti muzamukhozgeka comene mwauzimu apo mafumbo agha ghazamuzgoreka pa ungano wapadera wa caka ca uteŵeti ca 2014. Mutu wake ngwakuti, “Mazgu gha Ciuta Ngankhongono.” Wafuma pa Ŵahebere 4:12.

2. Kasi ni mafumbo wuli agho ghazamuzgoreka pa ungano uwu?

² Muzakasange Mazgoro gha Mafumbo Agha: Apo mukutegherezga ungano, muzakakhazge mazgoro gha mafumbo agha.

• Cifukwa wuli tikwenera kugomezga Mazgu gha Yehova? (Sal. 29:4)

• Kasi tingacita wuli kuti tijiwonere tekha nkhongono ya Mazgu gha Ciuta? (Sal. 34:8)

• Kasi tingawovwira wuli ŵanthu kuti ŵamanye nkhongono ya Mazgu gha Ciuta para tikupharazga? (2 Tim. 3:16, 17)

• Kasi tingacita wuli kuti tileke kupusikika na caru ca Satana? (1 Yoh. 5:19)

• Kasi ŵawukirano ŵangacita wuli kuti ŵafiske mulimo wa Ciuta? (Yer. 17:7)

• Kasi tingasanga wuli nkhongono para talopwa? (2 Kor. 12:10)

• Kasi nchivici cingatovwira kuti tilutilire kusintha, nanga vingaŵa vizgoŵi na maghanoghano ghaheni agho ghali kukhomelera? (Efe. 4:23)

3. Padera pa nkhani, kasi ungano wapadera uzamutipa mwaŵi wuli?

³ Tizamukhozgeka comene na nkhani izo tizamupulika pa ungano uwu. Padera pa nkhani, ungano uwu uzamutipa mwaŵi wakumanyana na ŵabali na ŵadumbu ŵakufuma ku mipingo yinyake. (Sal. 133:1-3; 2 Kor. 6:11-13) Ipo tikwenera kukacezga na ŵabwezi ŵithu ŵakale na kusangaso ŵaphya. Para tizamuŵa na mulendo wakufuma ku Beteli panji mulaŵiliri wa cigaŵa, tingazakacezga nayo pamoza na muwoli wake. Ntheura, tikulindilira mwakunweka ungano wapadera uwu!