Mazgu gha Ciuta Ngacandulo Pakusambizga

1. Kasi mutu wa ungano wa dera wa cilimika ca uteŵeti ca 2014 ngwakuti wuli, ndipo ni fumbo wuli ilo lizamuzgoreka?

¹ Yehova ni ‘Msambizgi’ muwemi comene. (Yes. 30:20, 21) Kasi Yehova wakutisambizga wuli? Wali kutipa buku lapadera comene ilo ni Baibolo. Kasi ivyo Ciuta wakutisambizga vingatovwira wuli kuthupi, maghanoghano na mwauzimu? Ungano wa dera wa cilimika ca uteŵeti ca 2014, uzamuzgora fumbo ili. Mutu wake ngwakuti, “Mazgu gha Ciuta Ngacandulo Pakusambizga.” Wafuma pa 2 Timote 3:16.

2. Kasi fundo zikuru zizamuŵa mu mazgoro gha mafumbo nga?

² Muzakakhazge Fundo Zikuru Izi: Fundo zikuru za ungano uwu zizamuŵa mu mazgoro gha mafumbo agha:

• Kasi tikusanga candulo wuli na ivyo Ciuta wakutisambizga? (Yes. 48:17, 18)

• Usange tingaleka ivyo tikucita kuti ticite uteŵeti wanyengo zose, kasi tingasimikizga vici? (Mal. 3:10)

• Kasi tikwenera kucita wuli para tapulika “visambizgo . . vyacilendo”? (Heb. 13:9)

• Kasi tingamuyezga wuli Yesu pakusambizga? (Mat. 7:28, 29)

• Cifukwa wuli awo ŵakusambizga mu mpingo ŵakwenera kujisambizga ŵekha? (Rom. 2:21)

• Kasi Mazgu gha Ciuta ngacandulo wuli? (2 Tim. 3:16)

• Kasi ŵanthu ŵakukhwaskika wuli na ‘kusunkhunyika’ kwa mitundu? (Hag. 2:6, 7)

• Kasi Yehova wali na cigomezgo wuli mwa ise? (Efe. 5:1)

• Cifukwa wuli tikwenera kufwilirapo kuti tikhalilire mu cisambizgo ca Yehova? (Luka 13:24)

3. Cifukwa wuli nchakuzirwa kuti tizakaŵepo na kutegherezga mwakupwelelera ku ungano uwu?

³ Pambere wandalembe mazgu agho pafuma mutu wa ungano, kukwambilira kwa 2 Timote cipaturo 3, Paulosi wakalongosora ivyo vizamucitika mu mazuŵa ghaumaliro. Wakati: “Kweni ŵanthu ŵaheni na ŵakupusika ŵalutilirenge kuhenipa, kupuluska na kupuluskika.” (2 Timote 3:13) Kuti tileke kupuluskika, nchakuzirwa kutegherezga na kulondezga ivyo Yehova wakutisambizga. Ipo tizakaŵepo na kutegherezga mwakupwelelera pa ungano uwu, uwo Yehova watinozgera pa nyengo yake.