Kasi Mukumanya Ivyo Mungasankha?
Mu vipatala vinandi pa caru cose, ŵakuzomera kucita opareshoni kwambura kuŵika ndopa. Kasi mukumanya makora ivyo mungasankha pakukhwaskana na nthowa zakucizgira kwambura kusazgako ndopa? Kuti musankhe mwakwenelera mukukhumbikwira kumanya makora nthowa izi. Kuti mumanye vinandi, ŵazgani mwakupwelelera cipaturo 7 ca buku la Jisungilirani mu Citemwa ca Ciuta na maliferensi agho ghalimo. Paumaliro, lombani na kuweleramo ivyo mwasambira mwakugwiliskira nchito mafumbo agha.
(1) Yowoyani cifukwa cikuru ico Ŵakaboni ŵa Yehova ŵakukanira kuŵikika ndopa. (2) Pa nkhani yakukhwaskana na nthowa za kacizgiro, kasi Ŵakaboni ŵa Yehova ŵakukhumba vici? (3) Kasi ŵalwari ŵali na wanangwa wuli? (4) Cifukwa wuli nchiwemi kusankha mwamahara ndiposo mwakupwelelera nthowa zinyake zakucizgira kwambura kusazgako ndopa? (5) Para ndopa zinandi zatayika, ni vinthu wuli viŵiri ivyo madokotala ghakucita dankha? (6) Kasi mukukhumbikwira kumanyiskika vici pakukhwaskana na nthowa zinyake zakucizgira kwambura kusazgako ndopa? (7) Kasi opareshoni yikuru yingacitika kwambura kuŵikika ndopa? (8) Ni vinthu wuli viwemi ivyo ŵadokotala ŵanandi ŵakuyowoya?
Munthu waliyose payekha mwakuyana na njuŵi yake yakusambizgika na Baibolo, wali na wanangwa wa kuzomera nthowa zinyake zakucizgira izo zalembeka mu buku la Citemwa ca Ciuta ilo layowoyeka mu nkhani iyi. Kasi mwasankha mwakwenelera nthowa zakucizgira izo imwe na ŵana ŵinu mukukhumba? Kasi mwalemba kadi linu la Mazaza gha Mwimiliri pa Umoyo Wane? Kuti mumanye vinandi pa nkhani iyi, ŵazgani mwakupwelelera “Mafumbo Ghakufumira ku Ŵaŵazgi” mu Gongwe la Mulinda la Ciceŵa la Juni 15, 2004. Ndipo kuti musankhe makora ivyo mungazomera panji kukana, wonani mphapika ya Uteŵeti Withu wa Ufumu wa Novembala 2006, pa mutu wakuti, “Kasi Nkhuti Wuli na Vigaŵa Vicokovicoko vya Ndopa,” ndiposo “Para Ŵakuti Ŵanovwire na Ndopa Zane?” Paumaliro, woneseskani kuti pa kadi linu la Mazaza gha Mwimiliri pa Umoyo Wane mwalembapo makora ivyo mwasankha. Ŵimiliri awo mwasankha ndiposo ŵabali ŵinu awo Mbakaboni ŵa Yehova yayi ŵakwenera kumanyiskika makora ivyo mwasankha.