Nyengo ya Cikumbusko Yikutipa Mwaŵi Wakuti Tisazgireko Uteŵeti
1. Cifukwa wuli tikwenera kusazgirako uteŵeti withu mu Malici, Epulero, na Meyi?
1 Kasi mungasazgirako uteŵeti mu nyengo ya Cikumbusko iyo yikwiza? Mu malo ghanandi, nyengo iyi kukuŵavya vula, kukuzizima comene yayi nesi kocha comene, ndipo zuŵa likucedwa kunjira. Ŵapharazgi ŵanji ŵazamuŵa pa holide ku nchito panji ku sukulu mwakuti pa nyengo iyi ŵanjirenge mu uteŵeti. Kwambira pa Epulero 2, tizamuŵa na upharazgi wapadera wakucemera ŵakunweka ku Cikumbusko ico cizamuŵako pa Epulero 17. Kufuma apo, tizamufwilirapo kovwira awo ŵakiza pa Cikumbusko kuti ŵalutilire kuŵa ŵakunweka na kuŵacemera ku nkhani yapadera iyo yizamuyowoyeka mu sabata ya Epulero 25. Enya, pali vifukwa vinandi vyakusazgirako uteŵeti mu Malici, Epulero, na Meyi.
2. Ni nthowa wuli yiwemi comene yakusazgirako uteŵeti withu?
2 Upayiniya Wakanyengo: Nthowa yiwemi comene yakuti mucitire vinandi nkhucita upayiniya wakanyengo. Pakuti tose tili ŵakutangwanika, ici cikukhumbikwira kunozgekerathu ndiposo kusintha vinthu vinyake pa ndondomeko yithu. (Zinth. 21:5) Mutepanji vinthu vyakuzirwa pacoko mungavileka dankha na kuzakavicita kunthazi. (Fil. 1:9-11) Mwalekeraci kuphalirako ŵanji mu mpingo kuti mukukhumba kuzakacita upayiniya mwakuti muwone usange nawo ŵangazakacita namwe?
3. Kasi mbumba zinganozga wuli kuti zisazgireko uteŵeti?
3 Pa Nyengo Yakusopera ya Mbumba ya sabata yakulondezgapo, cingaŵa ciwemi kudumbiskana vilato vinu nga ni mbumba. (Zinth. 15:22) Para mu mbumba mwakolerana, mutepanji ŵanji ŵangacita upayiniya wakanyengo mwezi umoza panji kujumpha apa. Wuli para mukuwona kuti ici cingacitika yayi? Mbumba yinganozgaso kuti yisazgireko uteŵeti mwa kupharazga kumise panji kupharazga maora ghanandi pa Cisulo na pa Sabata.
4. Kasi tisangenge vitumbiko wuli para tisazgirengeko uteŵeti mu nyengo ya Cikumbusko?
4 Yehova wakuwona vyose ivyo tikucita kuti timuteŵetere ndipo wakuwonga kujipeleka kwithu. (Heb. 6:10) Tikuŵa ŵacimwemwe para tikupa Yehova na ŵanji. (1 Mid. 29:9; Mil. 20:35) Kasi mungasazgirako uteŵeti pa nyengo ya Cikumbusko iyo yikwiza na kusanga vitumbiko vinandi ndiposo cimwemwe?