Kasi Muzamucitako Upayiniya Wakanyengo?
1. Cifukwa wuli nyengo ya Cikumbusko ni nyengo yiwemi kusazgirako uteŵeti?
1 Nyengo ya cikumbusko, ni nyengo yiwemi kusazgirako uteŵeti. Ni nyengo iyo tikughanaghanira citemwa ca Yehova pakupeleka mwana wake sembe yakuwombora. (Yoh. 3:16) Ntheura, tikuwonga Yehova kufuma pasi pa mtima, ndipo tikukhumbisiska kuphalirako ŵanji vya iyo na ivyo wacitirenge ŵanthu. (Yes. 12:4, 5; Luka 6:45) Kweniso ni nyengo iyo tikucemerako ŵanthu kuti tizakaŵire lumoza pa Cikumbusko. Ndipo para Cikumbusko cajumpha tikulutilira kwendera awo ŵakiza. Kasi namwe muzamucitako upayiniya wakanyengo mu Malici, Epulero panji Meyi?
2. Cifukwa wuli mwezi wa Malici nguwemi comene kucita upayiniya wakanyengo?
2 Mwezi wa Malici Ungaŵa Wapadera kwa Imwe: Mwezi wa Malici uzamuŵa uwemi comene kucita upayiniya wakanyengo. Awo ŵazamucitako ŵangalembeska wa maora 30 panji 50. Usange mulaŵiliri wadera wazamucezgera mpingo winu mu mwezi uwu, ŵapayiniya ŵakanyengo ŵazamuŵapo pa ungano wa ŵapayiniya mpaka paumaliro. Nyengo yakucemara ŵanthu ku cikumbusko ico cizamucitika pa Ciŵiri Malici 26, 2013, yasazgikirako. Tizamwamba pa Malici 1. Kweniso, mwezi uwu uzamuŵa na mazuŵa ghankhondi gha Cisulo na Sabata. Ipo mungacita makora usange mungaghanaghanirapo na kuwona usange mungakwaniska kucitako upayiniya wakanyengo mu mwezi wapadera uwu.
3. Kasi ni vici ivyo mungacita kuti musazgireko nyengo yakupharazgira?
3 Nozgekerani Sono: Sono ni nyengo yakuti muwoneso makora ndondomeko yinu na kuwona usange mungasintha vinyake kuti muciteko upayiniya mu mwezi wa Malici. Nchiwemi kukolerana cakucita pa mbumba. Mwantheura, pa nyengo Yakusopa kwa Mbumba mungadumbiskana ivyo mukukhumba kucita na kupanga ndondomeko. (Zinth. 15:22) Kufipa mtima yayi usange mungafiska yayi kucita upayiniya mwezi uwu. Kasi mungasintha ivyo mukucita kuti musazgireko waka nyengo iyo mukumalira mu upharazgi? Kasi mungakwaniska kusazgirako zuŵa limoza lakunjilira mu uteŵeti pa sabata?
4. Kasi ni vitumbiko wuli ivyo tisangenge para tingasazgirako uteŵeti mu nyengo ya Cikumbusko?
4 Apo tikusazgirako uteŵeti mu Malici, Epulero na Meyi, tizamuŵa na cimwemwe cikuru ico cikwiza cifukwa cakuteŵetera Yehova na ŵanji. (Yoh. 4:34; Mil. 20:35) Cakuzirwa comene nchakuti tizamukondweska Yehova.—Zinth. 27:11.