Mungaŵa Ŵakukondwa mu Nyengo ya Cikumbusko!
1. Kasi tingasazgirako wuli cimwemwe mu nyengo ya Cikumbusko?
1 Kasi mukukhumba kusazgirako cimwemwe mu Malici, Epulero na Meyi? Cinthu cimoza ico cingamovwirani nkhucita vinandi mu uteŵeti. Usange mungakwaniska, mungacita upayiniya wakanyengo. Kasi kusazgirako uteŵeti kungamovwirani wuli kuti muŵe ŵakukondwa?
2. Kasi kusazgirako uteŵeti kungatovwira wuli kuti tisazgireko cimwemwe?
2 Sazgiraniko Cimwemwe: Yehova wali kutilenga kuti tikondwenge para tikumusopa. Ntheura para tikumusopa tikukhorweska njara yithu yauzimu. (Mat. 5:3) Kweniso wali kutilenga kuti tikondwenge para tikupeleka vinthu ku ŵanji. (Mil. 20:35) Uteŵeti ukutovwira kucita vyose viŵiri, kusopa Yehova na kovwira ŵanthu. Ipo nchakupulikikwa kuti para tasazgirako uteŵeti, tikuŵa ŵakukondwa comene. Kweniso para tikunjira kaŵirikaŵiri mu uteŵeti, tikusazgirako maluso. Para tasazgirako maluso, tiwopenge yayi kupharazgira ŵanthu. Tipharazgirenge ŵanthu ŵanandi na kwambiska masambiro gha Baibolo. Vyose ivi vikovwira kuti tikondwenge na uteŵeti.
3. Cifukwa wuli Malici na Epulero ni myezi yiwemi yakucitira upayiniya wakanyengo?
3 Malici na Epulero ni myezi yiwemi comene yakucitira upayiniya wakanyengo, cifukwa munthu wangasankha wa maora 30 panji 50. Kweniso, tizamucemeranga ŵanthu ku Cikumbusko kwamba pa Malici 22 mpaka pa zuŵa la Cikumbusko, pa Mande, Epulero 14. Ŵabali na ŵadumbu mu mipingo ŵazamuŵa ŵakukondwa cifukwa ŵanandi ŵazamuteŵetera “na mtima umoza” kuti ŵamalizge cigaŵa ca mpingo wawo pa nyengo yake.—Zef. 3:9.
4. Kasi mukwenera kucitaci para mukukhumba kucita upayiniya wakanyengo?
4 Nozgekerani: Para mundambepo, sandani ndondomeko yinu kuti muwone ivyo mungacita kuti musazgireko uteŵeti mu mwezi umoza panji yinandi. Lombani kwa Yehova. (Yak. 1:5) Phaliraniko ŵamumbumba yinu na ŵanji mu mpingo. (Zinth. 15:22) Usange mukulwara panji ndimwe wakutangwanika, namwe mungakondwa cifukwa ca kucitako upayiniya wakanyengo.
5. Kasi nchivici cizamucitika usange tingasazgirako uteŵeti mu nyengo ya Cikumbusko?
5 Yehova wakukhumba kuti ŵateŵeti ŵake ŵakondwenge. (Sal. 32:11) Para tingayezgayezga kuti tisazgireko uteŵeti mu nyengo ya Cikumbusko, tizamuŵa ŵakukondwa comene. Kweniso tizamukondweska Adada ŵithu ŵakucanya.—Zinth. 23:24; 27:11.