Magazini Ghithu Ghakulembekera Ŵanthu Ŵakupambanapambana
1. Kasi muzga wakugomezgeka na wakucenjera wakuyezga wuli mpositole Paulosi?
1 Mpositole Paulosi wakasinthanga upharazgi wake kuti wandule “ŵanthu ŵa mitundu yose.” Muzga wakugomezgeka na wakucenjera nayo wakugwiliskira nchito magazini kuti uthenga wa Ufumu ufikire ŵanthu ŵakupambanapambana kweniso ŵavigomezgo vyakupambana. (1 Kor. 9:22, 23) Kuti tovwire makora ŵanthu na magazini gha Gongwe la Mulinda na Galamukani! tikwenera kumanya awo muzga wakuŵalembera magazini agha.
2. Kasi Galamukani! yikulembeka kuti yovwire ŵanthu wuli?
2 Galamukani!: Magazini iyi yikulembeka kuti yiwovwire ŵanthu ŵa nga ni awo mpositole Paulosi wakayowoyanga nawo apo wakazunura mazgu ghakuti “mwaŵanthu ŵa mu Ateni.” (Mil. 17:22) Ŵanthu aŵa ŵakaŵa Ŵakhristu yayi, ndipo ŵakaghamanyanga viŵi yayi Malemba. Ndimo ŵaliri ŵanthu awo muzga wakuŵalembera Galamukani! Ŵangaŵa kuti ŵakumanyapo kanthu yayi pa visambizgo Vyacikhristu, kweniso ŵalije cigomezgo mu cisopa, panji ŵakughanaghana kuti Baibolo lingaŵawovwira yayi. Cilato ca Galamukani! nkhukhorweska awo ŵakuŵazga kuti Ciuta waliko. Kweniso magazini iyi yikukhozga cipulikano mu Mazgu gha Ciuta na kovwira awo ŵakuŵazga kuwona kuti Ŵakaboni ŵa Yehova mbakupambana na visopa vinyake.
3. Kasi Gongwe la Mulinda lililose likulembekera ŵanthu wuli?
3 Gongwe la Mulinda: Magazini ya Gongwe la Mulinda lakugaŵira yikulembekera ŵanthu awo ŵakucindika Ciuta na Baibolo. Ŵakuŵazga Baibolo, kuti waka ŵakupulikiska viŵi yayi ivyo likusambizga. Ŵakuyana waka na ŵanthu awo Paulosi wakati “ŵakopa Ciuta.” (Mil. 13:14-16) Kweni Gongwe la Mulinda lakusambira, likulembekera Ŵakaboni ŵa Yehova. Paulosi wakalembanga makalata na cigomezgo cakuti awo ŵamuŵazga ŵakughamanya makora Malemba kweniso ŵakupulikiska unenesko. (1 Kor. 1:1, 2) Ntheura nkhani izo zili mu Gongwe la Mulinda lakusambira, zikulembekera ŵanthu awo tikuwungana nawo ndipo ŵakumanya makora vigomezgo vya Ŵakaboni ŵa Yehova.
4. Cifukwa wuli tikwenera kuyimanya makora magazini yiliyose iyo tikupharazgira mu uteŵeti?
4 Nangauli kanandi tikugaŵira magazini ghaŵiri nyengo yimoza, kweni tikulongosorapo yimoza pera. Ntheura mukwenera kumanya magazini yiliyose, ico cimovwiraninge kusankha nkhani izo zingaŵa zakovwira ku ŵanthu awo mwamukumana nawo.