Cakuzirwa Comene Nchivici Kuti Munthu Waŵe Msambizgi Muwemi?
1. Kasi cakuzirwa comene nchivici kuti munthu waŵe msambizgi muwemi?
1 Nchivici cingawovwira kuti munthu waŵe msambizgi muwemi? Masambiro ghapacanya? Kumanya vinthu? Luso lwakawiro? Tikukhumbikwira cinthu ico ni ng’anamuro la kufiska Dango, nchimanyikwiro ca ŵasambiri ŵa Yesu, kweniso ndico Yehova wakumanyikwa naco comene kuluska vyose. (Yoh. 13:35; Gal. 5:14; 1 Yoh. 4:8) Tikukhumbikwira citemwa. Ŵasambizgi ŵawemi ŵakulongora citemwa.
2. Cifukwa wuli nchakuzirwa kuti titemwenge ŵanthu?
2 Temwani Ŵanthu: Msambizgi Waluso, Yesu, wakatemwanga ŵanthu, lekani ŵakategherezganga kwa iyo. (Luka 5:12, 13; Yoh. 13:1; 15:13) Usange tikutemwa ŵanthu, tiŵapharazgirenge palipose apo mpata wasangikira. Nanga ŵanthu ŵangatisuska panji kuzerezga, tigongowenge yayi. Tilongorenge kuti tikutemwa munthu waliyose uyo tikuyowoya nayo, ndipo tisinthenge mutu wa nkhani kuti uyane na ivyo wakughanaghana. Tiyezgenge kusanga nyengo kuti tisambire na munthu waliyose, kweniso kuti tinozgekere sambiro lililose.
3. Kasi kutemwa unenesko kutovwirenge wuli para tikupharazga?
3 Temwani Unenesko: Yesu wakatemwanga comene unenesko uwo wakasambiranga mu Malemba, ndipo kwa iyo ukaŵa usambazi. (Mat. 13:52) Usange tikutemwa unenesko, tiyowoyenge na mtima wose ndipo ŵanthu ŵanwekenge kutegherezga. Para tikutemwa unenesko, tifipenge mtima yayi na kupeleŵera kwa luso lwithu, kweni tighanaghanirenge kuzirwa kwa uthenga uwo tikupharazga. Ici covwirenge kuti wofi ucepeko.
4. Kasi tingasambira wuli kutemwa ŵanthu?
4 Sambirani Citemwa: Kasi tingasambira wuli kutemwa ŵanthu? Tikwenera kughanaghanira umo Yehova na Mwana wake ŵakutemwera ŵanthu. Kweniso tikwenera kukumbuka kuti ŵanthu mbakusoŵerwa mwauzimu. (Mrk. 6:34; 1 Yoh. 4:10, 11) Kuti titemwe comene unenesko, tikwenera kusambira na kulanguruka. Citemwa nchigaŵa ca cipambi ca mzimu. (Gal. 5:22) Ntheura tikwenera kulomba Yehova kuti watipe mzimu wake utuŵa mwakuti utovwire kukura mu citemwa. (Luka 11:13; 1 Yoh. 5:14) Kwali tili ŵakusambira comene kwali yayi, kwali tikasambira nikale unenesko kwali yayi, kwali tili na luso lwakawiro pakusambizga kwali yayi, kweni fundo njakuti usange tikutemwa ŵanthu, tiŵenge ŵasambizgi ŵawemi.