Gwiliskirani Nchito Mwaluso Lupanga lwa Mzimu
1. Cifukwa wuli nchakuzirwa kusambira umo tingagwiliskira nchito makora “lupanga lwa mzimu”?
1 Msilikari wakurwa makora nkhondo usange wakumanya makora umo vilwero vyake vikugwilira nchito. Vikuyana waka na kugwiliskira nchito “lupanga lwa mzimu” pa nkhondo yithu yauzimu. Paulosi wakalemba kuti: “Yezga comene kujilongora wakuzomerezgeka kwa Ciuta, wanchito wambura kukhozgeka soni na cilicose, wakucita mwakwenelera na mazgu gha unenesko.”—2 Tim. 2:15.
2. Nchivici cingatovwira kuti ‘ticitenge mwakwenelera na mazgu gha unenesko’ mu uteŵeti?
2 Nchivici cingatovwira kuti ‘ticitenge mwakwenelera na mazgu gha unenesko’ mu uteŵeti? Pambere tindasambizge ŵanji ivyo Baibolo likuyowoya, tilipulikiske dankha ise taŵene. Kuti tipulikiske ivyo vesi likuyowoya, timanye dankha umo nkhani yose yiliri. Tiŵazge mavesi ghakumasinda na kunthazi. Buku linyake likuti: ‘Ng’anamuro la lizgu panji sentesi likumanyikwa makora usange taŵazga mazgu agho ghali kumasinda panji kunthazi kwake.’
3. Kasi tikwenera kuŵa maso na vici para tikulongosora malemba?
3 Padera pa kulongosora makora Malemba, pali vinandi ivyo vikukhumbikwa kuti ‘ticitenge mwakwenelera na mazgu gha unenesko.’ Tikwenera kuŵa maso comene kuti tileke kofya ŵanthu na Mazgu gha Ciuta. Nangauli tikugwiliskira nchito Malemba para tikukhozgera unenesko nga umo Yesu wakacitira apo wakayezgekanga na Satana, Baibolo ni nthonga yakutimbira awo tikuŵapharazgira yayi. (Dute. 6:16; 8:3; 10:20; Mat. 4:4, 7, 10) Tikwenera kupulikira ulongozgi wa mpositole Petrosi, uyo wakati: “Tuŵiskani Khristu mu mitima yinu pakuŵa Fumu, ŵakunozgeka nyengo zose kujivikilira panthazi pa waliyose uyo wakukhumba kumanya cifukwa ca cigomezgo ico cili mwa imwe, kweni mucitenge ntheura pamoza na kuzika ndiposo nchindi zikuru.”—1 Pet. 3:15.
4. Kasi ni vinthu wuli “vyakukhomelera” ivyo Mazgu gha Ciuta ghangagadabura? Yowoyani ciyelezgero ca pa mpingo winu.
4 Nchivici ico Mazgu gha Ciuta ghangacita usange tingaghalongosora mwakwenelera? (Ŵazgani 2 Ŵakorinte 10:4, 5.) Ghangagadabura “vinthu vyakukhomelera,” panji kuti kuvumbura visambizgo vyautesi, nkharo ziheni ndiposo vinjeru vyacaru. Baibolo lingawovwira kupankhura ghanoghano lililose ilo ‘latumphuskika kwimikana na kumanya Ciuta.’ Visambizgo vya mu Baibolo vingawovwira ŵanthu kusintha kaghanaghaniro kawo na kwamba kukolerana na unenesko.