Tingakhorwanga na Uteŵeti Wakunyumba na Nyumba Pera Yayi—Umo Tingacitira Usange Ndise Ŵakutangwanika Comene
1. Cifukwa wuli ŵanji ŵakutondeka kupempha ŵanthu kuti ŵasambirenge nawo Baibolo?
1 Ŵanji ŵakutondeka kupempha ŵanthu kuti ŵasambirenge nawo Baibolo cifukwa mbakutangwanika comene. Kusambira na ŵanthu Baibolo kukukhumba nyengo. Nyengo njakukhumbikwa kuti tinozgekere sambiro, tisambire nayo, na kumovwira umo wangacitira na masuzgo ghake. Mpositole Paulosi wakati wakapeleka umoyo wake kuti wawovwire ŵanthu ŵa ku Tesalonika kumanya Yehova. (1 Tes. 2:7, 8) Kasi tingasambira wuli Baibolo na munthu usange tili ŵakutangwanika comene?
2. Kasi kutemwa Yehova kukukhwaska wuli umo tikucitira na nyengo yithu?
2 Kusopa Kukukhumba Nyengo: Unenesko ngwakuti kusopa kukukhumba nyengo. Mwaciyelezgero, nyengo zose tikwenera kupatura nyengo kuluta ku maungano, kupharazga, kuŵazga Baibolo, na kulomba. Awo ŵali kutora panji kutengwa ŵakwenera kupatura nyengo yakucezgera na uyo ŵali kutorana nayo. Tikwenera ‘kugura nyengo’ yakusopera Yehova cifukwa tikumutemwa. (Efe. 5:15-17; 1 Yoh. 5:3) Kuyana na ivyo Yesu wakayowoya, cigaŵa cakuzirwa comene pakusopa kwithu nkhuzgora ŵanthu kuŵa ŵasambiri. (Mat. 28:19, 20) Para tighanaghanirenge fundo iyi, titondekenge yayi kupempha ŵanthu kuti tisambirenge nawo Baibolo.
3. Kasi tingapwelelera wuli sambiro para tatangwanika na vinthu vinyake?
3 Kweni wuli usange mungakwaniska yayi cifukwa ca nchito yakulembeka, ulwari, panji kutangwanika na milimo yinyake mu mpingo? Para ŵafumapo, ŵapharazgi ŵanyake ŵakusambira Baibolo na ŵanthu pa foni panji pa kompyuta. Awo ŵangakwaniska yayi cifukwa ca ulwari ŵakupempha awo ŵakusambira nawo kuti ŵize kunyumba kwawo. Ŵanji ŵakupempha mupharazgi wakugomezgeka kuti wakaŵacitiskireko sambiro para iwo ŵafumapo.
4. Kasi titumbikikenge wuli usange tisambirenge Baibolo na ŵanthu?
4 Paulosi wakakondwanga comene cifukwa ca kumalira nyengo na nkhongono zake kovwira ŵanji kumanya unenesko. (Mil. 20:35) Ndipo wakawonga Yehova wati waghanaghanira vipambi vya mulimo wake ku Tesalonika. (1 Tes. 1:2) Nase tikondwenge comene na uteŵeti usange tisambirenge Baibolo na ŵanthu nangauli ndise ŵakutangwanika.