Ivyo Vingamovwirani Kuti Musambirenge Nyengo Zose
KASI vikumusuzgani kuti muchitenge sambiro lamwaŵene sabata yiliyose ndipo nyengo zinyake likumunozgerani yayi? Tose nyengo zinyake vikutichitikira. Kweni ghanaghanirani vinthu vinyake ivyo tikuchita nyengo na nyengo nga nkhugeza. Kuti munthu uchape pakukhumbikwa nyengo na nkhongono, kweni pamanyuma ukujipulika makora! Mwakuyana waka, kusambira Baibolo nako kungatipangiska kuti tijipulikenge makora. (Efe. 5:26) Wonani masachizgo ghachoko waka agha agho ghangamovwirani:
Pangani ndondomeko. Sambiro lamwaŵene ntchimoza mwa “vinthu vyakuzirwa chomene,” ndipo Mkhristu wakwenera kusulako waka yayi. (Fil. 1:10) Kuti timovwirani kuti mulondezgenge ndondomeko yinu, lembani zuŵa na nyengo pa malo ghakuwonekera nga mpha bolodi, pa furiji panji malo ghanyake ghalighose. Panji mungathyera alamu pa foni yinu kuti yimukumbuskaninge para nyengo ya sambiro yili pafupi.
Sankhani nyengo na nthowa yiwemi kwa imwe. Kasi chikumuŵirani chipusu kuŵikapo mitima pa ivyo mukusambira, para mukusambira kwanyengo yitali, panji chikumuŵirani chipusu para mukupumurangapo dankha? Mwaŵenecho ndimwe mukumanya makora. Ntheura sinthani kuyana na umo vinthu viliri kwa imwe. Usange mukuwona kuti mwamba kugongowa para nyengo yakusambilira yakwana, yezgani kusambira kwa maminiti 10 pera. Nanga mungasambira kwa maminiti 10 pera, mungasambira vinandi kuluska kulekerathu. Ndipo chikuru mwambapo waka kusambira, vingamukhukiskani kuti mulutilire kusambira.—Fil. 2:13.
Sankhiranithu ivyo musambirenge. Usange mukwamba kughanaghanira ivyo musambirenge para nyengo yakwana kale, mbwenu mwatondeka ‘kugwiliskira ntchito makora nyengo yinu.’ (Efe. 5:16) Yezgani kulemberathu ivyo musambirenge. Usange pa malo panyake mukupulikiska makora yayi, lembani fumbo ilo. Ndipo paumaliro wa sambiro lililose, mungasangirapo fundo zinyake izo mungatemwa kuzakasambira pa sambiro lakulondezgapo.
Sinthani apo mphakukhumbikwira. Yezgani kusintha ndondomeko yinu, nga ni unandi wanyengo iyo mukumalira pa sambiro linu panji nkhani izo mukusankha kusambira. Chakuzirwa chomene ni nyengo iyo mukusambilira, utali wake, panji ivyo mukusambira yayi, kweni kuti musambirenge nyengo zose.
Tikusanga chandulo chomene para tikusambira nyengo zose. Tikuŵa paubwezi wakukhora na Yehova, tikusambira kusankha makora vinthu, kweniso tikusamphuskika.—Josh. 1:8.