Masacizgo

Kwambiska Masambiro gha Baibolo pa Cisulo Cakwamba mu Julayi

Munthu waliyose wakukhumba kukhala umoyo utali na wambura masuzgo. Imwe mungazgora wuli fumbo ili: ‘Kasi mukughanaghana kuti ivyo ŵasayansi ŵakucita na minkhwala iyo ŵakubowozga, vingatovwira kuti tizakaŵe na umoyo wamuyirayira zuŵa linyake?’ [Mulekani wazgore.] Wonani ivyo magazini iyi yikuyowoya.” Mulongorani peji laumaliro la Gongwe la Mulinda la Julayi 1, ndipo dumbiskanani fumbo lakwamba na kuŵazgapo lemba. Mupani magazini na kupangana kuti muzakadumbiskane fumbo lakulondezgapo.

Manyani ici: Muzakayezgelere sacizgo ili pa ungano wakunozgekera uteŵeti pa Julayi 6.

Gongwe la Mulinda Julayi 1

“Ŵanandi awo tikudumbiskana nawo ŵali na cisopa cawo. Kweni ŵanji ŵakuti ŵali kuleka kugomezga cisopa. Imwe mukutipo wuli? [Mulekani wazgore.] Yesu wakayowoya fundo iyo yingatovwira kumanya usange cisopa ico tilimo nchaunenesko panji yayi. [Ŵazgani Luke 6:44a.] Magazini iyi yikulongosora vipambi viheni ivyo cisopa cikupambika. Kweniso yikuzgora fumbo lakuti, Kasi cilipo cisopa ico ningacigomezga?”

Galamukani! Julayi

“Tikudumbiskana na ŵanyithu za suzgo ilo likukhwaska waliyose. Suzgo ili ni kucita vinthu mwambura urunji. Ŵanji ŵakucita viwoneskero para ŵawona kuti vinthu vyambura urunji vikucitika. Kasi vinthu vikusintha para ŵanthu ŵacita viwoneskero? [Lindilirani zgoro.] Wonani ico cizamupangiska kuti vinthu visinthe pa caru. [Ŵazgani Mateyu 6:9, 10.] Magazini iyi yikuzgora fumbo lakuti, Kasi viwoneskero vikovwira nadi kuti masuzgo ghamare mu caru?”

Ciuta Wakutiphalira Uthenga Uwemi!

“Tikudumbiskana na ŵanyithu nkhani yakukondweska ya mu Baibolo. Ŵanandi awo tadumbiskanapo nawo ŵakupulikiska yayi cifukwa ico Ciuta wazomerezgera masuzgo mu caru. Kasi mukughanaghana kuti likaŵa khumbo la Ciuta kuti ŵanthu ŵasuzgikenge?” [Mulekani wazgore.] Julani sambiro 5, ndipo ŵazgani na kudumbiskana ndime ziŵiri zakwambilira na malemba agho ŵaghagwenyuska. Mupani burosha ndipo panganani kuti muzakazgore fumbo lakulondezgapo.