Lutaniko Luŵiro

Kufumira apo tikasinthira Webusayiti yithu, ŵanthu ŵanandi ŵakupempha sambiro kwizira pa intaneti. Cinthu cinyake ico capangiska kuti ŵanthu ŵanandi ŵambe kupempha sambiro la Baibolo ni nthowa ziphya zakupharazgira uko kukusangika ŵanthu ŵanandi. Para ŵanthu ŵapempha sambiro ku ofesi ya munthavi, munthavi ukutumizga luŵiro ku mpingo wakwenelera. Usange munthu wapempha sambiro kwizira pa jw.org, munthavi ukuphalira ŵalara ŵa mpingo wa uko kukukhala munthu uyo para pajumpha mazuŵa ghaŵiri pera. Kweni malipoti ghakulongora kuti ŵanthu ŵanyake awo ŵakupempha sambiro ŵakovwirika luŵiro yayi. Pakujumpha masabata ghanandi kuti munthu wazakakumane nawo. Kasi tingacita wuli kuti tiŵawovwire luŵiro ŵanthu aŵa pambere Satana wandawuskemo mbuto izo zikaseŵeka?—Mrk. 4:14, 15.

Usange mwasanga munthu wakunweka uyo wakukhala mu cigaŵa cinu yayi, lembani luŵiro fomu ya Weleraniko kwa Munthu Uyu (S-43) na kupeleka kwa mulembi pa maungano gha mpingo ghakulondezgapo, panji pambere dazi la maungano lindafike. Mulembi wakwenera kupeleka fomu iyi ku mpingo wakwenelera panji kutumizga ku munthavi dazi leneliro panji lakulondezgapo. Wangatumizga kwizira pa jw.org. Ŵalara ŵakwenera kuwona pa Webusayiti nyengo na nyengo. Para ŵasangapo uthenga wakuti ŵalute kwa munthu uyo wakukhumba sambiro, ŵakwenera kucitapo kanthu mwaluŵiro. Mupharazgi uyo watumika na ŵalara kuti wakakumane na munthu uyo wapempha sambiro, wakwenera kulutako mwaluŵiro. Usange panyumba mundasangepo munthu, mungaleka adiresi panji nambara yinu ya foni.