Gwiliskirani Ntchito Webusayiti ya jw.org mu Upharazgi

Webusayiti yithu yikutovwira kupharazga makani ghawemi m’paka “ku vigaŵa vyakutali chomene vya charu chapasi.” (Mil. 1:8) Ŵanthu ŵanandi ŵakumanya yayi umo ŵangasangira Webusayiti yithu. Ŵangamanya para tingaŵawovwira.

Mulaŵiliri munyake wa dera wakakopera vidiyo ya mutu wakuti Chifukwa Wuli Mukwenera Kusambira Baibolo? pa foni yake, ndipo wakulongora ŵanthu para wasanga m’pata. Para wakupharazga kunyumba na nyumba, wakuyowoya kuti: “Nkhovwira ŵanthu kusanga mazgoro gha mafumbo ghatatu agha: Chifukwa wuli mu charu muli masuzgo ghanandi? Kasi Chiuta wazamumazga wuli masuzgo agha? Kasi pasono tingaghazizipizga wuli? Vidiyo iyi yikuzgora mafumbo agha.” Para wajura vidiyo, wakulaŵiska uyo wakumupharazgira kuti wawone umo wakuchitira. Vidiyo iyi njakukopa chomene mwakuti ŵanthu ŵakulaŵiska kunyake yayi m’paka yimare. Paumaliro, mulaŵiliri wa dera uyu wakuphalira munthu kuti: “Nga umo vidiyo iyi yayowoyera mungapempha sambiro la Baibolo pa Intaneti. Ningamulongorani umo tikusambilira Baibolo.” Usange munthu wazomera, wakumulongora umo tikusambilira Baibolo mu burosha la Uthenga Uwemi. Usange munthu ngwakutangwanika, wakupangana nayo kuti wakizeso nyengo yinyake. Para wali mu resitiranti, wakuchita mwakuyana waka na munthu uyo wakhala nayo pafupi. Kasi namwe mukugwiliskira ntchito Webusayiti yithu mu upharazgi?