Gwiliskirani Ntchito Webusayiti Yithu mu Uteŵeti—“Mafumbo Agho Baibolo Likuzgora”

Pa Webusayiti ya jw.org pali chigaŵa chakuti “Ivyo Baibolo Likusambizga.” Pa chigaŵa ichi pali “Mafumbo Agho Baibolo Likuzgora.” Usange tikughamanya makora mafumbo agha, tingaŵalongora ŵanthu para ŵatifumba. Mafumbo agha ghangatovwiraso kuti tambe kudumbiskana na munthu mu upharazgi. Tingasankha fumbo ilo ŵanthu ŵangatemwa mu chigaŵa chithu, kuŵafumba kuti ŵayowoyepo ivyo ŵakughanaghana, na kuŵalongosolera ivyo Baibolo likusambizga. Pakuzgora tigwiliskire ntchito ivyo vili pa jw.org. Kufuma apo, tiŵalongore pa jw.org ivyo tadumbiskana. Nthowa yinyake nkhuŵapempha kuti ŵaŵazge ŵekha zgoro pa Webusayiti. Muwoli wa mulaŵiliri wa dera wakufumba ŵanthu kuti: “Kasi mukughanaghana kuti Chiuta ndiyo wakupangiska masuzgo?” Para ŵazgora, wakuŵafumba kuti: “Kasi mungatemwa kuti mumanye zgoro?” Kufuma apo, wakuŵalongora vidiyo pa foni yake iyo wakakopera pa jw.org. Paumaliro wakuŵalongora chipaturo 11 mu buku la Baibolo Likusambizgaci.