Ivyo Vingatovwira Kuti Tiŵe Ŵaluso mu Uteŵeti—Kupharazga pa Intakomu na Uko Kuli Chivikiliro Chikuru

Chifukwa Wuli Nkhwakuzirwa? Nyengo zinyake tingachita wofi kupharazga uko kuli chivikiliro chikuru panji ku nyumba izo zili na intakomu. Kasi ntchivichi chingatovwira kuti tileke kopa? Tikwenera kukumbuka kuti ŵanthu ŵanyake tingaŵapharazgira pa intakomu, pa foni, panji pa kalata pera. (Rom. 10:14) Ŵapharazgi ŵanyake ŵayowoyapo uwemi wa upharazgi uwu. (Wonani Buku Lapachaka la Chingelezi la 2011, peji 65-66, na la 2000, peji 54, ndime 3.) Wonani masachizgo agha.

Umo Tingachitira:

Tinozgekerenge na kulemba mazgu ghafupi ghakuti tikaŵazgire munthu pa intakomu panji pa foni. Ivi vingatovwira kuti tileke kopa. Tiyowoyenge mwaluŵiro ivyo tapukwa. Tingazunura zina la mweneko wa nyumba para talimanya. Paumaliro tingamupempha kuti timupe thirakiti panji magazini agho ghakulongosora vinandi pa nkhani iyo tadumbiskana nayo.
Tileke kughanaghana kuti ŵakanenge uthenga withu. Timwemweterenge nga ni para tikuyowoya nawo maso na maso.
Tiŵe ŵakufwatuka ndipo tingayowoyanga tekha yayi. Tiyowoyenge mwakuzikira, kweni kuzikira chomene yayi.
Tichitenge vinthu mwamahara. Nyumba zinyake zikuruzikuru zikuŵa na maintakomu ghanandi. Pa nyumba izi tingapharazgira ŵanthu ŵachoko waka na kulemba intakomu iyo talekerapo. Usange tingakhalapo nyengo yitali kuti tipharazge pa intakomu yiliyose, mbwenu ŵanthu awo ŵakukhala mu nyumba izi ŵambenge kutikayikira.

Yezgani Sachizgo Ili Mwezi Uno:

Pakusopa kwa mbumba, yezgelerani umo mungapharazgira munthu pa intakomu panji uko kuli chivikiliro chikuru. Pakuyezgelera mulazgirane msana panji muwongo kuti muleke kuwonana.