Kasi Muyezgenge Mwamphu wa Yehova na Yesu mu Nyengo ya Chikumbusko?
1. Kasi ŵapharazgi ŵanandi ŵakuchita vichi mu nyengo ya Chikumbusko?
1 Yehova ngwamwamphu pakufiska khumbo lake. Pakuyowoya ivyo Ufumu wa Chiuta uzamuchita, lemba la Yesaya 9:7 likuti: ‘phyumphyu [panji kuti mwamphu] la Yehova wa mipingo lifiskenge ivi.’ Apo wakaŵa pa charu chapasi, Yesu nayo wakaŵa wamwamphu pakusopa Chiuta. (Yoh. 2:13-17; 4:34) Chaka chilichose mu nyengo ya Chikumbusko, ŵapharazgi ŵanandi pa charu chose chapasi ŵakuyezga Yehova na Yesu. Iwo ŵakuchita vinandi mu uteŵeti. Kasi namwe muzamuŵa yumoza wawo?
2. Kasi mwamphu uzamutovwira kuti tizakachite vichi kwamba pa Malichi 7?
2 Kuchemera Ŵanthu ku Chikumbusko: Chaka chino, tizamwamba kuchemera ŵanthu ku Chikumbusko pa Malichi 7. Yambanipo kunozgekera kuti muzakapharazge mwamwamphu. Ŵabali na ŵadumbu mu mipingo ŵazamuŵa ŵakukondwa apo ŵazamuchitanga upharazgi wapadera uwu. Tizakachemereko awo tikugwira nawo ntchito, ŵabali ŵithu, awo tikusambira nawo sukulu, na awo tikusambira nawo Baibolo. Tingazakaŵapa tumapepala panji tingazakagwiliskira ntchito jw.org.
3. Kasi mungachita vichi kuti muchite vinandi mu uteŵeti mu Malichi na Epulero?
3 Kuchita Upayiniya Wakanyengo: Mwamphu uzamutovwiraso kuti tichite vinandi mu uteŵeti. Tikukayika yayi kuti ŵanandi ŵazamuchita upayiniya wakanyengo mu Malichi na Epulero, chifukwa ŵangazachita wa maora 30. Pa nyengo yakusopera ya mbumba panji pa sambiro la mwaŵene, mungalomba na kughanaghanirapo umo mungachitira pa nkhani iyi. (Zinth. 15:22) Para muzamuŵa ŵamwamphu pakuchita upharazgi wapadera uwu ŵanji nawo ŵangazakaŵa ŵamwamphu. Usange musinthenge vinthu vinyake kuti muchite vinandi mu uteŵeti, muyezgenge mwamphu wa Yesu.—Mrk. 6:31-34.
4. Kasi tikutumbikika wuli para tikuyezga mwamphu wa Yehova na Yesu?
4 Tizamutumbikika chomene para tizamuyezga mwamphu wa Yehova na Yesu mu nyengo ya Chikumbusko. Tizamupharazgira ŵanthu ŵanandi mu chigaŵa chithu. Tizamuŵa ŵakukondwa chifukwa cha kuteŵetera Yehova na kovwira ŵanji. (Mil. 20:35) Chakuzirwa chomene ntchakuti tizamukondweska Yehova na Mwana wake.