Bokosi la Fumbo

◼ Kasi ŵapharazgi ŵangapharazga panji kusambira Baibolo na munthu uyo wakukhala ku charu chinyake pa intaneti?

Ŵapharazgi ŵanyake ŵakusambira Baibolo na ŵanthu pa intaneti mu vyaru ivyo mulimo withu ngwakukanizgika panji ŵapharazgi mbachoko. Nyengo zinyake vikwenda makora. Kweni pakuŵa masuzgo usange ŵapharazgi ŵakulemberana ma imelu panji kuchezga na ŵanthu awo ŵakukhala mu charu chinyake. (Wonani Uteŵeti Withu wa Ufumu wa Julayi 2007, peji 5.) Nangauli tikupenja ŵanthu ŵa mitima yiwemi kuti ŵapulike uthenga wa ufumu, kweni kuchezga na aŵa kungapangiska kuti mubali panji mudumbu wambe kuchezga na ŵanthu ŵaheni, nga mbakugaluka. (1 Kor. 1:19-25; Kol. 2:8) Kweniso mu vyaru ivyo mulimo withu ngwakukanizgika, ŵalara ŵaboma ŵangabowozga ivyo tikudumbiskana ndipo ŵabali na ŵadumbu ŵithu awo ŵakukhala mu charu icho tingaŵanjizga mu suzgo. Ntheura, ntchakuzomerezgeka yayi kuti ŵapharazgi ŵapharazgirenge ŵanthu awo ŵakukhala mu vyaru vinyake pa intaneti.

Para tapharazgira munthu uyo wafuma ku charu chinyake, ntchiwemi yayi kulutilira kuchezga nayo para wawelera kwake, pekha para tatumika na ofesi ya munthavi. M’malo mwake mulongorani waka Webusayiti ya jw.org kuti wakamanye vinandi. Tingamovwira umo wangakakumanirana na Ŵakaboni mu charu chake. Tingamuchiskaso kuti wakalute ku Nyumba ya Ufumu iyo yili kufupi na kwake, nangauli mu vyaru vinyake mulije Nyumba za Ufumu. Para wakukhumba kuti Ŵakaboni ŵa Yehova ŵakalutilire kuchezga nayo ku nyumba kwake, tingalemba fomu yakuti Weleraniko kwa Munthu Uyu (S-43) na kupeleka kwa mulembi. Ndipo iyo wazamutumizga ku ofesi ya munthavi pa jw.org, pa imelu panji pa kalata. Ofesi ya munthavi ya charu icho munthu uyo wakukhala ndiyo yamumanya umo yingachitira kuti yimovwire.—Wonani Uteŵeti Withu wa Juni 2014, peji 7, na wa Novembala 2011, peji 2.

Para tikusambira na munthu uyo wasamukira ku charu chinyake, panji wakukhala kale ku charu chinyake uyo ise tamumanyira waka pa intaneti, tikwenera kulondezga ulongozgi uwo walembeka pachanya apa. Ndipouli, tingalutilira kumovwira m’paka wasange Kaboni wa Yehova wakufupi na kwake uyo wangamovwira. Kweniso para munthu uyu wakukhala mu charu icho mulimo withu ngwakukanizgika, tikwenera kuchenjera chomene usange tikudumbiskana nkhani za mu Baibolo pa kalata, telefoni panji nthowa zinyake.—Mat. 10:16.