Kumbukani Kulombera Ŵakhristu Awo Ŵakutambuzgika

Baibolo likayowoyerathu kuti Satana wazamutitambuzga kuti watimbanizge ntchito yithu. (Yoh. 15:20; Chivu. 12:17) Kasi tingawovwira wuli Ŵakhristu ŵanyithu awo ŵakutambuzgika mu vyaru vinyake? Tikwenera kuŵalombera. Baibolo likuti: “Ŵeyelero la munthu murunji lili na nkhongono yikuru chomene.”—Yak. 5:16.

Kasi tikwenera kuzunura vichi para tikuŵalombera? Tingapempha Yehova kuti waŵape chikanga ŵabali na ŵadumbu kuti ŵaleke kopa. (Yes. 41:10-13) Tingalombaso kuti ŵamazaza ŵayiwonenge mwakwenelera ntchito yithu yakupharazga, “mwakuti tikhalenge umoyo wa bata na wakufwasa.”—1 Tim. 2:1, 2.

Apo Paulosi na Petrosi ŵakaŵa mu jele, Ŵakhristu ŵanyawo ŵakaŵalomberanga, ŵakazunuranga mazina ghawo mu malurombo. (Mil. 12:5; Rom. 15:30, 31) Nangauli tingaŵamanya wose yayi ŵabali na ŵadumbu ŵithu awo ŵakutambuzgika, kweni tingazunura mpingo, dera panji charu chawo.

Lembani vyaru ivyo kuli Ŵakhristu awo ŵakutambuzgika awo mukukhumba kuŵalombera