Nkhani Zakugomezgeka Kweniso Zakukhozga Chipulikano

Ŵakaboni ŵa Yehova ŵakughanaghanira chomene Ŵakhristu ŵanyawo. (1 Petrosi 2:17) Taŵanandi tikujipulika nga ni Mudumbu Tannis uyo wakukhala ku Kenya. Iyo wakuti: “Nkhutemwa chomene kuti nimanye ivyo vikuchitikira ŵabali na ŵadumbu ŵane ŵakutemweka pa charu chose chapasi.” Kasi vikwenda wuli kuti Tannis na Ŵakaboni ŵanyake mamiliyoni ghanandi ŵamanyenge ivyo vikuchitikira ŵabali na ŵadumbu ŵanyawo mu vyaru vyakupambanapambana? Kwambira waka mu 2013, tili na mwaŵi wakumanya ivyo vikuchitikira ŵabali ŵithu kwizira pa chigaŵa cha Nkhani icho chili pa webusayiti yithu ya jw.org.

Chigaŵa cha Nkhani ichi, chikuŵa na malipoti ghakukhwaskana na Ŵakaboni ŵa Yehova pa nkhani zakupambanapambana nga ni kufumiskika kwa Mabaibolo, ntchito yakovwira para kwachitika soka, umo mulimo withu wa vyakuzenga ukwendera, kweniso vyakuchitika vinyake vyakuzirwa vyakupambanapambana. Nkhani izo zikusangika pa webusayiti yithu zikutimanyiska vinthu vyakukhwaskana na ŵabali na ŵadumbu ŵithu awo ŵali mu jele chifukwa cha chipulikano chawo. Nkhani izi zikulongosoraso vinthu vyakukhozga vyakukhwaskana na ntchito yithu yakupharazga kweniso Chikumbusko cha nyifwa ya Yesu. Kasi mbanjani ŵakufufuza nkhani izi, ndipo ŵakulemba wuli?

Kufufuza na Kulemba Nkhani

Dipatimenti Yakuwona vya Nkhani (Office of Public Information) ndiyo yikulaŵilira mulimo uwu. Dipatimenti iyi yili ku likuru lithu la pa charu chose ndipo yikugwira ntchito iyi mwakulongozgeka na Komiti Yakulongozga ya Wupu Wakulongozga. Dipatimenti Yakuwona vya Nkhani yili na ŵabali na ŵadumbu ŵakujumpha 100 ndipo ŵanandi mwa iwo ŵakovwirapo uku ŵali ku nyumba kwawo. Ŵanyake mwa ŵabali na ŵadumbu aŵa ŵakulemba nkhani, kufufuza, kujambura, kweniso kung’anamura. Ŵanyake ŵakuyowoyeskana na ŵalara ŵa boma, mapurofesa na ŵasambizgi, kweniso ŵamutolamakani. Dipatimenti Yakuwona vya Nkhani ku likuru lithu yikovwirika na Madipatimenti Ghakuwona vya Nkhani ghakujumpha 80 mu maofesi gha munthavi pa charu chose.

Kuti nkhani yilembeke, Dipatimenti Yakuwona vya Nkhani ku likuru lithu yikugwilira lumoza ntchito na madipatimenti ghakuwona vya nkhani mu maofesi gha munthavi. Para ŵabali ŵithu ŵawona kuti nkhani iyo yachitika njakwenelera kuti yilembeke, ŵakufufuza nkhani yake na kusanga maukaboni ghakugomezgeka. Ivi vingasazgapo kufumba nkhwantha zinyake izo zikuyimanya makora nkhani iyo yachitika. Pamanyuma pakuti nkhani yose yafufuzika mwakukwana, mbwenu ŵakulemba nkhani, kuyinozga, kuyiŵazga, kuŵikamo vithuzi apo mphakwenelera, kweniso kuyitumizga ku Komiti Yakulongozga kuti ŵakayiwone dankha.

Mazgu Ghakuwonga

Kasi ŵasopi ŵanyithu ŵakujipulika wuli para ŵaluta pa chigaŵa cha Nkhani? Cheryl, mudumbu wa ku Philippines wakati: “Nkhukondwa chomene kwamba zuŵa lane mwa kuŵerenga nkhani zakukhwaskana na gulu la Yehova na ŵanthu ŵake.”

Ŵanthu ŵanandi awo ŵakuŵerenga nkhani zithu ŵakuyowoya mphambano iyo yilipo pakati pa nkhani izo zikusangika pa webusayati yithu ya jw.org na izo zikuŵa waka pa Intaneti. Tatiana wa ku Kazakhstan, wakayowoya kuti: “Nkhukondwa chomene chifukwa nkhani izo zikusangika pa jw.org ni zakuti ungazigomezga. Nyengo zose zikuŵa zaunenesko.” Mudumbu munyake wa ku Mexico zina lake Alma wakati: “Nkhani zinyake izo tikupulika kunyake uku zikutitimbanizga chomene, kweni nkhani izo tikupulika pa webusayiti yithu ni zakukhozga chomene.”

Nkhani izo zikusangika pa webusayiti yithu nizakugomezgeka waka yayi, kweni zikukhozgaso chipulikano chithu. Bernard uyo wakukhala ku Kenya wakati: “Nkhani izi zikunovwira kuti niwonenge ŵabali na ŵadumbu pa charu chose nga ni banja lane, vilije kanthu kuti ŵakukhala nkhu. Nkhuzunura mazina ghawo na kuyowoya mwakudunjika masuzgo agho ŵakukumana nagho mu malurombo ghane.” Mudumbu munyake zina lake Bybron uyo nayo wakukhala ku Kenya, wakati: “Nyengo zose nkhukondwa chomene para nawona nkhani iyo yikuyowoya za kufumiskika kwa Baibolo mu chiyowoyero chinyake! Nkhani izi zikunikumbuska waka kuti Yehova wakutemwera yayi.”

Nanga zingaŵa nkhani zakukhwaskana na ŵabali na ŵadumbu ŵithu awo ŵakutambuzgika nazo zingatikhozga. Jackline uyo wakukhala ku Kenya wakati: “Para nkhughanaghanira chikanga icho ŵabali na ŵadumbu ŵakulongora vikukhozga chomene chipulikano chane. Nyengo zose nkhusambirapo kanthu pa ivyo vikuŵawovwira kuti ŵalutilire kuzizipizga. Nasambira umo vinthu ‘vichokovichoko’ nga ni lurombo, kuŵerenga Baibolo, na kwimba sumu vikovwilira ŵabali ŵithu kuti ŵalutilire kuŵa na nkhongono.”

Mudumbu munyake ku Costa Rica zina lake Beatriz wakuzirwiska chomene nkhani zakukhwaskana na masoka ghachilengiwa. Iyo wakuti: “Nkhani izi zikunovwira kuwona umo gulu lithu likupelekera wovwiri uwo ukukhumbikwira ku ŵabali ŵithu mwaluŵiro chomene, mu ndondomeko, kweniso munthowa ya chitemwa. Ivi vikunikhorweska kuti ili ni gulu la Yehova nadi.”

Tikuwonga chomene kuti tikupokera nkhani izo zachitika mwasonosono zakukhwaskana na ŵabali na ŵadumbu withu pa charu chose! Ivi vyate vichitikenge yayi kwambura wovwiri wa vyawanangwa vinu ivyo mukupeleka ku ntchito ya pa charu chose, ndipo vinandi mwa vyawanangwa ivi vikupelekeka kwizira pa donate.jw.org. Tikuti yewo chifukwa cha mtima winu wakupeleka.