“Charu Chose Chapasi Chikaŵa na Chiyowoyero Chimoza”

11:1-4, 6-9

Pa Babele, Yehova wakambininiska ŵanthu ŵakugaluka. Wakachita nthena mwa kutimbanizga chiyowoyero chawo. Mazuŵa ghano, Yehova wakuwunjika mzinda ukuru kufuma ku mitundu yose na malulimi, ndipo waŵapa “kayowoyero katuŵa” kuti wose “ŵachemenge pa zina la Yehova, na kumuteŵetera na mtima umoza.” (Zef 3:9; Chiv 7:9) “Kayowoyero katuŵa” aka, ni unenesko wakukhwaskana na Yehova kweniso khumbo lake ilo likusangika mu Malemba.

Para munthu wakusambira chiyowoyero chinyake, pali vinandi ivyo wakwenera kuchita padera pakusunga waka mazgu ghaphya. Wakweneraso kusambira kaghanaghaniro kaphya. Ndimo vikuŵiraso para tikusambira kayowoyero katuŵa, kaghanaghaniro kithu nako kakusintha. (Ro 12:2) Para tikulutilira kusambira kayowoyero katuŵa vikovwira kuti taŵanthu ŵa Chiuta tiŵe ŵakukolerana.—1Ko 1:10.