UMOYO WACHIKHRISTU
Yehova Wakutovwira Para Tasangana na Viyezgo
Mu nyengo zaumaliro izi, tisanganenge na masuzgo ghanandi. Nyengo zinyake, tingawona nga masuzgo ghithu ngakuru mwakuti tingazizipizga yayi. Kweni para tili paubwezi wakukhora na Yehova, wangatovwira kuti tizizipizge masuzgo nanga ghangaŵa ghakuru chomene. (Yes 43:2, 4) Kasi tingachita wuli kuti tiŵe paubwezi wakukhora na Yehova para tasangana na masuzgo?
Lurombo. Para tikumuphalira Yehova masuzgo ghithu, watipenge mtende wa mu maghanoghano kweniso nkhongono kuti tizizipizge.—Fil 4:6, 7; 1Te 5:17.
Maungano. Kuluska kumasinda uku, sono ndipo tikukhumbikwira chomene chakurya chauzimu kweniso kuŵa pamoza na ŵabali na ŵadumbu pa maungano. (Heb 10:24, 25) Tikusanga chomene chandulo na mzimu wa Yehova, para tikunozgekera, kusangikapo pa maungano kweniso para tikuzgorapo.—Chiv 2:29.
Kupharazga. Para tikuŵikapo mtima pa mulimo wakupharazga, vingatovwira kuti tighanaghanirenge vinthu viwemi. Kweniso vingatovwira kuti tikhozge ubwezi withu na Yehova kweniso ŵanyithu awo tikupharazgira lumoza.—1Ko 3:5-10.
WONELERANI VIDIYO YA MUTU WAKUTI, YEHOVA WAKUTORENGE, NDIPO PAMANYUMA ZGORANI MAFUMBO GHAKULONDEZGAPO AGHA:
Kasi ntchivichi chikamovwira Malu kuti walutilire kuŵa paubwezi na Yehova apo wakasangananga na masuzgo?
Kasi mazgu agho ghali pa Salimo 34:18 ghangatipembuzga wuli para tasangana na masuzgo nga umo vikaŵira na Malu?
Kasi ivyo vikachitikira Malu vikulongora wuli kuti Yehova wakutipa “nkhongono zakuluska zakawiro” para tasangana na masuzgo?—2Ko 4:7