Umo Yehova Wakutovwilira Kuzizipizga

1. Chifukwa wuli tikukhumbikwira kuzizipizga, ndipo ni njani watovwirenge? (1 Petrosi 5:10)

MU MAZUŴA ghaumaliro ghakusuzga agha, ŵanthu ŵa Yehova ŵakukhumbikwira kuzizipizga. Ŵanyake ŵakulwara nthenda zambura kukonda munkhwala. Ŵanyake ŵakuzizipizga nyifwa ya wakutemweka wawo. Apo ŵanyake ŵakususkika na ŵamumbumba yawo panji ŵalara ŵaboma. (Mat. 10:​18, 36, 37) Manyani kuti kwali mukukumana na suzgo linonono wuli, Yehova wamovwiraninge kuzizipizga.—Ŵazgani 1 Petrosi 5:10.

2. Kasi Mkhristu wakwenera kugomezga njani kuti wazizipizge?

² Kuzizipizga chikung’anamura kulutilira kuŵa ŵakugomezgeka kwa Yehova na kumuteŵetera na chimwemwe nanga ni para tikusuzgika, kutambuzgika, panji kuyezgeka. Tikweneraso kugomezga kuti vinthu viŵenge makora. Vingachitika yayi kuti Mkhristu wazizipizge chifukwa cha kugomezga nkhongono zake, kweni wakwenera kuthemba Yehova uyo wakupeleka “nkhongono zakuluska zakawiro.” (2 Kor. 4:7) Mu nkhani iyi, tidumbiskanenge vinthu vinayi ivyo Yehova wali kutipa kuti vitovwire kuzizipizga. Tiwonengeso ivyo tingachita kuti tisangenge chandulo na vinthu ivi.

LUROMBO

3. Chifukwa wuli ntchakukondweska kuti tingalomba kwa Yehova?

³ Yehova watichitira chinthu chinyake chakukondweska icho chingatovwira kuzizipizga. Nangauli ndise ŵakwananga, kweni wali kujura nthowa yakuti tiyowoyeskanenge nayo ndipo wakutitegherezga. (Heb. 4:16) Ghanaghanirani waka, tingalomba kwa Yehova nyengo yiliyose kweniso vyakukhwaskana na nkhani yiliyose iyo takhumba. Iyo wangatipulika mu chiyowoyero chilichose kweniso kulikose uko tingaŵa, nanga ni para tili kwatekha panji tili mu jele. (Yona 2:​1, 2; Mil. 16:​25, 26) Usange tenjerwa chomene mwakuti tikusoŵa na mazgu ghakuti tiyowoye, Yehova wakumanya nipera ivyo tikukhumba kuyowoya. (Rom. 8:​26, 27) Ntchakukondweska chomene kuti tili na mwaŵi wakuti tingalomba kwa Yehova.

4. Kasi tikumanya wuli kuti para tikulomba kuti Yehova watovwire kuzizipizga vikukolerana na khumbo lake?

⁴ Mu Mazgu ghake, Yehova wakutisimikizgira kuti “kanthu kalikose ako tingalomba mwakuyana na khumbo lake, wakutipulika.” (1 Yoh. 5:14) Kasi tingamulomba Yehova kuti watovwire kuzizipizga? Enya. Kuchita nthena kukukolerana na khumbo lake. Kasi tikumanya wuli fundo iyi? Para tazizipizga, tikovwira Yehova kuzgora Satana Dyabulosi uyo wakumunena. (Zinth. 27:11) Padera pa chifukwa ichi, Baibolo likuyowoyaso kuti Yehova ngwakukhumbisiska chomene ‘kulongora nkhongono zake pa awo mitima yawo njakufikapo kwa iyo.’ (2 Mid. 16:9) Ntheura tikwenera kugomezga kuti Yehova wali na nkhongono kweniso khumbo kuti watovwire kuzizipizga.—Yes. 30:18; 41:10; Luka 11:13.

5. Kasi lurombo lukutovwira wuli kuŵa na mtende wa mumtima? (Yesaya 26:3)

⁵ Baibolo likuyowoya kuti para tikulomba kwa Yehova, ‘mtende wa Chiuta uwo ukuluska maghanoghano ghose, uvikilirenge mitima yithu na maghanoghano ghithu.’ (Fil. 4:7) Tikuwonga chomene kuŵa na mwaŵi uwu. Ŵanthu awo ŵakuteŵetera Yehova yayi nawo ŵakusangana na masuzgo, ndipo ŵakuyezga nthowa zakupambanapambana kuti ŵaŵe na mtende wa mumtima. Mwachiyelezgero, ŵanyake ŵakuyezga nthowa yakuti ŵaleke kughanaghanira chilichose kuti ŵaluweko masuzgo ghawo kuti ŵajipulikeko makora. Ndipouli, kuchita nthena nkhwakofya chomene. (Yaniskani na Mateyu 12:​43-45.) Kweni mtende uwo Yehova wakupeleka para talomba kwa iyo, ukuluska mtende uliwose uwo munthu wangawusanga chifukwa cha kuyezga nthowa izi. Para tikulomba kwa Yehova, tikulongora kuti tikumugomezga chomene ndipo wakutipa “mtende wambura kumara.” (Ŵazgani Yesaya 26:3.) Nthowa yimoza iyo wakutipira mtende, nkhutovwira kukumbukira malemba agho ghangatikhozga. Malemba agha ghakutovwira kukumbuka umo Yehova wakutitemwera kweniso kuti wakukhumba chomene kutovwira, ndipo mtima withu ukuŵa mu malo.—Sal. 62:​1, 2.

6. Kasi mungachita wuli kuti lurombo lumovwiraninge chomene? (Wonaniso chithuzi.)

⁶ Ivyo mungachita. Para mwakumana na masuzgo, ‘katundu winu muthwikiskani Yehova’ na kumulomba kuti wamupani mtende. (Sal. 55:22) Mulombaniso vinjeru ivyo mukukhumbikwira mwakuti mumalane na suzgo linu. (Zinth. 2:​10, 11) Kweniso kuluwa yayi kumuwonga Yehova mu malurombo ghinu. (Fil. 4:6) Zuŵa lililose muwonenge umo Yehova wakumovwilirani kuzizipizga masuzgo ghinu, ndipo muwongani. Kuzomerezga yayi kuti masuzgo ghamutondeskani kuwona vitumbiko ivyo muli navyo kale.—Sal. 16:​5, 6.

MAZGU GHA CHIUTA

7. Kasi kusambira Baibolo kungatovwira wuli kuzizipizga?

⁷ Yehova watipa Mazgu ghake kuti ghatovwire kuzizipizga. Mu Baibolo muli mavesi ghanandi agho ghakutisimikizgira kuti Yehova watovwirenge. Mwachiyelezgero, lemba la Mateyu 6:8 likuti: “Awiskemwe ŵakumanya ivyo mukusoŵerwa pambere mundaŵalombe.” Yesu ndiyo wakayowoya mazgu agha, ndipo wakumumanya makora Yehova kuluska waliyose. Ntheura tilije chifukwa cha kukayikira kuti Yehova wakumanya para tikusuzgika kweniso wakumanya ivyo tikukhumbikwira. Baibolo liliso na malemba ghanandi ghakukhozga agho ghangatipa nkhongono zakuzizipizgira.—Sal. 94:19.

8. (a) Yowoyani fundo yimoza ya mu Baibolo iyo yingatovwira kuzizipizga. (b) Kasi ntchivichi chingatovwira kukumbuka fundo za mu Baibolo pa nyengo iyo tikuzikhumba?

⁸ Fundo za mu Baibolo zingatovwira kuzizipizga. Nakuti fundo izi zingatovwira kuti tisankhe makora vinthu. (Zinth. 2:​6, 7) Mwachiyelezgero, Baibolo likutichiska kuti tileke kwenjerwa na vya machero, kweni zuŵa lililose tithembenge waka Yehova. (Mat. 6:34) Usange zuŵa lililose tikuŵazga Baibolo na kughanaghanirapo, chizamuŵa chipusu kukumbuka fundo za mu Malemba panyengo iyo tikuzikhumba.

9. Kasi nkhani za mu Baibolo zikutovwira wuli kugomezga kuti nase Yehova watovwirenge?

⁹ Mu Baibolo muliso nkhani za ŵanthu awo ŵakagomezganga Yehova ndipo iyo wakaŵawovwira. (Heb. 11:​32-34; Yak. 5:17) Para tikughanaghanirapo pa nkhani za nga ni izi, tikukhozga chigomezgo chithu chakuti Yehova ndiyo “ntchiphokwero chithu na nkhongono zithu, movwiri wakugomezgeka mu nyengo ya suzgo.” (Sal. 46:1) Ndipo para tikughanaghanirapo pa umo ŵateŵeti ŵa Yehova ŵakalongolera chipulikano mu nyengo yakale, nase tichiskikenge kuyezga chipulikano chawo kweniso kuzizipizga nga ndiwo.—Yak. 5:​10, 11.

10. Kasi mungachita wuli kuti Mazgu gha Chiuta ghamovwiraninge chomene?

¹⁰ Ivyo mungachita. Muŵazgenge Baibolo zuŵa lililose, ndipo sungani pa malo ghanyake mavesi agho mukuwona kuti ghangamovwirani chomene. Ŵanandi ŵakuŵazga lemba la zuŵa na mulenji, ndipo ŵakuwona kuti ntchakovwira chomene kuchita nthena, chifukwa ŵakuŵa na fundo yakuti ŵangaghanaghanirapo zuŵa lose. Mudumbu munyake zina lake Mariea wakawona kuti fundo iyi njaunenesko apo ŵapapi ŵake wose ŵakasangika na kansa. Kasi ntchivichi chikamovwira kuti wazizipizge apo wakaŵapweleleranga mu myezi iyo ŵakaŵa kuti ŵali pafupi kufwa? Iyo wakuti: “Mulenji uliwose nkhaŵazganga lemba kufuma mu kabuku ka Kusanda Malemba Zuŵa na Zuŵa ndipo nkhaghanaghanirangapo. Kuchita nthena kukanovwira kuti nighanaghanirengepo vyakukhwaskana na Yehova kweniso vinthu vyakukondweska ivyo wakunisambizga, m’malo mwa kughanaghanira waka vya suzgo ilo nkhajumphangamo.”—Sal. 61:2.

ŴAKHRISTU ŴANYITHU

11. Chifukwa wuli ntchakukhozga kumanya kuti ndise tekha yayi tikuzizipizga masuzgo?

¹¹ Yehova watipa ŵabali na ŵadumbu kuti ŵatovwirenge kuzizipizga. Ndipo fundo yakuti “visuzgo vyakuyana waka vikuŵachitikira ŵabali [ŵithu] wose” yikutovwira kumanya kuti tili tekha yayi. (1 Pet. 5:9) Ntheura tikwenera kumanya kuti suzgo lililose ilo tingasangana nalo, ŵabali na ŵadumbu ŵithu nawo ŵali kusanganapo nalo ndipo ŵakazizipizga. Ivi vikulongora kuti nase tingafiska kuzizipizga.—Mil. 14:22.

12. Kasi Ŵakhristu ŵanyithu ŵangatovwira wuli, ndipo ise tingachita vichi kuti tiŵawovwire? (2 Ŵakorinte 1:​3, 4)

¹² Ŵabali na ŵadumbu ŵithu ŵangatovwira kuzizipizga kwizira mu vyakuyowoya na vyakuchita vyawo. Mpositole Paulosi wakawona kuti fundo iyi njaunenesko. Kanandi wakaŵawonganga awo ŵakamovwiranga apo wakaŵa pa jele lapanyumba, ndipo wakaŵazunura na mazina wuwo. Ŵakamupembuzganga, kumukhozga, na kumovwira pa ivyo wakakhumbikwiranga. (Fil. 2:​25, 29, 30; Kol. 4:​10, 11) Nga umo vikaŵira kwa Paulosi, mazuŵa ghano napo ŵabali na ŵadumbu ŵithu ŵangatovwira kuti tizizipizge para tasangana na masuzgo. Ndipo nase tingaŵawovwira para ŵasuzgika.—Ŵazgani 2 Ŵakorinte 1:​3, 4.

13. Kasi ntchivichi chikamovwira mudumbu munyake zina lake Maya kuti wazizipizge?

¹³ Ŵabali na ŵadumbu ŵakamukhozga chomene mudumbu munyake wa ku Russia zina lake Maya. Nyumba yake yikasecheka mu 2020, ndipo pamanyuma ŵakamupa mulandu chifukwa chakuti wakaphalirangako ŵanji vya chipulikano chake. Maya wakuti: “Panyengo iyo nkhasuzgikanga chomene maghanoghano, ndipo ŵabali na ŵadumbu ŵakanimbiranga foni, kunilembera mameseji na makalata, kunisimikizgira kuti ŵakunitemwa. Nangauli nyengo zose nkhamanyanga kuti ŵabali na ŵadumbu ŵakunitemwa ndipo ni mbumba yane, kweni ivyo ŵakanichitira pamanyuma ndivyo vikanikhorweska chomene.”

14. Kasi tingachita wuli kuti Ŵakhristu ŵanyithu ŵatovwire? (Wonaniso chithuzi.)

¹⁴ Ivyo mungachita. Para mwasangana na suzgo, ntchakuzirwa chomene kuyowoya na ŵabali na ŵadumbu na kuchezga nawo. Kuchedwa yayi kupempha wovwiri ku ŵalara. Iwo ŵangaŵa “malo ghakubisamamo mphepo, malo ghakujoŵamo chivula.” (Yes. 32:2) Kumbukaniso kuti Ŵakhristu ŵanyinu nawo ŵakuzizipizga masuzgo. Ntheura kovwira munthu munyake uyo wakukhumbikwira wovwiri, kumovwiraninge kuti muŵe ŵachimwemwe kweniso kuti muzizipizge suzgo linu.—Mil. 20:35.

CHIGOMEZGO CHITHU

15. Kasi chigomezgo chikamovwira wuli Yesu, ndipo chikutovwira wuli ise? (Ŵahebere 12:2)

¹⁵ Yehova watipa chigomezgo chanadi kuti chitovwire kuzizipizga. (Rom. 15:13) Kumbukani kuti Yesu wakazizipizga masuzgo ghakuru chomene chifukwa cha chigomezgo icho wakaŵa nacho. (Ŵazgani Ŵahebere 12:2.) Yesu wakamanya kuti para walutilira kugomezgeka, wawovwirengepo kuti zina la Yehova lithuwuskike. Yesu wakalindilirangaso mwakunweka kukaŵaso na Awiske kweniso nyengo iyo wazamuteŵetera lumoza na ŵa 144,000 mu Ufumu wa kuchanya. Mwakuyana waka, chigomezgo chithu cha kuzakakhala kwamuyirayira mu charu chiphya, chikutovwira kuzizipizga suzgo lililose ilo tingakumana nalo mu charu cha Satana ichi.

16. Kasi chigomezgo chikamovwira wuli mudumbu munyake kuzizipizga, ndipo mukusambirapo vichi pa ivyo wakayowoya?

¹⁶ Wonani umo chigomezgo cha Ufumu chikawovwilira mudumbu munyake ku Russia zina lake Alla, uyo mfumu wake wakajalirika mu jele uku wakulindilira kuti weruzgike. Ivi vikati vyachitika, Alla wakati: “Kulomba vyakukhwaskana na chigomezgo chithu cha munthazi na kughanaghanirapo, kwanovwira kuti nilutilire kuzizipizga. Nkhumanya kuti vinthu viwemi vikwiza munthazi. Yehova wathereskenge ŵalwani ŵake wose, ndipo wazamutitumbika.”

17. Kasi tingalongora wuli kuti tikuzirwiska chigomezgo chithu cha munthazi? (Wonaniso chithuzi.)

¹⁷ Ivyo mungachita. Mupaturenge nyengo ya kughanaghanirapo vyakukhwaskana na vinthu viwemi ivyo Yehova wamulayizgani. Mujiwonenge kuti muli mu charu chiphya cha Chiuta na kuwona vitumbiko ivyo wazamumupani. Ndipo suzgo lililose ilo mukusangana nalo sono muliwonenge kuti ‘ndakanyengo na lakupepuka’ para mungaliyaniska na umoyo wamuyirayira mu paradiso. (2 Kor. 4:17) Kweniso chitani vyose ivyo mungafiska kuti muphalirengeko ŵanji vya chipulikano chinu. Ghanaghanirani umo umoyo uliri wakusuzga ku ŵanthu awo ŵakuteŵetera Yehova yayi. Nawo ŵakusangana na masuzgo ghanandi, kweni ŵakumanya yayi vinthu viwemi ivyo Chiuta walayizga. Mungaŵawovwira kuti ŵanweke na chigomezgo chithu cha Ufumu nanga mungadumbiskana nawo mwakudumura.

18. Chifukwa wuli tikwenera kugomezga ivyo Yehova walayizga?

¹⁸ Yobu wakati wafiska kuzizipizga masuzgo ghanandi, wakayowoya kwa Yehova kuti: “Sono namanya kuti mungachita vinthu vyose, nakuti chilichose icho mungaghanaghana, palije icho mungatondeka kuchita.” (Yobu 42:2) Nga umo Yobu wakamanyira, palije icho chingamutondeska Yehova kufiska khumbo lake. Nase fundo iyi yingatovwira kuti tizizipizge. Kuti tipulikiske makora, tiyelezgere na mwanakazi uyo walwara kwanyengo yitali, ndipo wagongowa chomene chifukwa wakumana na madokotala ghanandi kweni wakuchira yayi. Kweni pamanyuma wasanga dokotala muwemi uyo wamuphalira icho chikupangiska kuti walwarenge ndipo wamulongosolera umo wamovwilirenge. Kasi mukughanaghana kuti wangajipulika wuli? Sono wangajipulika makora nangauli patolenge nyengo kuti wachire. Wangazizipizga suzgo lake, chifukwa sono wali na chigomezgo kuti wachirenge. Mwakuyana waka, chigomezgo chithu chakuti kunthazi uku tizamukhala mu Paradiso kwamuyirayira chikutovwira kuzizipizga.

19. Kasi ni vinthu wuli ivyo vingatovwira kuzizipizga?

¹⁹ Nga umo tawonera mu nkhani iyi, Yehova wakutovwira kuzizipizga masuzgo ghithu kwizira mu lurombo, Mazgu ghake, Ŵakhristu ŵanyithu, kweniso chigomezgo chithu cha munthazi. Usange tingavigwiliskira ntchito mwakukwana vinthu ivi, Yehova watovwirenge kuzizipizga suzgo lililose ilo tingasangana nalo, m’paka apo wazamumazgira charu chiheni cha Satana ichi.—Fil. 4:13.