Tili Tekha Yayi

1-2. (a) Chifukwa wuli tingaŵa na chigomezgo chose kuti tikuŵa tekha yayi para tikusangana na masuzgo? (b) Kasi tidumbiskanenge vichi mu nkhani iyi?

USANGE tasangana na masuzgo ghakuru, tingamba kujiwona nga tili mu nkhorongo yakofya ndipo tili tekha. Kweni timanye kuti tili tekha yayi. Adada ŵithu ŵakuchanya ŵakuwona masuzgo agho tikusangana nagho, ndipo ŵakutilayizga kuti ŵaŵenge nase. Iwo ŵakutisimikizgira kuti ‘ŵatovwirenge.’—Yes. 41:10.

² Mu nkhani iyi tiwonenge umo Yehova wakutovwilira (1) pakutilongozga, (2) pakutipa ivyo tikukhumbikwira, (3) pakutivikilira, kweniso (4) pakutisanguluska. Iyo wakutisimikizgira kuti nanga tingasangana na masuzgo wuli pa umoyo withu, watiluwenge yayi kweniso watilekengepo yayi. Ntheura timanye kuti tili tekha yayi.

YEHOVA WAKUTILONGOZGA

3-4. Kasi Yehova wakutilongozga wuli? (Salimo 48:14)

³ Ŵazgani Salimo 48:14. Yehova wakukhazga kuti tijilongozgenge tekha yayi. Kasi wakulongozga wuli ŵasopi ŵake ŵakugomezgeka mazuŵa ghano? Nthowa yimoza nkhwizira mu Baibolo. (Sal. 119:105) Kwizira mu Mazgu ghake, Yehova wakutovwira kuti tisankhenge makora vinthu kweniso tiŵe na mikhaliro iyo yingatovwira kuti tiŵe ŵakukondwa sono kweniso kuzakasanga umoyo wamuyirayira munthazi.a Mwachiyelezgero, wakutisambizga kuti tileke kusunga vyakusingo, tiŵe ŵanenesko mu vyose, kweniso tiŵatemwenge ŵanji kufumira pasi pa mtima. (Sal. 37:8; Heb. 13:18; 1 Pet. 1:22) Para tikuŵa na mikhaliro yiwemi iyi, tikuŵa mupapi muwemi, mfumu panji muwoli muwemi, kweniso mubwezi muwemi.

⁴ Kweniso Yehova wakazomerezga kuti nkhani za ŵanthu awo ŵakasangana na masuzgo ghakuyana na ghithu kweniso umo ŵakajipulikiranga, zilembeke mu Mazgu ghake. (1 Kor. 10:13; Yak. 5:17) Para tikuŵazga nkhani izi na kulondezga ivyo tikusambirapo, tikusanga chandulo munthowa ziŵiri. Chakwamba, tikumanya kuti ndise pera yayi, ŵanthu ŵanyake nawo ŵakakumanapo na masuzgo ghakuyana waka ndipo ŵakafiska kuzizipizga. (1 Pet. 5:9) Chachiŵiri, tikumanya umo tingazizipizgira masuzgo ghithu.—Rom. 15:4.

5. Kasi Yehova wakugwiliskira ntchito anjani kuti watilongozge apo tili pa nthowa yakuluta ku umoyo?

⁵ Yehova wakugwiliskiraso ntchito Ŵakhristu ŵanyithu kuti ŵatilongozge.b Mwachiyelezgero, ŵalaŵiliri ŵadera nyengo na nyengo ŵakwendera mipingo kuti ŵatikhozge. Nkhani zawo zikutovwira kuti tilutilire kuŵa na chipulikano chakukhora kweniso kulutilira kuŵa ŵakukolerana. (Mil. 15:40–16:5) Ŵalara ŵa mpingo nawo ŵakuyezgayezga kuti ŵawovwirenge ŵapharazgi kuti ŵaŵe paubwezi wakukhora na Yehova. (1 Pet. 5:​2, 3) Ŵapapi ŵakovwira ŵana ŵawo mwauzimu kuti ŵasankhenge makora vinthu na kuŵa na nkharo yiwemi. (Zinth. 22:6) Ndipo ŵanakazi ŵakukhwima mwauzimu ŵakovwira ŵadumbu ŵachiwukirano kwizira mu chiyelezgero chawo chiwemi, kuŵapa ulongozgi wakovwira, na kuŵakhozga.—Tito 2:​3-5.

6. Kasi tikwenera kuchita wuli kuti tisange chandulo na ulongozgi wa Yehova?

⁶ Yehova wachitapo chigaŵa chake pakutipa ulongozgi uwo tikukhumbikwira. Kasi tingalongora wuli kuti tikuwongera ivyo watichitira? Lemba la Zintharika 3:​5, 6 likuti: “Uthembenge Yehova na mtima wako wose, ungagomezganga pa kapulikiskiro kako yayi.” Para tichitenge nthena, iyo ‘watinyoloskerenge nthowa zithu,’ icho chikung’anamura kuti watovwirenge kugega masuzgo ghanandi kweniso watovwirenge kuŵa na umoyo wakukondwa. Tikumuwonga chomene Yehova pakutipa ulongozgi wachitemwa uwo ukutovwira chomene.—Sal. 32:8.

YEHOVA WAKUTIPA IVYO TIKUKHUMBIKWIRA

7. Kasi ni nthowa wuli zinyake izo Yehova wakutipira vyakukhumbikwa? (Ŵafilipi 4:19)

⁷ Ŵazgani Ŵafilipi 4:19. Padera pa kutilongozga mwauzimu, Yehova wakutitumbika apo tikuyezgayezga kuti tisange chakurya, vyakuvwara, na malo ghakukhala. (Mat. 6:33; 2 Tes. 3:12) Nangauli ntchakawiro kufipa mtima na vyakukhumbikwa pa umoyo, kweni Yehova wakutichiska kuti tingenjerwanga mwakujumphizga yayi. (Mat. 6:25) Chifukwa wuli? Chifukwa ntchakuti Adada ŵithu ŵazamuŵalekapo yayi ŵasopi ŵawo ŵakugomezgeka pa nyengo iyo ŵakukhumbikwira wovwiri. (Mat. 6:8; Heb. 13:5) Tingaŵagomezga para ŵakuyowoya kuti ŵatipenge ivyo tikukhumbikwira.

8. Kasi Yehova wakamuchitira vichi Davide?

⁸ Ghanaghanirani umo Yehova wakawovwilira Davide. Mu vyaka ivyo Davide wakakhalanga umoyo wakuchimbirachimbira, Yehova wakamupa iyo na ŵanalume ŵake ivyo ŵakakhumbikwiranga. Apo wakaghanaghanirangapo umo Yehova wakamovwilira, Davide wakalemba kuti: “Nkhaŵa mwana, sono nili muchekuru, kweni nindawonepo kuti murunji wasidika, panji ŵana ŵake kupempheska chingwa.” (Sal. 37:25) Tikukayika yayi kuti namwe pa umoyo winu, mwawona umo Yehova wakovwilira ŵateŵeti ŵake ŵakugomezgeka.

9. Kasi mazuŵa ghano Yehova wakuŵapa wuli vyakukhumbikwa ŵanthu ŵake mu nyengo ya masoka? (Wonaniso vithuzi.)

⁹ Yehova wakovwiraso ŵanthu ŵake nanga mphanyengo ya masoka ghachilengiwa. Mwachiyelezgero, njara yikati yawa mu nyengo ya Ŵakhristu ŵakwambilira, Ŵakhristu ŵakufuma mu vigaŵa vyakupambanapambana ŵakatumizga vyakukhumbikwa ku ŵabali na ŵadumbu awo ŵakakhumbikwiranga wovwiri. (Mil. 11:​27-30; Rom. 15:​25, 26) Mazuŵa ghano napo, ŵanthu ŵa Chiuta ŵakulongora mzimu wakuyana waka. Para soka lachitika, Yehova wakuchiska ŵanthu ŵake kuti ŵapeleke vinthu vyakukhumbikwa nga ni chakurya, maji, vyakuvwara, kweniso munkhwala ku ŵabali awo ŵali mu vigaŵa ivyo vyakhwaskika. Ŵabali awo ŵakuchitako milimo yakuzenga ŵakunozga nyumba zawo kweniso Nyumba za Ufumu izo zanangika. Ndipo ŵateŵeti ŵa Yehova ŵakuchitapo kanthu mwaluŵiro kuti ŵakapembuzge na kukhozga mwauzimu awo ŵakhwaskika na soka ili.c

10-11. Kasi mukusambirako vichi ku ivyo vikachitikira Borys?

¹⁰ Yehova wakupelekaso vyakukhumbikwa nanga nkhu ŵanthu awo ŵakumusopa yayi. Mwakuyana waka, nase tikupenjerezga mipata yakulongolera lusungu ŵanthu awo tikupambana ivyo tikugomezga. (Gal. 6:10) Kanandi ivi vikovwiraso kuti tichitire ukaboni. Wonani ivyo vikachitikira Borys, msambizgi mulara pa sukulu yinyake, uyo wakukhala ku Ukraine. Nangauli Borys ni Kaboni wa Yehova yayi, kweni nyengo zose wakachitanga vinthu mwalusungu na ŵana ŵa sukulu awo Mbakaboni kweniso wakachindikanga vigomezgo vyawo. Apo Borys wakachimbira uko wakakhalanga chifukwa cha nkhondo na kuluta ku chigaŵa chinyake, ŵabali ŵithu ŵakamovwira. Pamanyuma, Borys wakiza ku Chikumbusko cha nyifwa ya Khristu. Wati waghanaghanirapo ivyo ŵabali ŵakamuchitira, Borys wakati: “Ŵakaboni ŵakanilongora lusungu na kunipwelelera makora chomene. Nkhuŵawonga chomene Ŵakaboni ŵa Yehova.”

¹¹ Nase tingaŵayezga Adada ŵithu ŵakuchanya pakulongora chitemwa awo ŵakukhumbikwira wovwiri, kwali Mbakaboni ŵanyithu panji yayi. (Luka 6:​31, 36) Tikugomezga kuti chitemwa icho tikuŵalongora chingawovwira kuti nawo ŵaŵe ŵasambiri ŵa Khristu. (1 Pet. 2:12) Kweni mulimose umo vingaŵira, tiŵenge ŵakukondwa chomene chifukwa cha kupeleka.—Mil. 20:35.

YEHOVA WAKUTIVIKILIRA

12. Kasi Yehova wakulayizga kuti waŵavikilirenge wuli ŵanthu ŵake nga ni gulu? (Salimo 91:​1, 2, 14)

¹² Ŵazgani Salimo 91:​1, 2, 14. Mazuŵa ghano, Yehova wakutilayizga kuti wativikilirenge mwauzimu. Wazomerezgenge yayi kuti Satana wamazge kusopa kwaunenesko. (Yoh. 17:15) Ndipo para “suzgo yikuru” yazakamba, tingaŵa na chigomezgo chose kuti Yehova wazamufiska layizgo lake la kuvikilira ŵanthu ŵake mwauzimu na mwakuthupi wuwo.—Chivu. 7:​9, 14.

13. Kasi Yehova wakuvikilira wuli waliyose payekha?

¹³ Kasi Yehova wakutivikilira wuli waliyose payekha? Kwizira mu Baibolo, Yehova wakutovwira kuti timanye chiwemi na chiheni. (Heb. 5:14) Para tikulondezga fundo za mu Baibolo pa umoyo withu, tikujivikilira mwauzimu na mwakuthupi wuwo. (Sal. 91:4) Kweniso Yehova wakutivikilira kwizira mu mpingo. (Yes. 32:​1, 2) Para nyengo zose tikuŵa na ŵanthu awo ŵakutemwa Yehova na kulondezga fundo zake, tikukhozgeka kweniso kovwirika kugega vinthu viheni.—Zinth. 13:20.

14. (a) Chifukwa wuli Chiuta wakuzomerezga kuti tisanganenge na masuzgo? (b) Kasi lemba la Salimo 9:10 likutisimikizgira vichi? (Wonaniso mazgu ghamusi.)

¹⁴ Mu nyengo yakale Yehova wakaŵavikiliranga ŵateŵeti ŵake ku vinthu vinyake ivyo vingaŵapweteka. Ndipouli, ni nyengo zose yayi apo wakachitanga nthena. Nyengo zinyake “vyakuchitika vyamabuchi” vikutiwira. (Muph. 9:11) Kweniso kwamba kale Yehova wazomerezga kuti ŵateŵeti ŵake ŵasangane na nthambuzgo nanga ni nyifwa, kuti walongore kuti Satana ni mutesi. (Yobu 2:​4-6; Mat. 23:34) Ndimoso viliri na mazuŵa ghano. Nangauli Yehova wangawuskapo yayi masuzgo ghithu, kweni tili na chigomezgo chose kuti wangaŵasida yayi awo ŵakumutemwa.d—Sal. 9:10.

YEHOVA WAKUTISANGULUSKA

15. Kasi tikusanguluskika wuli kwizira mu lurombo, Mazgu gha Chiuta, na Ŵakhristu ŵanyithu? (2 Ŵakorinte 1:​3, 4)

¹⁵ Ŵazgani 2 Ŵakorinte 1:​3, 4. Nyengo zinyake tikuŵa na chitima, tikwenjerwa, panji tikusangana na masuzgo ghanyake. Panji pasono mukusangana na suzgo linyake ilo likumupangiskani kujipulika kuti muli mwekha. Kasi walipo munyake uyo wakumupulikiskani umo mukujipulikira? Yehova wakumupulikiskani. Vikumuŵinya waka yayi, kweni ‘wakutisanguluskaso mu suzgo yithu yose.’ Munthowa wuli? Para tikumuŵeyelera Yehova mu lurombo, iyo wakutipa “mtende [wake] uwo ukuluska maghanoghano ghose.” (Fil. 4:​6, 7) Tikusanguluskikaso para tikuŵazga mazgu gha Yehova mu Baibolo. Kwizira mu Baibolo, Yehova wakutiphalira umo wakutitemwera, wakutisambizga umo tingaŵira ŵavinjeru, kweniso wakutipa chigomezgo chiwemi. Kweniso pa maungano gha mpingo tikusanguluskika na ŵabali na ŵadumbu kweniso fundo za mu Baibolo izo tikusambira.

16. Kasi mukusambirako vichi ku ivyo vikachitikira Nathan na Priscilla?

¹⁶ Kuti tipulikiske makora umo Yehova wakutisanguluskira na kutikhozgera kwizira mu Mazgu ghake, wonani ivyo vikachitikira Nathan na Priscilla, awo ŵakukhala ku United States. Vyaka vinandi ivyo vyajumpha, iwo ŵakasamira ku chigaŵa chinyake icho kukakhumbikwanga ŵapharazgi ŵanandi ŵa Ufumu. Nathan wakuti: “Tikagomezganga kuti Yehova watitumbikenge pa ivyo tikachita.” Ndipouli, ŵakati ŵafika ku chigaŵa icho ŵakasamira, ŵakamba kulwara kweniso ŵakasangana na suzgo la vyachuma. Mbumba iyi pamanyuma yikawelera waka kukwawo, ndipo yikalutilira kusangana na suzgo la vyachuma. Nathan wakuti: “Nkhajifumbanga chifukwa icho Chiuta wandatitumbikire. Nkhafika na pakughanaghana kuti panji nachita chinthu chinyake chiheni.” Ndipouli, nyengo yati yajumphapo, Nathan na Priscilla ŵakawamo kuti Chiuta wakaŵasida yayi panyengo yakusuzga iyi. Nathan wakuti: “Pa nyengo yakusuzga iyi, Baibolo ndilo likaŵa nga ni mubwezi withu wavinjeru uyo wakatisanguluskanga na kutilongozga. Kughanaghanira umo Yehova watovwilira kuzizipizga m’malo mwa kuŵika waka mtima pa suzgo yithu, vikatovwira kukhozga chipulikano chithu kuti Yehova wazamutovwiraso munthazi.”

17. Kasi mudumbu munyake zina lake Helga wakasanguluskika wuli? (Wonaniso chithuzi.)

¹⁷ Ŵabali na ŵadumbu ŵithu nawo ŵangatisanguluska. Kasi ŵangatisanguluska wuli? Wonani chiyelezgero cha Helga, uyo wakukhala ku Hungary. Kwa vyaka vinandi, wakasangana na masuzgo agho ghakamupangiska kwamba kusuzgika chomene maghanoghano na kujiwona kuti ngwambura kuzirwa. Kweni para wakughanaghanira uko wafuma, wakuwona kuti Yehova wakamusanguluska kwizira mu mpingo. Iyo wakalemba kuti: “Yehova nyengo zose wakanovwiranga apo wakawona kuti nkhongono zane zalopwa chifukwa cha ntchito iyo nkhagwiranga, kulwazga mwana wane, kweniso chifukwa cha masuzgo ghanyake. Mu vyaka vyose 30 ivyo vyajumpha, palije nanga ni zuŵa limoza ilo Yehova wakatondeka kufiska layizgo lake lakuti wanisanguluskenge. Kanandi wakunisanguluska kwizira mu ŵabali na ŵadumbu awo ŵakuniphalira mazgu ghalusungu, na ghakukhozga. Ndipo kanandi ŵabali na ŵadumbu ŵakunitumiranga mameseji, kadi, panji kuniwonga para nkhukhumbikwira chomene kukhozgeka.”

18. Kasi tingasanguluska wuli ŵanji?

¹⁸ Nase tili na mwaŵi wakuyezga Chiuta withu pa kusanguluska ŵanji. Kasi tingachita wuli nthena? Tingaŵategherezga mwakuzikira, kuyowoya nawo mwalusungu, na kuŵawovwira munthowa zinyake. (Zinth. 3:27) Tikwenera kufwilirapo kupembuzga wose awo ŵakusangana na masuzgo, kusazgapo na awo ŵakuleka kuteŵetera Chiuta. Usange ŵanyithu ŵaferwa, ŵalwara, panji ŵakwenjerwa, tikwenera kuŵayendera, kuŵategherezga, na kuŵaphalirako fundo zakukhozga za mu Baibolo. Para tikuyezga Yehova, “Chiuta wa chisangulusko chose,” padera pakuŵawovwira Ŵakhristu ŵanyithu kuti ŵazizipizge, tiwovwirengeso awo mbambura kugomezga kuti ŵambe kuteŵetera Chiuta.—Mat. 5:16.

NYENGO ZOSE YEHOVA WAŴENGEPO KUTOVWIRA

19. Kasi Yehova wakutichitira vichi, ndipo tingamuyezga wuli?

¹⁹ Yehova wakuŵaghanaghanira ŵanthu wose awo ŵakumutemwa. Iyo wakutisida yayi para tasangana na masuzgo. Nga umo mupapi wachitemwa wakupwelelera mwana wake, Yehova nayo wakuŵapwelelera ŵateŵeti ŵake ŵakugomezgeka. Ndipo wakutilongozga, kutipa ivyo tikukhumbikwira, kutivikilira, na kutisanguluska. Tikuyezga Adada ŵithu ŵakuchanya para tikovwira na kukhozga ŵanji para ŵasangana na masuzgo. Nangauli tingasangana na masuzgo, kweni tili na chigomezgo chose kuti Yehova wali nase. Nakuti iyo watilayizga kuti: “Ungawopanga yayi, pakuti nili nawe.” (Yes. 41:10) Ili ni layizgo lakukondweska chomene! Likutipa chigomezgo chakuti tili tekha yayi, Yehova waŵenge nase nyengo zose.