NKHANI YAKUSAMBIRA 21
SUMU 107 Chiuta Ntchakuwonerapo cha Chitemwa
Umo Mungachitira Kuti Musange Munyinu Wakwenelera wa mu Nthengwa
“Ni njani wangasanga mwanakazi muwemi? Mtengo wake ukuluska malibwe gha korali.”—ZINTH. 31:10.
FUNDO YIKURU
Tiwonenge fundo za mu Baibolo izo zingawovwira uyo wakukhumba kusanga munyake wa mu nthengwa kweniso umo ŵanji mu mpingo ŵangawovwilira awo ŵakukhumba kunjira mu nthengwa.
1-2. (a) Kasi ni fundo wuli izo Ŵakhristu awo ŵandanjire mu nthengwa ŵakwenera kughanaghanirapo pambere ŵandambe chibwezi? (b) Kasi mazgu ghakuti “chibwezi” ghakung’anamurachi? (Wonani “Mazgu Ghalongosoreka.”)
KASI mukukhumba kunjira mu nthengwa? Nangauli nthengwa ndiyo yikupangiska munthu kuŵa wakukondwa yayi, kweni Ŵakhristu ŵanandi awo ŵandanjire mu nthengwa, kwali mbachinyamata panji ŵalara, ŵakukhumba kusanga munyawo wa mu nthengwa. Ndipouli, pambere mundambe chibwezi mukwenera kuŵa paubwezi wakukhora na Yehova, mujimanyenge makora, kweniso mukwenera kuŵa ŵakunozgeka pa nkhani ya vyachuma.a (1 Kor. 7:36) Para mwanozgekera makora, vizamumovwirani kuti muŵe ŵakukondwa mu nthengwa yinu.
2 Ndipouli, ntchipusu yayi kusanga munthu wakwenelera wakuti mutorane nayo. (Zinth. 31:10) Nanga vingaŵa kuti mwamusanga munthu uyo mukukhumba kumumanya makora, kweni ntchipusu yayi kuti mumusonge na kwamba nayo chibwezi.b Mu nkhani iyi tidumbiskanenge ivyo vingawovwira Ŵakhristu awo ŵandanjire mu nthengwa kusanga munthu wakwenelera na kwamba nayo chibwezi. Tiwonengeso umo ŵanji mu mpingo ŵangawovwilira awo ŵakukhumba kunjira mu nthengwa.
IVYO VINGAMOVWIRANI KUSANGA MUNTHU WAKWENELERA WA MU NTHENGWA
3. Kasi ni fundo wuli izo Mkhristu uyo wandanjire mu nthengwa wakwenera kughanaghanirapo para wakupenja munyake wakutorana nayo?
3 Para mukukhumba kunjira mu nthengwa, ntchakuzirwa chomene kumanya dankha mikhaliro iyo mukukhumba mwa munthu uyo mukumudokera, pambere mundambe chibwezi. Ivi vingamovwirani kuti muleke kutaya munthu wakwenelera, na kwamba chibwezi na munthu uyo ngwambura kwenelera kwa imwe. Ndipouli, waliyose uyo mukukhumba kutorana nayo wakwenera kuŵa Mkhristu wakubatizika. (1 Kor. 7:39) Kweni ni waliyose yayi uyo ngwakubatizika wangaŵa wakwenelera kutorana nayo. Ntheura mungajifumba kuti: ‘Kasi nili na vilato wuli pa umoyo wane? Kasi ni mikhaliro wuli yakuzirwa iyo nkhukhumba munthu wakutorana nayo waŵe nayo? Kasi ivyo nkhukhazga mwa munthu uyo nkhukhumba kutorana nayo ni vyakukhumbikwa nadi?’
4. Kasi ŵanyake ŵakusazgamo vichi mu malurombo ghawo para ŵakupenja munthu wakuti ŵatorane nayo?
4 Para mukukhumba kunjira mu nthengwa, tikukayika yayi kuti muli kuyilombera nkhani iyi. (Fil. 4:6) Mbunenesko kuti Yehova ndiyo wakutisankhira munthu wakutorana nayo yayi. Kweni wakuŵikako mahara ku ivyo mukukhumba na umo mukujipulikira, ndipo ngwakunozgeka kumovwirani apo mukupenja munthu wakwenelera. Ntheura lutilirani kumuphalira ivyo mukukhumba kweniso umo mukujipulikira. (Sal. 62:8) Lombani kuti wamupani vinjeru kweniso kuti muzikirenge. (Yak. 1:5) John,c mubali wambura kutora wa ku United States, wakulongosora ivyo wakusazgamo mu malurombo ghake: “Nkhumuphalira Yehova mikhaliro iyo nkhukhumba kuti munthu wakutorana nayo waŵe nayo. Nkhulomba kuti wanovwire kusanga munthu wakwenelera. Nkhumupemphaso Yehova kuti wanovwire kuŵa na mikhaliro yiwemi iyo yingazakanovwira kuzakaŵa mfumu muwemi.” Tanya, mudumbu wa ku Sri Lanka, wakuti: “Apo nkhupenja munthu wakwenelera wakutorana nayo, nkhulomba Yehova kuti wanovwire kuŵa wakugomezgeka kwa iyo, kuŵa na maghanoghano ghakwenelera, kweniso wakukondwa.” Nanga vingaŵa kuti pasono mundamusange munthu wakwenelera wakutorana nayo, Yehova wakulayizga kuti walutilirenge kumupwelelerani mwakuthupi kweniso kumovwirani kuti muleke kusuzgika maghanoghano.—Sal. 55:22.
5. Kasi Ŵakhristu awo ŵandanjire mu nthengwa ŵali na mipata wuli iyo yingaŵawovwira kusanga munthu uyo wakutemwa Yehova? (1 Ŵakorinte 15:58) (Wonaniso chithuzi.)
5 Baibolo likutichiska kuti tiŵenge na “na vyakuchita vinandi mu mulimo wa Fumu.” (Ŵazgani 1 Ŵakorinte 15:58.) Apo mukutangwanika chomene kuteŵetera Yehova na kuŵa na nyengo yakuchezga na ŵabali na ŵadumbu ŵakupambanapambana, padera pa kusangwa na ntchezgo zakukhozga, muŵengeso na mwaŵi wakusangana na ŵanyinu awo nawo ŵandanjire mu nthengwa, ndipo ŵakuŵikapo mtima kuteŵetera Yehova. Ndipo para mukuchita vyose ivyo mungafiska kuti mukondweske Yehova, muŵenge ŵakukondwa zanadi.
Para mukutangwanika chomene kuteŵetera Yehova na kuŵa na nyengo yakuchezga na ŵabali na ŵadumbu ŵakupambanapambana, muŵenge na mwaŵi wakusangana na ŵanyinu awo nawo ŵakukhumba kunjira mu nthengwa (Wonani ndime 5)
6. Kasi Ŵakhristu awo ŵandanjire mu nthengwa ŵakwenera kukumbuka vichi apo ŵakupenja munthu wakutorana nayo?
6 Ndipouli, muŵe maso kuti muleke kuwona kuti kupenja munyinu wa mu nthengwa ndicho chiŵe chinthu chakuzirwa chomene pa umoyo winu. (Fil. 1:10) Kuŵa wakukondwa zanadi vikuthemba pa kunjira mu nthengwa panji kuleka kunjira mu nthengwa yayi, kweni kuŵa paubwezi wakukhora na Yehova. (Mat. 5:3) Ndipo apo muchali mwekha, mungaŵa na wanangwa panji kuti mwaŵi ukuru wakusazgirako uteŵeti winu. (1 Kor. 7:32, 33) Gwiliskirani ntchito makora nyengo iyi. Jessica, mudumbu wa ku United States uyo wakatengwa apo wakaŵa na vyaka pafupifupi 40, wakuti, “Nkhatangwanikanga chomene na uteŵeti, ndipo ivi vikanovwira kuŵa wakukondwa nangauli nkhakhumbanga chomene kunjira mu nthengwa.”
ŴANI NA NYENGO YAKUKWANA YAKUMANYIRA MAKORA UYO MUKUMUDOKERA
7. Chifukwa wuli ntchamahara kumusanda dankha kwakanyengo munthu uyo mukumudokera pambere mundamusonge? (Zintharika 13:16)
7 Wuli usange mukughanaghanira munthu munyake kuti wangaŵa wakwenelera kutorana nayo? Kasi mukwenera kuponya mazgu mwaluŵiro? Baibolo likuti munthu wakuchenjera wakughanaghanirapo dankha pambere wandachitepo kanthu. (Ŵazgani Zintharika 13:16.) Ntheura ntchamahara kumusanda dankha kwakanyengo kwambura iyo kumanya pambere mundamusonge. Aschwin wa ku Netherlands wakuti, “Khumbo lingiza mwaluŵiro, na kumaraso mwaluŵiro. Ntheura para mwajipa nyengo yakukwana yakusandira munthu munyake, muzamugega kwamba chibwezi chifukwa cha kuyegheka waka na umo mukujipulikira pa nyengo iyo.” Kweniso panyengo iyo mukusandira munthu munyake, mungasanga kuti munthu uyo ngwakwenelera yayi.
8. Kasi uyo wandanjire mu nthengwa wangamusanda wuli munthu uyo wakumudokera? (Wonaniso chithuzi.)
8 Kasi mungachita wuli kuti mumusande makora munthu uyo mukumudokera kwambura mwenecho kumanya? Pa maungano gha mpingo panji pa nyengo ya ntchezgo, mungamanyako vinyake vyakukhwaskana na umo umoyo wake wauzimu uliri, wunthu wake, na nkharo yake. Kasi ŵabwezi ŵake mbanjani, ndipo iyo wakutemwa kuyowoya vichi? (Luka 6:45) Kasi vilato vyake vikuyana na vinu? Mungafumba ŵalara mu mpingo wake panji Ŵakhristu ŵanyake ŵakukhwima awo ŵakumumanya makora. (Zinth. 20:18) Mungaŵafumba vya lumbiri lwake na nkharo yake. (Rute 2:11) Apo mukumusanda munthu uyu, lekani kumupangiska kuti waleke kufwatuka. Chindikani maghanoghano ghake, ndipo gegani kuŵa na mtima wakukhumba kumanya chilichose icho wakuchita.
Pambere mundamusonge munthu uyo mukumudokera, ntchamahara kumusanda dankha kwakanyengo kwambura iyo kumanya (Wonani ndime 7-8)
9. Pambere mundamusonge munthu uyo mukumudokera, kasi mukwenera kukhorwa dankha na vichi?
9 Kasi mukwenera kumusanda kwa nyengo yitali wuli pambere mundamusonge? Para mungachimbilira kumusonga, wangawona nga mukughanaghanirapo dankha yayi pambere mundasankhe chakuchita. (Zinth. 29:20) Kweniso para mukutora nyengo yitali chomene uku wamanya kuti mukumudokera, mbwenu wawonenge kuti vikumusuzgani kusankha chakuchita. (Muph. 11:4) Kumbukani kuti pambere mundasonge munthu munyake, mukwenera kukhorwa nayo dankha yayi kuti ndiyo muzamutorana nayo. Kweni mukwenera kukhorwa dankha kuti ndimwe nadi ŵakunozgeka kunjira mu nthengwa ndipo munthu uyo mukumudokera wangaŵa wakwenelera kwa imwe.
10. Kasi mukwenera kuchita wuli para mwamanya kuti munthu munyake wakumudokerani kweni imwe mundamukhumbe?
10 Kasi mukwenera kuchita wuli usange mwamanya kuti munthu munyake wamba kumudokerani? Usange imwe mundamukhumbe munthu uyo, mulongorani pakweru kwizira mu vyakuchita vinu. Lungaŵa lusungu yayi kuchita vinthu vyakulongora nga namwe mukumukhumba uku pasi pa mtima mukumanya kuti ndimo viliri yayi.—1 Kor. 10:24; Efe. 4:25.
11. Mu vyaru ivyo ŵanthu ŵakuchita kupenjerana munthu wakutorana nayo, kasi awo ŵakovwirapo ŵakwenera kukumbuka vichi?
11 Mu vyaru vinyake, ŵapapi panji ŵanthu ŵanyake ŵalara ndiwo ŵakusankhira ŵachibali ŵawo munthu wakutorana nayo. Apo mu vyaru vinyake, ŵamumbumba panji ŵabwezi ndiwo ŵakusanga munthu uyo ŵakuwona kuti ngwakwenelera, ndipo pamanyuma ŵakunozga vyakuti mwanalume na mwanakazi ŵasangane kuti ŵawone usange ŵangamba chibwezi. Usange mwapempheka kuti musangire munthu munyake wakutorana nayo, mukwenera kumanya dankha ivyo wose ŵaŵiri ŵakukhumba. Usange mwamusanga, yezgayezgani kumanya wunthu wake, nkharo, ndipo chakuluska vyose umoyo wake wauzimu. Kuŵa paubwezi wakukhora na Yehova ndicho ntchakuzirwa chomene kuluska ndalama, masambiro, panji kumanyikwa. Ndipouli, kumbukani kuti ŵenecho ndiwo ŵakwenera kupanga chakusankha usange ŵatoranenge panji yayi.—Gal. 6:5.
UMO MUNGAMBIRA CHIBWEZI
12. Usange mukukhumba kuŵa pa chibwezi na munthu munyake, kasi mungamuphalira wuli?
12 Usange mukukhumba kuŵa pa chibwezi na munthu munyake, kasi mungamuphalira wuli?d Munganozga vyakuti mudumbiskane nayo maso na maso, panji pa foni. Mulongosolerani ivyo mukukhumba mwakupulikikwa makora. (1 Kor. 14:9) Usange ntchakukhumbikwa, mupani nyengo yakuti wakaghanaghanirepo. (Zinth. 15:28) Ndipo usange wamukanani, chindikani maghanoghano ghake.
13. Kasi mungachita wuli usange munyake wamuphalirani kuti wakumukhumbani? (Ŵakolose 4:6)
13 Wuli usange munthu munyake wamuphalirani kuti wakumukhumbani? Ntchakuwonekerathu kuti wakachita chikanga kuti wamuphalirani, ntheura mukwenera kuzgora mwalusungu kweniso mwantchindi. (Ŵazgani Ŵakolose 4:6.) Muphalirani usange mukukhumba nyengo yakuti mukaghanaghanirepo dankha. Ndipouli, yezgani kuzgora mwaluŵiro. (Zinth. 13:12) Usange mukumukhumba yayi, muphalirani waka unenesko kweni muyowoye mwalusungu. Wonani umo Hans, mubali wa ku Austria, wakazgolera apo mudumbu munyake wakamukhumbanga: “Nkhamuzgora mwalusungu kweni mwakupulikikwa makora. Nkhamuphalira nyengo yeneyiyo chifukwa nkhakhumba yayi kumupa kachigomezgo kautesi. Kweniso kufuma apo, nkhachitanga nayo vinthu mwamahara para nkhuchezga nayo.” Kweni usange namwe kamtima kaliko kwa iyo, muphalirani maghanoghano ghinu kweniso ivyo mukukhazga pa chibwezi. Ivyo mukukhazga kwa munyinu vingapambana chifukwa cha mitheto panji vifukwa vinyake.
KASI ŴANJI ŴANGAWOVWIRA WULI ŴAKHRISTU AWO ŴANDANJIRE MU NTHENGWA?
14. Kasi tingakhozga wuli Ŵakhristu awo ŵandanjire mu nthengwa na ivyo tikuyowoya?
14 Kasi tose tingawovwira wuli Ŵakhristu awo ŵakukhumba kunjira mu nthengwa? Nthowa yimoza nkhuŵa maso na ivyo tikuyowoya. (Efe. 4:29) Tingajifumba kuti: ‘Kasi nkhuŵayowoyera mazgu ghamsinjiro awo ŵakukhumba kunjira mu nthengwa? Para nkhuwona mubali na mudumbu ŵakuchezga lumoza, kasi nkhughanaghana kuti ŵakusongana?’ (1 Tim. 5:13) Kweniso tikwenera yayi kupangiska Ŵakhristu aŵa kujipulika kuti ŵakusoŵekera kanthu kanyake chifukwa ŵandanjire mu nthengwa. Hans, uyo tamuzunura kukwambilira, wakuti: “Ŵabali ŵanyake ŵakufumba kuti, ‘Chifukwa wuli undatore? Ndiwe mulara sono.’ Kayowoyero kanthena kangapangiska awo ŵandanjire mu nthengwa kujipulika kuti palije chamahara icho ŵakuchitapo, ndipo vingapangiska kuti ŵachichizgike kunjira mu nthengwa.” Ntheura tikwenera kupenjerezga mipata yakuŵawonga Ŵakhristu awo ŵandanjire mu nthengwa.—1 Tes. 5:11.
15. (a) Kuyana na fundo iyo yili pa Ŵaroma 15:2, kasi tikwenera kughanaghanirapo vichi pambere tindawovwire munthu munyake kusanga wakutorana nayo? (Wonaniso chithuzi.) (b) Kasi ni fundo wuli zakuzirwa izo mwasambira mu vidiyo?
15 Wuli para tikughanaghana kuti mubali munyake na mudumbu munyake, para ŵangatorana yingaŵa mbumba yakukondweska? Baibolo likutiphalira kuti tighanaghanirenge umo ŵanji ŵakujipulikira. (Ŵazgani Ŵaroma 15:2.) Ŵanandi awo ŵandanjire mu nthengwa ŵakukhumba yayi kuti muchite kuŵapenjera munthu wakutorana nayo, ndipo tikwenera kuchindika ivyo ŵasankha. (2 Tes. 3:11) Ŵanyake ŵangatemwa kuti tiŵawovwire, kweni tikwenera kuchita nthena para ŵatipempha.e (Zinth. 3:27) Ŵanyakeso ŵakutemwa yayi kuti ŵachite kumanyirathu kuti mwaŵapenjera munthu. Lydia, mudumbu wambura kutengwa wa ku Germany, wakuti: “Panji mubali na mudumbu mungaŵachemera ku chiphikiro chinyake uko kuli ŵanthu ŵanandi. Ivi vingapeleka mwaŵi wakuti mubali na mudumbu ŵakumane na kusankha ŵekha usange ŵasonganenge.”
Chiphikiro icho kuli ŵanthu ŵanandi, chingapeleka mwaŵi wakuti Ŵakhristu awo ŵandanjire mu nthengwa ŵasangane (Wonani ndime 15)
16. Kasi Ŵakhristu awo ŵandanjire mu nthengwa ŵakwenera kukumbuka vichi?
16 Tose kwali tili mu nthengwa panji yayi, tingaŵa na umoyo wakukondwa! (Sal. 128:1) Ntheura usange mukukhumba kunjira mu nthengwa, kweni mundamusange wakuti mutorane nayo, lutilirani kuŵika mtima pa kuteŵetera Yehova. Mudumbu munyake wa ku Macao zina lake Sin Yi wakuti: “Para mungayaniska na nyengo iyo muzamukhalira na munyinu wa mu nthengwa mu Paradiso, nyengo iyo mungakhala mwekha pasono njifupi chomene. Ntheura sangwani na nyengo iyi na kuyigwiliskira ntchito makora.” Kweni wuli usange mwamusanga uyo mukuwona kuti ngwakwenelera kutorana nayo ndipo mwambapo chibwezi? Mu nkhani yakulondezgapo, tizamudumbiskana ivyo mungachita kuti chibwezi chinu chende makora ndipo paumaliro musankhe makora vinthu.
SUMU 137 Ŵanakazi Ŵakugomezgeka, Ŵadumbu Ŵachikhristu
a Kuti timovwirani kumanya usange ndimwe ŵakunozgeka kunjira mu nthengwa, wonani pa jw.org nkhani yakuti “Kuŵa Pachibwezi—Chigaŵa 1: Kasi Nili Wakunozgeka Kuŵa Pachibwezi?”
b MAZGU GHALONGOSOREKA: Mu nkhani iyi kweniso yakulondezgapo, mazgu ghakuti “chibwezi” ghakung’anamura nyengo iyo mwanalume na mwanakazi ŵakumanyana makora usange ŵangaŵa ŵakwenelera kutorana. Chibwezi chikwamba para mwanalume na mwanakazi ŵazomerana ndipo chikulutilira m’paka apo wose ŵazomerezgana kuti ŵatoranenge panji ŵamazge waka.
c Mazina ghanyake ghasinthika.
d Mu mitheto yinyake kanandi mubali ndiyo wakusonga mudumbu kuti ŵaŵe pa chibwezi. Ndipouli, mudumbu nayo ni mwanangwa kumufikira mubali. (Rute 3:1-13) Kuti mumanye vinandi, wonani nkhani yakuti “Achinyamata Akufunsa Kuti . . . Kodi Mnyamata Ndingamuuze Bwanji Kuti Ndikumufuna?” mu Galamukani! ya Novembala 8, 2004.
e Wonani pa jw.org vidiyo yakuti Awo Ŵalongora Kuti Ŵali na Chipulikano Chakukhora—Awo Ŵandatore Panji Kutengwa.