NKHANI YAKUSAMBIRA 28
SUMU 88 Nimanyiskani Mendero Ghinu
Chifukwa Wuli Tikukhumbikwira Kupenja Ulongozgi?
“Vinjeru vili na awo ŵakupenja ulongozgi.”—ZINTH. 13:10.
FUNDO YIKURU
Mu nkhani iyi tiwonenge ivyo tingachita kuti tipindurenge mwakukwana na ulongozgi uwo tapokera.
1. Kasi tingachita wuli kuti tisankhenge vinthu mwavinjeru na kufiska vilato vithu? (Zintharika 13:10; 15:22)
TOSE tikukhumba kuti tisankhenge vinthu mwavinjeru. Nakuti tose tikukhumba kuti vilato vithu vifiskikenge. Ndipo Mazgu gha Chiuta ghakutiphalira ivyo tingachita kuti tifiske vilato vithu.—Ŵazgani Zintharika 13:10; 15:22.
2. Kasi Yehova wakutilayizga vichi?
2 Unenesko ngwakuti, Dada withu Yehova ndiyo wangatipa ulongozgi uwemi chomene kweniso wavinjeru. Ntheura tikwenera kumulomba. Iyo wakulayizga kuti watovwirenge, wakuti: “Nikulongozgenge na jiso lane.” (Sal. 32:8) Fundo iyi yikulongora kuti Yehova wakuchita vinandi padera pakutipa waka ulongozgi. Iyo wakuŵikako mahara chomene kwa ise na kutovwira umo tingachitira kuti tilondezge ulongozgi wake.
3. Kasi tidumbiskanenge vichi mu nkhani iyi?
3 Mu nkhani iyi, tigwiliskirenge ntchito Mazgu gha Chiuta kuti tizgore mafumbo ghanayi: (1) Kasi nkhwenera kuŵa na mikhaliro wuli kuti nisange chandulo na ulongozgi uwemi? (2) Kasi ni njani wanganipa ulongozgi uwemi? (3) Kasi ningalongora wuli kuti nkhupenja nadi ulongozgi? (4) Chifukwa wuli nkhwenera kugega kupempha ŵanji kuti ndiwo ŵanisankhirenge vyakuchita?
KASI NKHWENERA KUŴA NA MIKHALIRO WULI?
4. Kasi tikwenera kuchita wuli kuti tisange chandulo na ulongozgi uwemi?
4 Tikwenera kuŵa ŵakujiyuyura na kuzomerezga kuti tikumanya vyose yayi kuti tisange chandulo na ulongozgi uwemi. Tikwenera kumanya kuti ni nyengo zose yayi apo tingafiska kusankha vinthu mwavinjeru pa ise tekha. Vili nthena chifukwa vinthu vinyake tindakumanepo navyo pa umoyo withu. Usange ndise ŵambura kujiyuyura kweniso tikukana kuzomerezga kuti tikumanya vyose yayi, Yehova watovwirenge yayi. Nakuti ulongozgi uliwose uwo tingawusanga mu Mazgu ghake ujumphilirenge waka. (Mika 6:8; 1 Pet. 5:5) Ndipouli, para ndise ŵakujiyuyura kweniso tikuzomerezga kuti tikumanya vyose yayi, tiŵenge ŵakukhumbisiska kupulika na kulondezga ulongozgi wakufuma mu Baibolo.
5. Kasi ni vinthu wuli ivyo vikatenge vimupangiskenge Davide kuŵa wakujikuzga?
5 Wonani ivyo tingasambirako kwa Themba Davide. Ivyo wakachita pa umoyo wake vikate vimupangiskenge kuŵa wakujikuzga. Pambere wandaŵe Themba, wakamanyikwanga chifukwa cha luso lwake lwakwimba. Nakuti wakachemeka kuti wakimbirenge themba. (1 Sam. 16:18, 19) Pamanyuma pakuti Davide waphakazgika kuŵa themba lakulondezgapo, Yehova wakamupa mzimu wake utuŵa uwo ukamupanga nkhongono. (1 Sam. 16:11-13) Wakaŵa wakumanyikwa pakati pa ŵanthu ŵakwake chifukwa cha kukoma ŵalwani ŵawo, kusazgapo chinkhara cha Ŵafilisiti, Goliyati. (1 Sam. 17:37, 50; 18:7) Munthu wakujikuzga uyo wangaŵa kuti wafiska vyose ivi pa umoyo wake, wangaghanaghana kuti wakukhumbikwira ulongozgi yayi kufuma ku ŵanji. Kweni Davide ndimo wakaŵira yayi.
6. Kasi tikumanya wuli kuti Davide wakaŵa wakunozgeka kupokera ulongozgi? (Wonaniso chithuzi.)
6 Wati wimikika kuŵa themba, Davide wakasora ŵanalume awo ŵangamupa ulongozgi. (1 Mid. 27:32-34) Ichi ntchakuzizika yayi, chifukwa Davide nyengo zose wakaŵa wakunozgeka kupulikira ulongozgi uwemi uwo ŵanji ŵamupa. Iyo wakazomeranga ulongozgi kufuma ku ŵanalume pera yayi kweniso na ku ŵanakazi wuwo. Mwachiyelezgero, wakazomera apo Abigelu wakamupa ulongozgi. Abigelu wakaŵa muwoli na Nabala, ndipo mfumu wake uyu wakaŵa wambura ntchindi, kuwonga, kweniso wakujikuzga. Kweni Davide wakaŵa wakujiyuyura, ndipo wakapulikira ulongozgi wa mwanakazi uyu, uwo ukamovwira kugega kuchita chinthu chiheni chomene.—1 Sam. 25:2, 3, 21-25, 32-34.
Mwakujiyuyura Themba Davide likazomera na kulondezga ulongozgi uwo Abigelu wakalipa (Wonani ndime 6)
7. Kasi tingasambirako vichi kwa Davide? (Mupharazgi 4:13) (Wonaniso vithuzi.)
7 Tingasambirako vinandi kwa Davide. Mwachiyelezgero, nyengo zinyake tingaŵa na luso lunyake panji tingaŵa na udindo. Ndipouli, tikwenera yayi kughanaghana kuti tikumanya chilichose ndipo tikukhumbikwiraso ulongozgi yayi kufuma ku ŵanji. Nga ni Davide, nase tikwenera kuŵa ŵakukhumbisiska kupokera ulongozgi uwemi, vilije kanthu uyo watipa. (Ŵazgani Mupharazgi 4:13.) Para tichitenge nthena, tigegenge kubudiska vikuru ivyo vingatichemera masuzgo ise na ŵanji.
Tikwenera kuŵa ŵakukhumbisiska kupokera ulongozgi uwemi, vilije kanthu uyo watipa (Wonani ndime 7)c
KASI NI NJANI WANGANIPA ULONGOZGI UWEMI?
8. Chifukwa wuli Yonatani wakaŵa wakwenelera kumupa ulongozgi uwemi Davide?
8 Wonaniso fundo yinyake iyo tingasambirako kwa Davide. Wakapulikiranga ulongozgi wakufuma ku ŵanthu awo ŵakaŵa paubwezi uwemi na Yehova kweniso ŵakapulikiskanga makora suzgo ilo wakajumphangamo. Mwachiyelezgero, apo wakakhumbanga kumanya usange Themba Sauli likukhumba kuwezgerapo mtende na iyo, Davide wakapulikira ulongozgi wa Yonatani mwana wa Sauli. Chifukwa wuli Yonatani wakaŵa wakwenelera kumupa ulongozgi uwemi Davide? Chifukwa chakuti Yonatani wakaŵa paubwezi uwemi na Yehova kweniso wakamumanyanga makora Sauli. (1 Sam. 20:9-13) Kasi tikusambirapo vichi apa?
9. Kasi tikwenera kufumba njani para tikupenja ulongozgi? Longosorani. (Zintharika 13:20)
9 Para tikukhumba ulongozgi, tingachita makora kufumba munthu uyo wali paubwezi uwemi na Yehova kweniso wakumanya vinandi pa nkhani iyo ise tikukhumba wovwiri.a (Ŵazgani Zintharika 13:20.) Tiyelezgere kuti mubali wachinyamata wakukhumba kusanga munyake wakwenelera wakuti watorane nayo. Kasi ni njani wangamupa ulongozgi uwemi? Mubwezi wake uyo wandanjire mu nthengwa wangamupa ulongozgi wakovwira usange ungafuma mu Baibolo. Kweni mubali wachinyamata uyu wangasanga ulongozgi wakudunjika na wakovwira chomene usange wangafumba mbumba iyo njakukhwima mwauzimu, kweniso yikumumanya makora ndipo yakhala mwakukondwa mu nthengwa yawo kwanyengo yitali.
10. Kasi tiwonenge vichi sono?
10 Tadumbiskana mikhaliro yiŵiri iyo tikwenera kuŵa nayo kweniso tawona uyo wangatipa ulongozgi uwemi. Sono tiyeni tiwone umo tingalongolera kuti tikupenja nadi ulongozgi, kweniso usange tikwenera kupempha ŵanji kuti ŵatisankhirenge vyakuchita.
KASI NINGALONGORA WULI KUTI NKHUPENJA NADI ULONGOZGI?
11-12. (a) Kasi tikwenera kugega vichi? (b) Kasi Themba Rehobowamu likachita wuli pa nyengo iyo likeneranga kupanga chakusankha chakuzirwa?
11 Nyengo zinyake munthu wangawoneka nga wakupenja ulongozgi, kweni pasi pamtima wakukhumba waka wawone usange ivyo ŵanji ŵayowoyenge vikukolerana na ivyo iyo wali kusankha kale. Munthu wanthena wakupenja nadi ulongozgi yayi. Ivyo vikachitikira Themba Rehobowamu vikwenera kuŵa chenjezgo kwa iyo.
12 Rehobowamu wakaŵa themba la Israyeli pamanyuma pakuti adada ŵake a Solomoni ŵafwa. Panyengo iyo Rehobowamu wakaŵiranga themba ŵanthu ŵakaŵa na vinthu vinandi viwemi. Ndipouli, ŵanthu ŵakawonanga kuti Solomoni wakaŵagwiliskanga ntchito zinonono chomene. Ŵanthu ŵakiza kwa Rehobowamu na kumupempha kuti wapepuskeko ntchito zinonono izo ŵakagwiranga. Rehobowamu wakaŵaphalira kuti ŵamupe nyengo kuti waghanaghanirepo ivyo wasankhenge pa nkhani iyi. Wakamba makora mwa kufumba ulongozgi ku ŵanalume ŵalara awo ŵakaŵa kuti ŵakawovwirapo Solomoni. (1 Mathe. 12:2-7) Ndipouli, iyo wakakana ulongozgi uwo ŵanalume ŵalara aŵa ŵakamupa. Chifukwa wuli wakachita nthena? Kasi Rehobowamu wakaŵa kuti wapanga kale chakusankha pa ivyo wachitenge, ndipo wakapenjanga waka munyake uyo wangakolerana na ivyo wakasankha? Usange ni nthena, ndikuti wakawona kuti ulongozgi uwo ŵabwezi ŵake ŵachinyamata ŵakamuphalira, ukakolerananga na ivyo wakasankha. (1 Mathe. 12:8-14) Rehobowamu wakaŵazgora ŵanthu kuyana na ulongozgi uwo ŵabwezi ŵake ŵachinyamata aŵa ŵakamuphalira. Ivi vikapangiska kuti ŵanthu ŵanandi ŵamugalukire na kusankha themba linyake. Ndipo kufuma pa nyengo iyi, Rehobowamu wakasangana na masuzgo ghambura kumara.—1 Mathe. 12:16-19.
13. Kasi tingamanya wuli kuti tikukhumba nadi ulongozgi kufuma ku ŵanji?
13 Kasi tingasambirako vichi kwa Rehobowamu? Para tikupenja ulongozgi, tikwenera kuŵa na maghanoghano ghakwenelera na kulongora kuti tikukhumba nadi ulongozgi. Kasi tingamanya wuli usange tili na maghanoghano ghakwenelera? Tikwenera kujifumba kuti, ‘Kasi nkhupenja ulongozgi na kuwukana nyengo yeneyiyo chifukwa chakuti ndiwo nakhumbanga kupulika yayi?’ Wonani chiyelezgero chakulondezgapo ichi.
14. Kasi tikwenera kukumbuka vichi para tapokera ulongozgi? Yowoyani chiyelezgero. (Wonaniso chithuzi.)
14 Tiyelezgere kuti mubali wasanga ntchito ya ndalama zinandi. Pambere wandazomere ntchito iyi, waluta kukafumba dankha ulongozgi kwa mulara. Mubali uyu wakulongosora kuti ntchito iyi yipangiskenge kuti nyengo zinandi watalikiranenge na mbumba yake kwa nyengo yitali. Mulara wakumukumbuska mubali uyu fundo ya mu Baibolo yakuti udindo wake ukuru ngwakuti wapwelelere mbumba yake mwauzimu. (Efe. 6:4; 1 Tim. 5:8) Mbwenu tiyelezgere kuti nyengo yeneyiyo mubali uyu wakukolerana navyo yayi ivyo mulara uyu wamuphalira, ndipo wakufumbaso ŵabali ŵanyake pa nkhani iyi, m’paka ŵamuphalire ivyo wakhumbanga kupulika nakale. Kasi ndikuti mubali uyu wakupenja nadi ulongozgi, panji wapanga kale chakusankha ndipo wakupenja waka munthu uyo wangakolerana nayo? Tikwenera kukumbuka kuti mtima withu nguryarya. (Yer. 17:9) Nyengo zinyake ulongozgi uwo tingakondwa nawo yayi ndiwo ungaŵa ulongozgi uwo tikukhumbikwira nadi.
Kasi tikupenja nadi ulongozgi uwemi panji tikupenja waka munthu uyo wangakolerana nase? (Wonani ndime 14)
KASI NKHWENERA KUPEMPHA ŴANJI KUTI NDIWO ŴANISANKHIRENGE VYAKUCHITA?
15. Kasi tikwenera kugega kuchita vichi, ndipo chifukwa wuli?
15 Waliyose wa ise wali na udindo wakusankha yekha vyakuchita. (Gal. 6:4, 5) Nga umo tawonera, munthu wavinjeru wakupenja ulongozgi mu Mazgu gha Chiuta kweniso ku Ŵakhristu ŵakukhwima mwauzimu pambere wandasankhe chakuchita. Ndipouli, tikwenera kuŵa maso kuti tileke kupempha ŵanji kutisankhira vyakuchita. Ŵanyake ŵangachita nthena mwakudunjika, ndipo ŵangafumba munthu uyo ŵakumuchindika kuti, “Muŵenge imwe apa mwatenge muchitenge wuli?” Apo ŵanyake ŵakuchita mwauchenjezi, ŵangatolera waka ivyo munyake wakasankha kwambura kughanaghanirapo paŵekha.
16. Kasi ni nkhani wuli iyo yikawuka mu mpingo wa Korinte yakukhwaskana na nyama izo zikapelekekanga sembe ku vikozgo, ndipo ni njani wakaŵa na udindo wakuŵasankhira pa nkhani iyi? (1 Ŵakorinte 8:7; 10:25, 26)
16 Ghanaghanirani nkhani iyo yikawuka mu nyengo ya Ŵakhristu ŵakwambilira mu mpingo wa Korinte, pa nkhani ya nyama izo panji zikapelekekanga sembe ku vikozgo. Paulosi wakalembera Ŵakhristu aŵa kuti: “Tikumanya kuti chikozgo nkhanthu yayi mu charu, ndipo kulije Chiuta munyake kweni yumoza pera.” (1 Kor. 8:4) Chifukwa cha fundo iyi, ŵanyake mu mpingo ŵakasankha kuti ŵangarya nyama iyo panji yikapelekeka dankha sembe ku vikozgo ndipo pamanyuma na kuguliskika ku msika. Kweni ŵanyake ŵakasankha kuti ŵangarya yayi nyama yanthena chifukwa cha njuŵi yawo. (Ŵazgani 1 Ŵakorinte 8:7; 10:25, 26.) Ichi chikaŵa chakusankha cha waliyose payekha. Paulosi wakaŵaphalirapo yayi Ŵakorinte kuti ŵasankhirenge ŵanji vyakuchita panji kutolera waka ivyo ŵanyawo ŵakuchita. Chifukwa waliyose wa iwo wakaŵa kuti ‘wazamujipatawulira yekha kwa Chiuta.’—Rom. 14:10-12.
17. Kasi chingachitika ntchivichi usange tikutolera waka ivyo ŵanyithu ŵasankha? Yowoyani chiyelezgero. (Wonaniso vithuzi.)
17 Kasi vyanthena ivi vingachitika wuli mazuŵa ghano? Ghanaghanirani nkhani ya tuvigaŵa tuchokotuchoko twa ndopa. Mkhristu waliyose wakwenera kusankha yekha usange wapokerenge panji yayi.b Nyengo zinyake vingatisuzga kupulikiska makora nkhani iyi, kweni pa nkhani ya kusankha vyanthena ivi, waliyose wakwenera kunyamura katundu wake. (Rom. 14:4) Para tingatolera waka ivyo munyake wasankha kuchita, tingalopweska njuŵi yithu. Tingasambizga njuŵi yithu usange tikupanga tekha vyakusankha. (Heb. 5:14) Ipo mphawuli apo tikwenera kupempha ulongozgi kwa Mkhristu wakukhwima mwauzimu? Tingapempha pamanyuma pakuti ise tafufuza dankha patekha, kweni tikuwona kuti tichali kukhumbikwira wovwiri kuti tipulikiske umo fundo za mu Baibolo zikukolerana na suzgo lithu.
Tikwenera kupenja ulongozgi ku ŵanji pamanyuma pa kufufuza dankha patekha (Wonani ndime 17)
LUTILIRANI KUPENJA ULONGOZGI
18. Kasi Yehova watichitira vichi?
18 Yehova walongora kuti wakutigomezga chomene pakutipa wanangwa wakuti tisankhenge tekha vyakuchita. Wali kutipa Mazgu ghake, Baibolo. Ndipo wali kutipaso ŵabwezi ŵavinjeru awo ŵangatovwira kupulikiska fundo za mu Baibolo. Pakuchita ivi, Yehova walongora kuti wakutipwelelera pakuŵa Dada withu wachitemwa. (Zinth. 3:21-23) Kasi tingalongora wuli kuti tikuwonga wovwiri uwo wakutipa?
19. Kasi tingachita wuli kuti tilutilire kukondweska Yehova?
19 Ghanaghanirani fundo iyi: Ŵapapi ŵakukondwa kuwona ŵana ŵawo ŵakukura na kuŵa ŵateŵeti ŵa Yehova ŵavinjeru awo ŵakovwira ŵanji. Mwakuyana waka, Yehova nayo wakukondwa para wakuwona tikulutilira kukura mwauzimu, tikupenja ulongozgi, na kupanga vyakusankha ivyo vikumukondweska.
SUMU 127 Mtundu wa Munthu Uwo Nkhwenera Kuŵa
a Nyengo zinyake Ŵakhristu ŵangafumba mwavinjeru ŵanthu awo ŵakusopa Yehova yayi pa nkhani ya vyachuma, wovwiri wa chipatala, panji nkhani zinyake.
b Kuti mumanye vinandi pa nkhani iyi, wonani mu buku la Mungakondwa na Umoyo Kwamuyirayira!, sambiro 39 fundo 5 kweniso pa chigaŵa cha “Sangani Fundo Zakusazgikira.”
c MAZGU GHAKULONGOSORA CHITHUZI: Mulara wakupeleka ulongozgi kwa mulara munyake pa umo wakayowoyera pa ungano wa ŵalara.