Umo Mungapelekera Ulongozgi ku Ŵanji

1. Kasi ni njani uyo wakwenera kupeleka ulongozgi? Longosorani.

KASI mukutemwa kupeleka ulongozgi ku ŵanji? Ku ŵanyake ntchipusu waka kupeleka ulongozgi. Apo ŵanyake ŵakuchita wofi kweniso ŵakufwatuka yayi kupeleka ulongozgi ku ŵanji. Mulimose umo vingaŵira, tose tili na udindo wakupeleka ulongozgi ku ŵanyithu nyengo na nyengo. Chifukwa wuli? Chifukwa Yesu wakayowoya kuti ŵasambiri ŵake ŵaunenesko ŵazamumanyikwa para ŵakulongorana chitemwa. (Yoh. 13:35) Ndipo nthowa yimoza iyo tikulongolera kuti tikuŵatemwa ŵabali na ŵadumbu ŵithu ni para tikuŵapa ulongozgi apo mphakukhumbikwa. Mazgu gha Chiuta ghakuyowoya kuti “ubwezi uwemi” ukutikitira panji kuti kukura chifukwa cha “ulongozgi wakovwira.”—Zinth. 27:9.

2. Kasi ŵalara ŵakwenera kumanya kuchita vichi, ndipo chifukwa wuli? (Wonaniso bokosi lakuti “Ulongozgi pa Maungano Ghamukati mwa Sabata.”)

² Chomene ŵalara ndiwo ŵakukhumbikwira kumanya umo ŵangapelekera ulongozgi uwemi. Yehova kwizira mwa Yesu, wali kuŵapa ŵanalume aŵa mulimo wa kuliska mpingo. (1 Pet. 5:​2, 3) Nthowa yimoza iyo ŵakuchitira nthena, nkhwizira mu nkhani za mu Baibolo izo ŵakudumba mu mpingo. Ŵakupelekaso ulongozgi ku mberere yiliyose payekha, kusazgapo na izo zazgeŵa kuti ziwelereso mu mpingo. Kasi ŵalara kusazgapo na tose, tingachita wuli kuti tipelekenge ulongozgi uwemi?

3. (a) Kasi tingachita wuli kuti tipelekenge ulongozgi uwemi ku ŵanji? (Yesaya 9:6; wonaniso bokosi lakuti “Yezgani Yesu Para Mukupeleka Ulongozgi.”) (b) Kasi tidumbiskanenge vichi mu nkhani iyi?

³ Tingasambira vinandi pa nkhani ya umo tingapelekera ulongozgi uwemi para tikusambira viyelezgero vya ŵanthu ŵa mu Baibolo, chomenechomene Yesu. Limoza mwa mazina agho wali nagho ndakuti “Wakupeleka Fundo Wakuzizwiska.” (Ŵazgani Yesaya 9:6.) Mu nkhani iyi, tidumbiskanenge umo tingachitira para tapempheka kuti tipeleke ulongozgi kweniso umo tingachitira para tipelekenge ulongozgi nangauli tindapempheke. Tiwonengeso uwemi wa kupeleka ulongozgi pa nyengo yakwenelera kweniso munthowa yiwemi.

PARA TAPEMPHEKA KUPELEKA ULONGOZGI

4-5. Para munyake watipempha ulongozgi, kasi tikwenera kujifumba fumbo wuli? Yowoyani chiyelezgero.

⁴ Kasi tikujipulika wuli usange munthu munyake watipempha ulongozgi? Nyengo zinyake tingajiwona ŵakukhumbikwa ndipo tingakhumba kovwirapo nyengo yeneyiyo. Kweni chakwamba, tikwenera kujifumba kuti, ‘Kasi ndine wakwenelera kupeleka ulongozgi pa nkhani iyi?’ Nyengo zinyake vikuŵa makora chomene kuti tileke kupeleka ulongozgi kwa munthu, m’malo mwake tikwenera kumulongozgera waka kwa munthu uyo tikumanya kuti wangamupa nadi ulongozgi wakwenelera pa nkhani iyo.

⁵ Wonani chiyelezgero ichi. Tiyelezgere kuti mubwezi winu wapamtima walwara chomene. Mbwenu wakumuphalirani kuti wamba kufufuza wovwiri wakwenelera wa nthenda yake, ndipo wakumufumbani kuti namwe muyowoyepo maghanoghano ghinu pa ivyo wafufuza. Nangauli mungaŵa kuti mwatemwa chomene mtundu unyake wa wovwiri uwo ungaŵa wakwenelera, kweni mundasambizgike vyakukhwaskana na wovwiri wa chipatala panji ulwari uwo. Panthena apa, chinthu chakovwira chomene icho mungachita, nkhumovwira mubwezi winu kusanga munthu wakwenelera uyo wali kusambizgika vya chipatala kuti wamovwire.

6. Chifukwa wuli tikwenera kulindilirapo dankha pambere tindapeleke ulongozgi?

⁶ Nanga ni para tikuwona kuti tili ŵakwenelera kupeleka ulongozgi pa nkhani iyo, nyengo zinyake tikwenera kulindilirapo dankha pambere tindamuzgore munthu uyo watipempha ulongozgi. Chifukwa wuli? Lemba la Zintharika 15:28 likuyowoya kuti ‘murunji wakughanaghanirapo dankha pambere wandazgore.’ Wuli usange tikughanaghana kuti zgoro tikulimanya? Apaso tingachita makora kufufuza dankha, kulomba, na kughanaghanirapo. Para tachita nthena, ndipo tingaŵa na chigomezgo chose kuti ulongozgi uwo timupenge, ukukolerana na maghanoghano gha Yehova. Wonani chiyelezgero cha ntchimi Natani.

7. Kasi mungasambirako vichi kwa ntchimi Natani?

⁷ Themba Davide likaphalira ntchimi Natani kuti likukhumba kuzenga tempile la Yehova. Nyengo yeneyiyo Natani wakaphalira Davide kuti wazenge tempile ili. Kweni Natani mphanyi wakakafumba dankha Yehova. Chifukwa wuli? Chifukwa Yehova wakakhumba yayi kuti Davide ndiyo wazenge tempile. (1 Mid. 17:​1-4) Nga umo nkhani iyi yikulongolera, para tapempheka kuti tipeleke ulongozgi, tingachita makora ‘kuzikira dankha pakuyowoya.’—Yak. 1:19.

8. Kasi ntchifukwa wuli chinyake icho tikwenera kuŵira maso para tikupeleka ulongozgi?

⁸ Wonani chifukwa chinyake icho tikwenera kuŵira maso para tikupeleka ulongozgi. Para tapeleka ulongozgi wakubudika ndipo munthu uyo wasangana na masuzgo, ndikuti nase tapangiskako. Ntheura tili na chifukwa chakupulikikwa chakuti tighanaghanirengepo dankha pambere tindapeleke ulongozgi.

UMO TINGAPELEKERA ULONGOZGI PARA MUNYAKE WANDATIPEMPHE

9. Kasi ŵalara ŵakwenera kuwoneseska dankha vichi pambere ŵandapeleke ulongozgi? (Ŵagalatiya 6:1)

⁹ Nyengo na nyengo, ŵalara ŵakwenera kuchitapo kanthu kuti ŵawovwire mubali panji mudumbu uyo wamba ‘kupuluka.’ (Ŵazgani Ŵagalatiya 6:1.) Mazgu ghakulongosora vesi gha pa lemba ili ghakuti munthu wanthena “wakuŵa kuti wakunjilira ku nthowa yiheni, nangauli wakuŵa kuti wandachite kwananga kukuru.” Chilato cha ŵalara nkhovwira munthu kuti walutilire kwenda pa nthowa yakuluta ku umoyo wamuyirayira. (Yak. 5:​19, 20) Ndipouli, kuti ulongozgi wawo uŵe wakovwira, chakwamba ŵakwenera kuwoneseska kuti munthu uyo wamba nadi kupuluka. Vili nthena chifukwa chakuti Yehova wali kupeleka wanangwa ku waliyose kuti wasankhenge vinthu kuyana na njuŵi yake. (Rom. 14:​1-4) Kweni wuli usange munthu uyo wamba nadi kupuluka ndipo ŵalara ŵawona kuti ŵakwenera kumupa ulongozgi?

10-12. Kasi ŵalara ŵakwenera kuchita vichi pambere ŵandapeleke ulongozgi kwa munthu uyo wandaŵapemphe? Yowoyani chiyelezgero. (Wonaniso vithuzi.)

¹⁰ Ntchipusu yayi ku ŵalara kupeleka ulongozgi kwa munthu uyo wandaŵapemphe. Chifukwa wuli? Mpositole Paulosi wakayowoya kuti nyengo zinyake munthu wangapuluka uku wakumanya yayi. Ntheura chakwamba ŵalara ŵakwenera kumunozgekereska dankha munthu wanthena kuti wazakapokere ulongozgi.

¹¹ Kupeleka ulongozgi kwa munthu uyo wandapemphe tingakuyaniska na kupanda mbuto pa dongo ilo ndinonono. Pambere mulimi wandambe kupanda, wakutipura dankha dongo ilo. Ivi vikovwira kuti dongo liŵe lakufewa mwakuti wapandepo makora mbuto zake. Kufuma apo, wakupanda mbuto zake. Paumaliro ndipo wakuthilira kuti zikure makora. Mwakuyana waka, pambere mulara wandapeleke ulongozgi kwa munthu uyo wandamupemphe, wakwenera kumunozgekereska dankha munthu uyo. Mwachiyelezgero, wakwenera kulindilira dankha nyengo yakwenelera, ndipo kufuma apo wakwenera kumusimikizgira munthu uyo kuti wakumughanaghanira lekani wakukhumba kumuphalira chinthu chinyake. Usange mubali uyo wakupeleka ulongozgi wakumanyikwa kuti ngwachitemwa kweniso walusungu, chiŵenge chipusu kuti ŵanji ŵapokere ulongozgi wake.

¹² Panyengo iyo ŵakudumbiskana, mulara wangalutilira kumunozgekereska munthu uyo, mwa kumuphalira kuti tose tikubudiska ndipo nyengo na nyengo tikukhumbikwira ulongozgi. (Rom. 3:23) Mwakuzikira kweniso mwantchindi, mulara wangamulongora Malemba agho ghakulongora kuti wamba kwenda pa nthowa iyo yingamupuluska. Para munthu uyo wazomerezga kuti wabudiska nadi, mulara wakuŵa nga ‘wakupanda mbuto’ mwakumulongosolera munthowa yipusu ivyo wakwenera kuchita kuti wanozge suzgo lake. Paumaliro ndipo mulara ‘wangathilira’ mbuto mwa kumuwonga munthu uyo pa ivyo wakuchita makora na kulomba nayo.—Yak. 5:15.

13. Kasi ŵalara ŵangachita wuli kuti ŵamanye usange munthu uyo wapika ulongozgi wapulikiska nadi?

¹³ Nyengo zinyake, ivyo munthu uyo wapelekanga ulongozgi wang’anamuranga vingapambana na ivyo wapulika munthu uyo wapikanga ulongozgi. Kasi ŵalara ŵangachita wuli kuti vyanthena vileke kuchitika? Ŵakwenera kufumba mafumbo mwaluso kuti ŵamovwire munthu uyo kupulikiska. (Muph. 12:11) Ivyo wazgorenge viwovwirenge uyo wakupeleka ulongozgi kumanya kuti munthu uyo wapulikiska nadi ulongozgi uwo wapika.

KUPELEKA ULONGOZGI PA NYENGO YAKWENELERA KWENISO MUNTHOWA YIWEMI

14. Kasi tikwenera kupeleka ulongozgi uku takwiya? Longosorani.

¹⁴ Tose tili ŵambura kufikapo, ntheura nyengo zinyake tingachita panji kuyowoya vinthu ivyo vingakhuŵazga ŵanji. (Kol. 3:13) Mazgu gha Chiuta ghakuyowoya kuti nyengo zinyake tingakwiyiskana yumoza na munyake. (Efe. 4:26) Kweni tikwenera yayi kupeleka ulongozgi uku tili ŵakukwiya. Chifukwa wuli? Chifukwa “ukali wa munthu ukulongora urunji wa Chiuta yayi.” (Yak. 1:20) Usange tingapeleka ulongozgi uku takwiya, ndipo tinganangirathu waka vinthu. Ichi chikung’anamura kuti tileke kuyowoya umo tikujipulikira yayi kwa munthu uyo watikwiyiska. Ndipouli, tingadumbiskana makora na munthu uyo usange nase tatuna. Wonani chiyelezgero chiwemi cha Elihu, mubwezi wakugomezgeka wa Yobu.

15. Kasi tikusambirako vichi ku chiyelezgero cha Elihu? (Wonaniso chithuzi.)

¹⁵ Elihu wakategherezga dankha kwa mazuŵa ghanandi, apo Yobu wakajivikiliranga ku mautesi agho ŵabwezi ŵake ŵatesi ŵakamuyowoyera. Elihu wakamulengera lusungu Yobu. Kweni apo Yobu wakayezganga kujivikilira kuti iyo ni murunji, na kwamba kuyowoya vinthu vyautesi vyakukhwaskana na Yehova, Elihu wakakwiya chomene. Nangauli wakakwiya, kweni Elihu wakalindilira nyengo yiwemi yakuti wayowoye, ndipo wakayowoya mwakuzikira kweniso mwalusungu apo wakamupanga ulongozgi Yobu. (Yobu 32:2; 33:​1-7) Chiyelezgero cha Elihu chikutisambizga fundo yakuzirwa chomene yakuti: Ulongozgi ukuŵa wakovwira chomene para wapelekeka panyengo yakwenelera, kweniso munthowa yiwemi yakulongora kuti tikumuchindika na kumutemwa munthu uyo.—Muph. 3:​1, 7.

LUTILIRANI KUPELEKA NA KUPOKERA ULONGOZGI

16. Kasi tikusambirapo vichi pa Salimo 32:8?

¹⁶ Lemba ilo pajintha mutu wa nkhani iyi likuti ‘Yehova watilongozgenge na jiso lake.’ (Ŵazgani Salimo 32:8.) Ichi chikulongora kuti walutilirenge kutovwira na kutisambizga. Wakulayizga kuti watipenge ulongozgi na kutovwira kuwulondezga. Yehova ntchiyelezgero chiwemi chomene kwa ise. Usange tikukhumba kupeleka ulongozgi ku ŵanji, mphanyi nase tayezga Yehova mwa kulutilira kuŵikako mahara kwa iwo na kuŵawovwira kuti ŵasankhe makora vinthu.

17. Usange ŵalara ŵakutipa ulongozgi wakudunjika wakufuma mu Baibolo, kasi ŵakulongora vichi? Longosorani. (Yesaya 32:​1, 2)

¹⁷ Pasono ndipo tikukhumbikwira chomene kupeleka na kupokera ulongozgi kuluska kumasinda kose. (2 Tim. 3:1) Ŵalara awo ŵakupeleka ulongozgi wakudunjika uwo ukufuma mu Baibolo, ŵali nga “nthumilonga twa maji mu charu chambura maji.” (Ŵazgani Yesaya 32:​1, 2.) Ŵabwezi awo ŵakumanya ivyo tikukhumba kupulika nakale kweni ŵakutiphalira ivyo tikukhumbikwira kupulika nadi, ni vyawanangwa vyakuzirwa chomene ndipo ŵali nga ni “maapulo ghagolide mu mbale zasiliva.” (Zinth. 25:11) Mphanyi tose talutilira kuŵa na vinjeru ivyo tikukhumbikwira kuti tipelekenge na kupokera ulongozgi uwemi.