Kasi Dyabulosi Wakuwoneka Wuli?

Ivyo Baibolo likuyowoya

Dyabulosi ntchilengiwa chauzimu, icho chikung’anamura kuti wali na thupi ilo tingaliwona yayi.—Ŵaefeso 6:11, 12.

Chithuzi chakutchuka chakulongora Dyabulosi wakolera chifoloko. Wakuwoneka nga ni mbuzi iyo yili na masengwe na mchira.

Ŵanthu ŵanandi ŵakujambura vithuzi, ŵakujambura Dyabulosi kuti wakuwoneka nga ni mbuzi iyo yili na masengwe, muchira, na chifoloko chikuru. Ŵanyake ŵakusachizga kuti vithuzi vyanthena vikajambulika kakwamba na ŵanthu ŵakujambura vithuzi awo ŵakaŵako vyaka 1000 ivyo vyajumpha. Ŵanthu aŵa ŵakwenera ŵakagomezganga vidokoni ivyo vikaŵako mu nyengo iyo.

Kasi Baibolo likuti Dyabulosi wakuwoneka wuli?

Baibolo likulongosora Dyabulosi munthowa zakupambanapambana. Ivi vikutovwira kumanya vya umo wakuwonekera yayi kweni wunthu wake. Vinyake mwa ivyo likuyowoya ni ivi:

Mungelo wa ungweru. Wakuchita vinthu ivyo vikuwoneka nga kuti ni viwemi na chilato chakuti ŵanthu ŵalondezgenge iyo m’malo mwa kulondezga Chiuta.—2 Ŵakorinte 11:14.
Nkhalamu yakuwuluma. Wakuwukira awo ŵakusopa Chiuta.—1 Petrosi 5:8.
Chinjoka chikuru. Ngwakofya, ngwankhongono, kweniso wakuparanya.—Chivumbuzi 12:9.

Mavesi gha mu Baibolo agho ghakuyowoya vya Dyabulosi

2 Ŵakorinte 11:14: “Satana nayo wakujizgora nga ni mungelo wa ungweru.”

Ng’anamuro: Wakuchita vinthu ivyo vikuwoneka nga kuti ni viwemi na chilato chakuti ŵanthu ŵamulondezgenge m’malo mwa kulondezga Chiuta.
Ŵaefeso 6:11: “Vwarani vyankhondo vyose vyakufuma kwa Chiuta, mwakuti mutchinthe pakulimbana na mauryarya gha Dyabulosi.”

Ng’anamuro: Dyabulosi wakupanga njomba zakupambanapambana kuti ŵanthu ŵaleke kupulikira Chiuta.
Yakobe 4:7: “Jilambikani kwa Chiuta, kweni suskani Dyabulosi ndipo wamuchimbiraninge.”

Ng’anamuro: Munthu wangathereska Satana usange wangaleka kumupulikira na kwamba kupulikira Chiuta.
1 Petrosi 5:8: “Mulwani winu Dyabulosi wakuyingayinga nga ni nkhalamu yakuwuluma, wakupenja munthu wakuti wamumilimitizge.”

Ng’anamuro: Dyabulosi wakutinkha awo ŵakupulikira Chiuta ndipo wakukhumba kunanga ubwezi wawo.