MAFUMBO GHA BAIBOLO GHAZGOLEKA

Kasi Dyabulosi wali kufuma nkhu?

Ciuta wandalengepo Dyabulosi. Kweni Ciuta wakalenga mungelo uyo pamanyuma wakazgoka Dyabulosi, kung’anamura “Musesi,” uyo wakucemekaso Satana kung’anamura “Wakususka”. Yesu wakalongora kuti nyengo yinyake Dyabulosi wakaŵapo murunji na wambura mulandu. Ipo cikulongora kuti pambere wandazgoke Dyabulosi wakaŵa mungelo murunji wa Ciuta.—Ŵazgani Yohane 8:44.

Kasi vikenda wuli kuti mungelo uyu wazgoke Dyabulosi?

Mungelo uyo wali kuzgoka Dyabulosi wakasankha kususka Ciuta na kupusika ŵanthu ŵakwamba kuti ŵakolerane nayo. Ntheura wali kujizgora yekha kuŵa Satana, zina ilo likung’anamura “Wakususka.”—Ŵazgani Genesis 3:1-5; Uvumbuzi 12:9.

Vilengiwa vyamahara vyose vya Ciuta vili na wanangwa wakusankha kucita ciwemi panji ciheni. Mungelo uyo wali kuzgoka Dyabulosi nayo wakaŵa na wanangwa uwu. Kweni iyo wakadokera kuti ŵanthu ŵamusopenge. Khumbo lakuti wapike ucindami likakura comene kuluska kukondweska Ciuta.—Ŵazgani Mateyu 4:8, 9; Yakobe 1:13, 14.

Kasi Dyabulosi walutilira kupuluska ŵanthu kufika mpha? Kasi mukwenera kumopa? Mazgoro gha mafumbo agha mungaghasanga mu Baibolo.