Kasi Baibolo Likuti Wuli pa Nkhani ya Miliri?
Ivyo Baibolo likuyowoya
Baibolo likayowoyerathu kuti mu mazuŵa ghaumaliro kuzamuŵa nthenda zakwambukira kusazgapo na miliri. (Luka 21:11) Kweni miliri ntchilango chakufuma kwa Chiuta yayi. Nakuti sonosono apa, Chiuta kwizira mu Ufumu wake wazamuwuskapo matenda ghose, kusazgapo miliri iyo yiliko sono.
Kasi Baibolo likayowoyerathu kuti kuzamuŵa miliri?
Baibolo likuyowoya mwakudunjika yayi kuti kuzamuŵa matenda panji miliri, nga COVID-19, Ezi, TB, maleriya, panji infuluwenza ya ku Spain. Kweni likayowoyerathu kuti kuzamuŵa “nthenda zakwambukira” na ‘nthenda zakofya.’ (Luka 21:11; Chivumbuzi 6:8) Vinthu ivi vikulongora kuti tili “mu mazuŵa ghaumaliro,” kweniso kuti tili ku “umaliro wa charu.”—2 Timote 3:1; Mateyu 24:3.
Kasi Chiuta wali kulangapo ŵanthu na matenda?
Mu Baibolo muli nkhani zichoko waka izo zikuyowoya kuti Chiuta wakalanga ŵanthu na matenda. Mwachiyelezgero, wakalangapo ŵanthu ŵanyake na nthenda ya vyoni. (Maŵazgo 12:1-16; 2 Mathemba 5:20-27; 2 Midauko 26:16-21) Ndipouli, nthenda izi zikambukirangaso na ŵanthu awo ŵandabude yayi. Kweni chikaŵanga chilango kwa awo ŵagalukira Chiuta.
Kasi miliri iyo yiliko sono ntchilango chakufuma kwa Chiuta?
Yayi. Ŵanthu ŵanyake ŵakuyowoya kuti Chiuta wakugwiliskira ntchito miliri iyo yazara sono kweniso matenda ghanyake, kuti walange ŵanthu. Ndipouli, Baibolo likususka fundo iyi. Chifukwa wuli?
Chifukwa ntchakuti, kwamba kale ŵateŵeti ŵa Chiuta ŵakusuzgika na matenda. Mwachiyelezgero, Timote, wakasuzgikanga ‘na ulwari nyengo zinandi.’ (1 Timote 5:23) Kweni Baibolo lindayowoyepo kuti ichi chikaŵa chilongolero chakuti Chiuta waleka kukondwa nayo. Mwakuyana waka, mazuŵa ghano napo ŵateŵeti ŵanyake ŵakugomezgeka ŵa Chiuta ŵakulwara panji kusangika na matenda ghanyake. Kanandi vikuŵa nthena chifukwa chakuti ŵanthu aŵa ŵakaŵa pa malo ghanyake pa nyengo yiheni.—Mupharazgi 9:11.
Nakuti Baibolo likusambizga kuti nyengo yakuti Chiuta walangire ŵanthu ŵaheni yichali yindafike. Likutiso likuti tikukhala “mu zuŵa la chiponosko,” nyengo iyo Chiuta wakuchemera waliyose kuti wasendelere kwa Iyo kuti wazakaponoskeke. (2 Ŵakorinte 6:2) Ndipo nthowa yimoza iyo wakuchitira nthena, nkhwizira mu ntchito yakupharazga “makani ghawemi gha Ufumu” iyo yikuchitika pa charu chose chapasi.—Mateyu 24:14.
Kasi miliri yizamumara?
Enya. Baibolo likuyowoya kuti kunthazi uku pazamuŵavya uyo wazamulwaraso. Kwizira mu Ufumu wake, Chiuta wazamuwuskapo matenda ghose. (Yesaya 33:24; 35:5, 6) Wazamuwuskapo masuzgo ghose, kusazgapo vyakuŵinya na nyifwa. (Chivumbuzi 21:4) Wazamuwuska awo ŵali kufwa kuti ŵazakakondwe na umoyo uwemi wambura masuzgo pano pa charu chapasi.—Masalimo 37:29; Milimo 24:15.
Mavesi gha mu Baibolo agho ghakuyowoya vya matenda
Mateyu 4:23: “[Yesu] wakenda mu Galileya mose, ndipo wakasambizganga mu masunagoge ghawo na kupharazga makani ghawemi gha Ufumu. Wakachizganga mtundu uliwose wa nthenda na mtundu uliwose wa vyakuŵinya pakati pa ŵanthu.”
Ng’anamuro: Minthondwe iyo Yesu wakachitanga, chikaŵa chilongolero cha ivyo Ufumu wa Chiuta uchitirenge ŵanthu sonosono apa.
Luka 21:11: “Kuzamuŵa . . . nthenda zakwambukira.”
Ng’anamuro: Miliri na matenda ntchilongolero chakuti tili mu mazuŵa ghaumaliro.
Chivumbuzi 6:8: “Nkhalaŵiska na kuwona hachi lituwulufu. Uyo wakakhalapo wakaŵa na zina lakuti Nyifwa. Ndipo Dindi likamulondezganga pafupi. Iwo ŵakapika mazaza . . . kuti ŵakome na. . . nthenda yakofya.”
Ng’anamuro: Uchimi wakuyowoya za ŵanalume ŵanayi awo ŵakwera pa mahachi ukulongora kuti miliri yingachitika mu mazuŵa ghaumaliro ghano.