MUŴENGE MASO!
Ŵanthu 6 Miliyoni Ŵafwa na Muliri wa COVID-19—Kasi Baibolo Likutipo Wuli?
Kuyana na lipoti la wupu wa World Health Organization (WHO), kufika pa May 18, 2022, ŵanthu 6.27 miliyoni ŵali kufwa chifukwa cha muliri wa COVID-19. Nakuti lipoti ilo wupu uwu ukafumiska pa May 5, 2022, likati chiŵelengero cha ŵanthu awo ŵafwa ntchikuru chomene. Wupu uwu ukati, pakati pa chaka cha 2020 na 2021, “chiŵelengero chose cha ŵanthu awo ŵafwa chifukwa cha muliri uwu panji awo ŵakaŵaghanaghaniranga waka kuti ŵakhwaskika na muliri wa COVID-19. . . chikaŵa pafupifupi 14.9 miliyoni.” Kasi Baibolo likuyowoyapo chilichose pa nkhani zakuchitiska chitima nga ni izi?
Baibolo likayowoyerathu kuti kuzamuŵa miliri yakofya
Yesu wakayowoyerathu kuti kuzamuŵa nthenda zakwambukira, panji kuti miliri ya “nthenda zakofya,” mu nyengo yakuchemeka kuti “mazuŵa ghaumaliro.”—Luka 21:11, Contemporary English Version; 2 Timote 3:1.
Uchimi wa Yesu ukufiskika mazuŵa ghano. Kuti mumanye vinandi, ŵazgani nkhani yakuti “Kasi Chimanyikwiro cha ‘Mazuŵa Ghaumaliro’ Panji Kuti ‘Nyengo Zaumaliro’ Ntchivichi?“
Baibolo likutipembuzga
“Chiuta wa chisangulusko chose,. . . wakutisanguluska mu suzgo yithu yose.”—2 Ŵakorinte 1:3, 4.
Ŵanandi awo ŵataya ŵakutemweka ŵawo ŵakupembuzgika na uthenga wa mu Baibolo. Manyani vinandi mu nkhani yakuti “Ivyo Mungachita—Kasi Ni Vichi Ivyo Mungachita?” na “Wovwiri Uwemi ku Ŵanthu Awo Ŵali Na Chitima.”
Baibolo likutiphalira umo suzgo ili lizamumalira
“Ufumu winu wize. Khumbo linu lichitike pano pasi nga nkhuchanya.”—Mateyu 6:10.
Sonosono apa “Ufumu wa Chiuta” uzamuwoneseska kuti paŵevye “munthu uyo wakukhala mu charu uyo wazamuti: ‘Nalwara.’” (Mariko 1:14, 15; Yesaya 33:24) Wonelerani vidiyo yakuti, Kasi Ufumu wa Chiuta Ni Vichi? Kuti mumanye vinandi vyakukhwaskana na boma la kuchanya ili kweniso ivyo lizamuchita.
Tikumuchiskani kuti mumanye vinandi vyakukhwaskana na ivyo Baibolo likusambizga kuti imwe pamoza na mbumba yinu musange chandulo na ulongozgi wake uwo ngwakovwira kweniso malayizgo ghake ghakukondweska chomene.