Kasi Ningachita Wuli Usange Ŵapapi Ŵane Ŵakunikanira Kugwiliskira Ntchito Malo Ghakuchezgerapo gha pa Intaneti?

Panji ŵanyinu wose ŵakugwiliskira ntchito malo ghakuchezgerapo gha pa intaneti, ndipo nyengo zose ŵakukhalira waka kuyowoya vya ntchezgo za pa intaneti. Panji ŵakumusekani chifukwa chakuti mukugwiliskira ntchito yayi malo ghakuchezgerapo gha pa intaneti. Kweni kasi ni vichi ivyo mukwenera kumanya? Ndipo kasi mungachita wuli?

Ivyo mukwenera kumanya

Muli mwekha yayi. Ŵapapi ŵanandi ŵakuŵazomerezga yayi ŵana ŵawo kuti ŵagwiliskirenge ntchito malo ghakuchezgerapo gha pa intaneti. Panji vingaŵa kuti ŵakuchita nthena chifukwa ŵakumanya kuti malo ghakuchezgerapo ghangizgiska masuzgo ghakulondezgapo agha:

• kusuzgika maghanoghano na masuzgo ghanyake.

• kuwonelera vinthu vyamuziro, kulemberana ma meseji gha msikuzi, kweniso kunenana.

• kuleka kukolerana na ŵanyawo.

Ŵachinyamata ŵanandi ŵasankha kuleka kugwiliskira ntchito malo ghakuchezgerapo gha pa intaneti. Paŵekha ŵakawona kuti intaneti yikaŵapangiskanga kuti ŵachite vinthu vinandi viheni m’malo mwakuchita viwemi. Wonani viyelezgero vyakulondezgapo ivi:

• Priscilla wakawona kuti kuchezga pa intaneti kukamumaliranga nyengo yake yinandi yakuchitira vinthu vinyake vyakukhumbikwa.

• Jeremy wakuwona kuti chikatenge chiŵenge chakusuzga kuti waleke kuwona vinthu viheni ivyo vikizanga apo wakaŵa pa malo ghakuchezgera.

• Bethany wakawamo kuti kuchezga pa intaneti kukamupangiskanga kuti waghanaghanirenge waka ivyo ŵanyake ŵakachitanga.

Sierra wakati: “Nkhawuskamo mu foni yane app yakuchezgera pa intaneti ndipo ndine wakukondwa kuti nkhachita nthena. Nkhudandawura yayi kuti nkhawuskamo, ndipo pasono nili na nyengo yakuchitira vinthu ivyo nkhuwona kuti ni vyakuzirwa kwa ine.

Kate wakati: “Nkhakhumbanga yayi kuti kuchezga pa intaneti kuninjire chomene mu ndopa kweniso kuti nisuzgikenge maghanoghano chifukwa cha ivyo ŵanthu ŵakuyowoya pa ivyo naŵikapo. Chikaŵa chipusu yayi kuleka kuchezga pa intaneti, kweni nkhajipulika makora chomene nati naleka. Pasono nili na mtende ukuru.

Ivyo mungachita

Pulikirani malango agho ŵapapi ŵinu ŵamupani. Longorani kuti ndimwe wakukhumbisiska kupulikira malango gha ŵapapi ŵinu kwambura kukwiya panji kudandawura kulongora kuti mwakura nadi.

Fundo ya mu Baibolo: “Munthu muzeleza wakufumiska ukali wake wose.”—Zintharika 29:11.

Ŵanji ŵangamuphalirani kuti mugwiliskirenge ntchito malo ghakuchezgerapo mwakubisilizga kwambura ŵapapi ŵinu kumanya. Kuchita nthena kungaŵa kwakofya. Kugwiliskira ntchito malo ghakuchezgerapo mwakuchita kubisilizga kungamupangiskani kuti muŵenge ŵakwenjerwa kweniso kuti mujiyimbenge mulandu. Nakuti vingazakamunjizgani mu suzgo para ŵazakamusangani ndipo vingaŵa vyakusuzga kuti ŵazakamugomezganiso.

Fundo ya mu Baibolo: “Tikukhumba kuŵa ŵakugomezgeka mu vinthu vyose.”—Ŵahebere 13:18.

Pangani chisankho. Nga mbachinyamata awo taŵazunura mu nkhani iyi, namwe mungaŵa na vifukwa vinandi vyakuleka kuŵira na malo ghakuchezgerapo gha pa intaneti. Usange mwapulikiska kuti kugwiliskira ntchito malo ghakuchezgerapo gha pa intaneti ntchinthu chakuzirwa chomene yayi kwa imwe, mbwenu musankhenge kuleka kuyigwiliskira ntchito chifukwa ndivyo mwakhumba. Ntheura para ŵachinyamata ŵanyinu ŵamufumbani muzamuchita soni yayi ndipo nawo ŵazamuleka kumusekani.

Fundo Yikuru: Chitani vinthu mwakukolerana na ŵapapi ŵinu kuti mose mwenderenge vimoza na kusankha vyakuyana. Pasono mungakhala kwambura kuŵa na malo ghakuchezgerapo gha pa intaneti.