Boma la Russia Lawukira Charu cha Ukraine

Mulenji wa pa February 24, 2022, ŵasilikari ŵa boma la Russia ŵakawukira charu cha Ukraine, nangauli ŵalongozgi ŵa vyaru vinandi pa charu chose ŵakayezgeska kuyowoyapo kuti paleke kuwuka nkhondo. Kasi viwawa ivi vikhwaskenge wuli charu chose? Mu mazuŵa ghajumpha agha, Mulembi wa wupu wa United Nations, António Guterres, wakati: “Kuyowoya unenesko, viwawa ivi vyambiskenge masuzgo ghakuru chomene, kweniso vinthu vinandi visakazikenge, ndipo vikhwaskenge chomene nkhani ya chivikiliro mu vyaru vya ku Europe nanga pangaŵa pa charu chose.”

Kasi nkhani zanthena izi zikukhwaskana na ivyo Baibolo likayowoyerathu?

• Yesu Khristu wakayowoyerathu vya nyengo iyo “mtundu uzamuwukirana na mtundu unyake, ufumu na ufumu unyake.” (Mateyu 24:7) Ŵazgani nkhani yakuti “Kasi Chimanyikwiro cha ‘Mazuŵa Ghaumaliro’ Panji Kuti ‘Nyengo Zaumaliro’ Ntchivichi?” kuti muwone umo Baibolo likulongolera kuti nkhondo izo zikuchitika mazuŵa ghano zikufiska uchimi uwo Yesu wakayowoya.

• Pakuyowoya vya nkhondo buku la mu Baibolo la Chivumbuzi likuzunura vya wakukwera pa hachi uyo wakakwera hachi ilo “likaŵa liswesi” ndipo wakuwuskapo “mtende pa charu chapasi.” (Chivumbuzi 6:4) Ŵazgani nkhani yakuti “Kasi Ŵanalume Ŵanayi Awo Ŵakwera pa Mahachi Mbanjani?” kuti muwone umo uchimi uwu ukukolerana na nkhondo izo zikuchitika mazuŵa ghano.

• Buku la Daniyeli likayowoyerathu vya kulimbana kwa pakati pa “themba lakumpoto” na “themba lakumwera.” (Daniyeli 11:25-45) Wonelerani vidiyo yakuti Uchimi Wafiskika—Daniyeli Chaputara 11 kuti mumanye chifukwa icho charu cha Russia pamoza na vyaru ivyo chikukolerana navyo vikumanyikwira kuti ni themba lakumpoto.a

• Buku la Chivumbuzi likuyowoyaso vya “nkhondo ya zuŵa likuru la Chiuta Wankhongonozose.” (Chivumbuzi 16:14, 16) Ndipouli, iyi ni nkhondo ya pakati pa vyaru nga ni iyo tikuwona pasono yayi. Ŵazgani nkhani yakuti “Kasi Nkhondo ya Aramagedoni Ni Vichi?” kuti mumanye vinandi vyakukhwaskana na nkhondo iyo yichitikenge panthazi apa.

Chifukwa wuli mungagomezga kuti kunthazi vinthu vizamuŵa makora?

• Baibolo likuti Chiuta wazamumazga “nkhondo pa charu chose chapasi.” (Salimo 46:9) Ŵazgani nkhani yakuti “Chigomezgo Chakuti Kunthazi Vinthu Vizamusintha” kuti mumanye vinandi vyakukhwaskana na ivyo Chiuta watilayizga munthazi.

• Yesu wakasambizga ŵalondezgi ŵake kuti ŵalombenge kuti Ufumu wa Chiuta wize. (Mateyu 6:9, 10) Ufumu uwu ni boma lakuchanya ilo lizamufiska khumbo la Chiuta pano pasi, ndipo khumbo la Chiuta ili likusazgapo kwiziska mtende pa charu chose. Kuti mumanye vinandi pa nkhani ya umo Ufumu wa Chiuta ungamovwilirani, wonelerani vidiyo yakuti Kasi Ufumu wa Chiuta Ni Vichi?

Ku Ukraine kuli Ŵakaboni ŵa Yehova ŵakujumpha 129,000. Nga umo viliri na Ŵakaboni ŵa mu vyaru vinyake, nawo ŵakuyezga Yesu ndipo ŵakunjilirapo yayi pa vya ndyali nanga kungaŵa kutoramo chigaŵa mu nkhondo. (Yohane 18:36) Ŵakaboni ŵa Yehova pa charu chose ŵakulutira kupharazga “makani ghawemi . . . gha Ufumu” ghakuti Ufumu uwu pera ndiwo uzamumazga masuzgo ghose pa charu kusazgapo na nkhondo. (Mateyu 24:14) Tikumupemphani kuti mufumbe Ŵakaboni ŵa Yehova kuti mumanye vinandi vyakukhwaskana na uthenga wa mu Baibolo uwo ukupa chigomezgo.