MUŴENGE MASO!

Chisopa na Nkhondo ku Ukraine—Kasi Baibolo Likutipo Wuli?

Wonani malipoti ghanyake ghakuyowoya umo ŵalaraŵalara ŵa visopa ŵanjizgikiramo pa nkhondo iyo yikuchitika ku Ukraine:

“Mulongozgi mulara wa Tchalitchi la Orthodox ku Russia, Kirill, wandayowoyepo chilichose pa ivyo boma la Russia lachita. . . . Ndipouli, ivyo Tchalitchi lake likusambizga pakuyowoya vya charu cha Ukraine ndivyo Putin [wakubisamirako] pa nkhani ya nkhondo iyo wambiska.”—EUobserver, March 7, 2022.
“Patriarch Kirill . . . wakayowoya chenjezgo lankhongono chomene, ndipouli wakuŵikira kumasinda charu chake pa ivyo chili kuchita pakuwukira charu cha Ukraine. Iyo wakuti kuwukira uku ntchigaŵa cha kulimbana na kwananga.”—AP News, March 8, 2022.
“Pa Mande, mulongozgi wa Tchalitchi la Orthodox ku Ukraine, Metropolitan Epiphanius I ku Kyiv, wakalombera ŵanthu ŵake kuti ‘ŵakarwe na ŵasilikari ŵa Russia’ . . . [Iyo] wakayowoyaso kuti kukoma ŵasilikari ŵa ku Russia nkhwananga yayi.”—Jerusalem Post, March 16, 2022.
“Ise ŵa wupu wa [Ukrainian Council of Churches and Religious Organizations (UCCRO)] tikukhozgera ŵasilikari ŵa charu cha Ukraine na wose awo ŵakuŵawovwira, tikuŵalombera pa ivyo ŵakuchita kuvikilira charu cha Ukraine ku ŵalwani.”—UCCROa Statement, February 24, 2022.

Kasi mukuwona wuli? Kasi ŵalongozgi ŵa chisopa awo ŵakuti ŵakulondezga Yesu Khristu, ŵakwenera kuchiska ŵanthu ŵawo kuti ŵalutenge ku nkhondo? Kasi Baibolo likuti wuli?

Mbiri ya chisopa mu nkhondo

Mbiri yikulongora kuti kanandi waka chisopa chalekelera, kujigowokera, panji kuchochozera nkhondo uku chikupusikizgira kuti chikuchitapo kanthu kuti paŵe mtende. Kwa vyaka vinandi, Ŵakaboni ŵa Yehova ŵavumbura upusikizgi wanthena uwu wa visopa. Wonani viyelezgero vinyake ivyo vili mu mabuku ghithu.

Nkhani yakuti, “The Crusades—A ‘Tragic Illusion’” yikuyowoya umo Tchalitchi la Katolika likapangiskira kuti ŵanthu ŵanandi ŵakomeke mu zina la Chiuta kweniso Khristu.
Nkhani yakuti, “Tchalitchi cha Katolika mu Afirika” yikulongosora viyelezgero vya umo chisopa chatondekera kumazga nkhondo za wene na wene, kweniso kukomana kwa ŵanthu ŵanandi.
Nkhani zakuti, “Kodi Zipembedzo N’zimene Zikusokoneza Mtendere?,” “Mbali ya Chipembedzo m’Nkhondo za Anthu,” na “Chipembedzo Chichirikiza Mbali Ina” zikulongosora umo ŵalongozgi ŵa matchalitchi gha Katolika, Orthodox, na Chiprotesitanti ŵakhozgera nkhondo zakupambanapambana.

Kasi visopa vya Chikhristu vikwenera kukhozgera nkhondo?

Ivyo Yesu wakasambizga: “Utemwenge mzengezgani wako nga umo ukujitemwera wamwene.” (Mateyu 22:39) “Lutilirani kutemwa ŵalwani ŵinu.”—Mateyu 5:44-47.

Ghanaghanirani fundo iyi: Kasi ntchakupulikikwa kuti chisopa icho chikuti chikupulikira dango la Yesu la chitemwa, mbwenu chekha chichiskenge ŵalondezgi ŵake kuti ŵakakome ŵanyawo ku nkhondo? Kuti musange zgoro, wonani nkhani yakuti, “Akristu Oona ndi Nkhondo” na “Kodi N’zotheka Kukonda Adani Athu?”

Ivyo Yesu wakasambizga: “Ufumu wane ngwa charu chino chara. Ufumu wane uŵenge wa charu chino mphanyi ŵateŵeti ŵane ŵarwa nkhondo kuti nileke kupelekeka.” (Yohane 18:36) “Wose awo ŵakukora lupanga ŵafwenge na lupanga.”—Mateyu 26:47-52.

Ghanaghanirani fundo iyi: Usange Ŵakhristu ŵakazomerezgekanga yayi kurwa nkhondo nanga pangaŵa apo ŵakeneranga kuvikilira Yesu, kasi pangaŵaso chifukwa chinyake nthena chakupulikikwa cha kulutira ku nkhondo? Wonani nkhani yakuti, “Kodi Akhristu Ayenera Kumenya Nawo Nkhondo?” kuti muwone umo Ŵakhristu ŵakwambilira ŵakalondezgera mwakugomezgeka chiyelezgero cha Yesu kweniso ivyo wakasambizganga.

Kasi ntchivichi chichitikirenge visopa ivyo vikukhozgera nkhondo?

Baibolo likusambizga kuti Chiuta wakukana visopa vyose ivyo vikuti vikulondezga Yesu kweni vikuchita yayi ivyo wakasambizganga.—Mateyu 7:21-23; Tito 1:16.

Buku la Chivumbuzi likulongora kuti visopa ivi Chiuta wakuviwona kuti ndivyo vyathiska ndopa “za wose awo ŵakomeka pa charu chapasi.” (Chivumbuzi 18:21, 24) Kuti mumanye chifukwa chake, wonani nkhani yakuti, “Kasi Babuloni Mukuru Ni Vichi?”
Yesu wakati visopa vyose ivyo Chiuta wavikana vizamuparanyika chifukwa cha milimo yiheni iyo vikuchita, nga umo khuni liheni ilo likupambika vipambi viheni “likudumulikira pasi na kuponyeka pa moto.” (Mateyu 7:15-20) Wonani nkhani yakuti, “Umaliro wa Cisopo Cautesi Uli Pafupi!” kuti mumanye umo ivi vizamuchitikira.

Ŵakaboni ŵa Yehova Ŵakupambana na Visopa Vinyake

Ku Russia na ku Ukraine, kweniso pa charu chose, Ŵakaboni ŵa Yehova ŵakupulikira ivyo Yesu wakasambizga kuti ŵaleke kunjilirapo pa vya charu kweniso pa nkhondo. Pa chifukwa ichi, pa nkhondo iyi tindanjilirepo panji kukhozgera chigaŵa chilichose. Chifukwa chakuti tikuŵikapo mtima kulondezga fundo izo tili kusambira mu Baibolo, Ŵakaboni ŵanyake ŵakutambuzgika. (Yohane 15:19, 20; 2 Timote 3:12) Mwachiyelezgero, boma la Russia lajalira Ŵakaboni ŵanandi mu jele ndipo ŵanyake laŵatambuzga chomene. Malo ghithu ghakusoperapo ghali kupokeka. Kuti mumanye vinandi, wonani pa www.jw-russia.org.

Wonelerani vidiyo ya maminiti ghanayi ya mutu wakuti, Ŵakaboni ŵa Yehova ku Irkutsk Ŵakulutilira Kugomezgeka Nangauli Ŵamazaza Ŵakasecha Nyumba Zawo na Kuŵatimba Mwankhaza Chomene kuti muwone umo Ŵakaboni ŵa Yehova ŵakuyuzgikira ku Russia chifukwa cha chipulikano chawo.
Kwamba kale chomene, Ŵakaboni ŵa Yehova ŵakunjilirapo yayi pa vya charu. Wonelerani vidiyo ya mutu wakuti, Kugomezgeka mu Nyengo ya Nthambuzgo kuti muwone umo ŵakalekera kunjilirapo pa vya charu nangauli ŵakatambuzgika chomene na chipani cha Nazi ku Germany kweniso muwuso wa Soviet Union.

Njirani pa webusayiti yithu kuti mumanye vinandi vya ivyo tikugomezga, kusazgapo na layizgo la mu Baibolo lakuti kunthazi kuzamuŵavya nkhondo. (Yesaya 2:4; Yeremiya 29:11) Fumbani yumoza wa Ŵakaboni ŵa Yehova kuti mumanye vinandi.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Mu wupu wa UCCRO, panji kuti Ukrainian Council of Churches and Religious Organizations, muli matchalitchi 15 nga ni Orthodox, Katolika, Chiprotesitanti na matchalitchi gha Evangelical kweniso Chiyuda na Chisilamu.