Nkhondo ku Ukraine Yikunjira mu Chaka Chachiŵiri—Kasi Baibolo Likupeleka Chigomezgo Wuli?

Pa Chinkhondi, February 24, 2023, nkhondo iyo yikuchitika ku Ukraine yizamuŵa kuti yakwaniska chaka chimoza kufuma apo yikambira. Kuyana na malipoti ghanyake, ŵasilikari ŵa ku Ukraine na Russia pafupifupi 300,000 ŵali kukomeka panji kupwetekeka ndipo ŵanthu ŵanyake ŵakukwana 30,000 ŵali kufwa pa nkhondo iyi. Ndipouli, chiŵelengero cheneko chikwenera kuŵa chakukwera chomene.

Chachitima ntchakuti vikulongora yayi usange nkhondo iyi yimarenge mwasonosono.

•  “Sono chaka chakwana kufuma apo ŵasilikari ŵa ku Russia ŵakanjilira mu charu cha Ukraine, kweni palije icho chikulongora kuti nkhondo iyi yimarenge mwasonosono. Palije chigaŵa icho chikulongora kuti chiwinenge nkhondo iyi, kweniso ntchakukayikiska usange vigaŵa vyose viŵiri vingadumbiskana na kukolerana kuti nkhondo iyi yimare.”—NPR (National Public Radio), February 19, 2023.

Ŵanthu ŵanandi mbakupwetekeka mu mtima kuwona umo ŵanthu ŵambura mulandu ŵakusuzgikira na nkhondo iyi, kweniso nkhondo zinyake izo zikuchitika pa charu chose chapasi. Kasi Baibolo likupeleka chigomezgo wuli? Kasi yizamuŵapo nyengo apo nkhondo yizamumalira?

Nkhondo iyo yizamumazga nkhondo zose

Baibolo likuyowoya vya nkhondo iyo yizamuponoska ŵanthu m’malo mwa kuŵaparanya. Nkhondo iyi yikumanyikwa kuti Aramagedoni, ndipo yikulongosoreka kuti ni “nkhondo ya zuŵa likuru la Chiuta Wankhongonozose.” (Chivumbuzi 16:14, 16) Pa nkhondo iyi, Chiuta wazamumazga maboma ghose gha ŵanthu, chifukwa ghapangiska kuti pa charu paŵe nkhondo zinandi chomene. Kuti mumanye umo Aramagedoni yizamwiziskira mtende wenecho, ŵazgani nkhani zakulondezgapo izi:

•  “Kasi Nkhondo ya Aramagedoni Ni Vichi?”

•  “Aramagedoni Ni Nkhani Yakukondweska!”