Kasi Musankhenge Njani Kuŵa Mulongozgi?—Kasi Baibolo Likutipo Wuli?

Mu masabata ghakwiza agha, mu vyaru vinandi ŵanthu ŵavotenge kuti ŵasankhe mulongozgi. Ŵanthu ŵakuŵikapo mtima kuti ŵazakasankhe mwamahara mulongozgi wawo.

Kasi Baibolo likutipo wuli?

Ŵalongozgi ŵa ŵanthu ŵali na mphaka

Baibolo likuyowoya chifukwa icho ŵalongozgi wose ŵa ŵanthu ŵaliri ŵakutondeka.

• Ungathembanga ŵakaronga yayi panji mwana wa munthu, mweneuyo wangaponoska yayi. Mzimu wake ukufumamo, wakuwelera ku fuvu. Pa zuŵa leneliro maghanoghano ghake ghakumara.”—Salimo 146:3, 4.

Nanga mbalongozgi awo ŵakuwoneka kuti ŵangachita makora, nawo ŵakufwa. Nakuti ŵangamanyirathu yayi kuti munthu uyo wazamunjira m’malo mwawo, wazamulutizga kuchita vinthu viwemi ivyo iwo ŵakachitanga.—Mupharazgi 2:18, 19.

Fundo njakuti, Baibolo likuvumbura kuti ŵanthu ŵakalengeka mu nthowa yakuti ŵajilongozgenge ŵekha yayi.

•  “Munthu uyo wakwenda wangalongozga yayi mendero ghake.”—Yeremiya 10:23.

Kasi walipo uyo wangalongozga makora ŵanthu mazuŵa ghano?

Mulongozgi wakuzomerezgeka na Chiuta

Baibolo likuti Chiuta wali kusankha mulongozgi muwemi chomene na wakugomezgeka: Yesu Khristu. (Salimo 2:6) Yesu ndiyo ni Fumu ya Ufumu wa Chiuta, boma ilo likuwusa kufuma kuchanya.—Mateyu 6:10.

Kasi muzomerenge kuti Yesu ndiyo wamulongozganinge? Baibolo likuyowoya uwemi uwo ukuŵapo para mwasankha nthena:

•  “Chindikani mwana [Yesu Khristu], para mwaleka, Chiuta wakalipenge ndipo muparanyikenge kufumamo mu nthowa, pakuti ukali wake ukugolera luŵiro. Mbakukondwa awo ŵakubisama mwa Iyo.”—Salimo 2:12.

Sono ndiyo ni nyengo yakuti musankhe chakuchita. Uchimi wa mu Baibolo ukulongora kuti Yesu wakamba kuwusa mu chaka cha 1914 kweniso kuti sonosono apa Ufumu wa Chiuta uzamunjira m’malo mwa maboma ghose gha ŵanthu.—Daniyeli 2:44.

Kuti mumanye vinandi vyakukhwaskana na umo mungakhozgera muwuso wa Yesu, ŵazgani nkhani yakuti, “Sankhani Kuŵa ku Chigaŵa cha Ufumu wa Chiuta!”