Yesu Wazamumazga Uchigeŵenga

Yesu wakumanya umo vikuŵira para munthu wakusuzgika chifukwa cha uchigeŵenga kweniso vinthu vyambura urunji. Iyo ŵakamupusikizgiranga vinthu vinandi, wakatimbikanga kwambura chifukwa, kweruzgika mwambura urunji, kumupa mulandu kwambura chifukwa, kweniso paumaliro kukomeka mwankhaza. Nangauli wakaŵavya mulandu uliwose, kweni wakajipata “kupeleka umoyo wake kuŵa chiwombolero cha ŵanandi.” (Mateyu 20:28; Yohane 15:13) Sono pakuŵa Themba la Ufumu wa Chiuta, Yesu wakhazikiskenge urunji pa charu chose chapasi na kumazgirathu uchigeŵenga.—Yesaya 42:3.

Umo vinthu vizamuŵira pa charu chapasi para Yesu wachitapo kanthu:

• Baibolo likuti: “Kwakhala kanyengo kachoko waka, ŵaheni ŵazamuŵakoso chara. Muzamupenja apo ŵakakhalanga, ndipo ŵazamuŵapo yayi. Kweni ŵakuzika ŵazamuhara charu chapasi, Ŵazamukondwa chomene na mtende ukuru.”—Salimo 37:10, 11.

Kasi tingalongora wuli kuti tikuwonga vyose ivyo Yesu wali kutichitira kweniso ivyo watichitirenge munthazi? Nthowa yimoza nkhusambira za “makani ghawemi gha Ufumu wa Chiuta” agho iyo wakapharazganga. (Luka 4:43) Ŵazgani nkhani yakuti “Kasi Ufumu wa Chiuta Ni Vichi?”