Charu cha Israel na Vyaru Vyakupakana na Charu Ichi Vili pa Nkhondo—Kasi Baibolo Likuti Wuli?

Ŵanthu pa charu chose mbakwenjerwa ndipo ŵakumanya yayi kuti vimalenge wuli pa nkhondo yapakati pa United States, Israel, na Iran. Kasi nkhondo iyi yikulenge na kuthandazgikira mu vyaru vinyake? Kasi maboma ghangawovwira kuti nkhondo zimare kweniso kuti pa charu paŵe mtende?

Awo ŵakuwumanya makora uchimi wa mu Baibolo ŵangajifumba usange nkhondo iyi ndiyo yambiskenge nkhondo ya Aramagedoni iyo yikuzunulika mu buku la mu Baibolo la Chivumbuzi.

Kasi Baibolo likuti wuli?

Kasi maboma ghangamazga nkhondo izi?

Baibolo likuti: “Ungathembanga ŵakaronga yayi panji mwana wa munthu, mweneuyo wangaponoska yayi.”—Salimo 146:3.

Pasono tikumanya makora yayi usange maboma ghafiskenge kukhazikiska mtende ku malo agha. Ndipouli, Baibolo likulongosora makora kuti palije mulongozgi wa ndyali, boma la ŵanthu, panji gulu linyake lililose ilo lingamazga nkhondo na kwiza na mtende wanadi. Ni Chiuta pera uyo ‘wangalekeska nkhondo pa charu chose chapasi.’—Salimo 46:9.

• Kuti mumanye vinandi, ŵazgani Gongwe la Mulinda la mutu wakuti “Kasi Nkhondo na Viwawa Vingamara?”

Kasi nkhondo ya pakati pa Israel na vyaru vyakupakana na charu ichi, yikufiska uchimi?

Baibolo likuti: “Muzamupulika zinkhondo na malumbiri gha zinkhondo. . . . Pakuti mtundu uzamuwukirana na mtundu unyake, ufumu na ufumu unyake.”—Mateyu 24:6, 7.

Nkhondo iyo yikuchitika ku Israel na vyaru vyakupakana na charu ichi njimoza mwa vimanyikwiro vya “umaliro wa charu” ndipo yikuchitira ukaboni kuti tili mu “mazuŵa ghaumaliro.” (Mateyu 24:3; 2 Timote 3:1) Nkhondo izo zikuchitika mazuŵa ghano zikulongora waka kuti mwasonosono apa Chiuta wachitengepo kanthu kumazga nkhondo izi na masuzgo ghanyake agho ghakutambuzga ŵanthu.

• Kuti mumanye vinandi, ŵazgani nkhani yakuti “Kasi Chimanyikwiro cha ‘Mazuŵa Ghaumaliro’ Panji Kuti ‘Nyengo Zaumaliro’ Ntchivichi?”

Kasi nkhondo ya Aramagedoni yizamwambira ku Israel na vyaru vyakupakana na charu ichi?

Baibolo likuti: “Ghakaŵawunganyira wose pamoza ku malo agho mu Chihebere ghakuchemeka Aramagedoni.”—Chivumbuzi 16:16.

Nkhondo ya Aramagedoni njapakati pa maboma gha ŵanthu yayi kuti yambire ku Israel na vyaru vyakupakana na charu ichi. M’malo mwake ni nkhondo iyo yizamuchitika pa charu chose chapasi. Yizamuŵa nkhondo yapakati pa Chiuta na maboma ghose gha ŵanthu.

• Kuti mumanye vinandi ŵazgani nkhani yakuti “Kasi Nkhondo ya Aramagedoni Ni Vichi?”

Kasi tingachita wuli kuti tileke kwenjerwa chomene mu nyengo zakusuzga izi?

Baibolo likuti: “Lekani kwenjerwa na chinthu chilichose, kweni mu vinthu vyose, mu lurombo na maŵeyelero pamoza na kuwonga, madandawuro ghinu ghamanyikwe kwa Chiuta.”—Ŵafilipi 4:6.

Yehovaa Chiuta wakukhumba kuti tilombenge kwa iyo. Pakuti wakutipwelelera, wakupulika malurombo ghithu ndipo wangatovwira kuti tileke kwenjerwa chomene. (1 Petrosi 5:7) Nthowa yimoza iyo wakuchitira nthena nkhutovwira kupulikiska chifukwa icho zinkhondo zikuchitikira. Kweniso wakutiphalira umo nkhondo zizamumalira, nakuti vyakuŵinya na masuzgo kuzamuŵavya.—Chivumbuzi 21:3, 4

• Kuti mumanye vinandi pa nkhani ya umo Chiuta wakutovwilira, ŵazgani nkhani yakuti “Kasi mu Baibolo Ningasangamo Mazgu Ghakupembuzga?”