Kasi pa Ukwati wa Ŵakaboni ŵa Yehova Pakuchitika Vichi?

Kanandi ukwati wa Ŵakaboni ŵa Yehova ukuŵa upusu waka kweniso wantchindi, ndipo pakuyowoyeka nkhani ya mu Baibolo. Pamanyuma pa nkhani ya ukwati, ŵanyake ŵakunozga ntchezgo, panji chiphikiro, apo nyengo zinyake pakuŵa vyakurya.a Kukwambilira kwa uteŵeti wake, Yesu nayo wakalutapo ku chiphikiro cha nthena ichi mu msumba wa Kana.—Yohane 2:1-11.

• Kasi ntchivichi chikuchitika pa nyengo ya ukwati?

• Kasi maukwati gha Ŵakaboni ŵa Yehova ghakuchitikira nkhu?

• Ni njani wangalutako?

• Kasi waliyose wakwenera kuvwara wuli?

• Kasi pakuŵa kupeleka vyawanangwa?

• Kasi pamuŵa vyakutimbiskana matambulara?

• Kasi ŵakutorana ŵamuŵathilira mpunga?

• Kasi kwamuŵa vyakurya na vyakumwa?

• Kasi kwamuŵa sumu panji kuvina?

• Kasi Ŵakaboni ŵa Yehova ŵakukondwelera zuŵa la ukwati wawo?

Kasi ntchivichi chikuchitika pa nyengo ya ukwati?

Nkhani ya ukwati ndiyo ntchigaŵa chakuzirwa chomene pa ukwati. Nkhani iyi yikuŵa ya maminiti pafupifupi 30 ndipo yikuyowoyeka na yumoza wa ŵa Ŵakaboni ŵa Yehova. Nkhani yikuyowoyeka mwaubwezi kweniso mwakukhozga, ndipo yikulongosora umo Baibolo lingawovwilira ŵakutorana kuŵa na banja lakukhora na lakukondwa.—Ŵaefeso 5:33.

Mu vyaru vinandi, boma likuzomerezga Ŵakaboni ŵa Yehova kukwatiska nthengwa. Para vyaŵa nthena, cha kuumaliro wa nkhani, ŵakutorana ŵakuchita vilapo. Ŵangavwalikanaso mphete. Kufuma apo, uyo wakwatiskanga wakupharazga kuti iwo ni mfumu na muwoli.

Mu vyaru vinyake, malango ghakuti wamazaza wa boma ndiyo wakwatiskenge nthengwa pa ofesi ya boma. Ŵakuchita ivi nyengo yichoko waka pambere nkhani ya ukwati yindayowoyeke. Usange awo ŵakutorana ŵakachita yayi vilapo pamaso pa ŵaboma, ŵangachita vilapo ivi cha kuumaliro wa nkhani ya ukwati. Usange ŵakachita vilapo, ŵangasankha kuviwerezgaso waka, ndipo pakuyowoya vipulikikwenge kuti ŵali kujilapizga kale. Paumaliro wa nkhani pakuŵa lurombo kupempha Chiuta kuti watumbike awo ŵatorana.

Kasi maukwati gha Ŵakaboni ŵa Yehova ghakuchitikira nkhu?

Ŵakaboni ŵanandi ŵakusankha kuti ukwati wawo ukachitikire pa Nyumba ya Ufumu usange yiliko uko ŵakukhala.b Pamanyuma usange ŵakutorana ŵali na chiphikiro, ŵakusankha kukachitira ku malo ghanyake.

Ni njani wangalutako?

Usange ukwati ukuchitikira pa Nyumba ya Ufumu, waliyose wangaluta, kwali ni Kaboni panji yayi. Usange ŵakutorana ŵanozga chiphikiro, ŵakusankha ŵekha awo ŵakukhumba kuti ŵakaŵepo.

Kasi waliyose wakwenera kuvwara wuli?

Nangauli palije malango agho ghali kuŵikika pa nkhani ya umo munthu wangavwalira para wakuluta ku ukwati uwo ukuchitikira pa Nyumba ya Ufumu, kweni Ŵakaboni ŵa Yehova ŵakuyezgayezga kulondezga fundo ya mu Baibolo yakuti ŵavwarenge makora kweniso mwantchindi. Ŵakukondwa chomene para waliyose pa ukwati wakulondezga fundo iyi. (1 Timote 2:9) Fundo iyi yikugwiraso ntchito ku chiphikiro, usange ŵenecho ŵasankha kuŵa nacho.

Kasi pakuŵa kupeleka vyawanangwa?

Baibolo likutichiska kuti tiŵenge na mtima wa kupa. (Salimo 37:21) Ŵakaboni ŵa Yehova ŵakukondwa kupeleka na kupokera vyawanangwa pa ukwati. (Luka 6:38) Kweni Ŵakaboni ŵakuchichizga ŵanthu yayi kupeleka vyawanangwa panji kupharazga mazina gha awo ŵapeleka vyawanangwa. (Mateyu 6:3, 4; 2 Ŵakorinte 9:7; 1 Petrosi 3:8) Malemba ghakukanizga kuchita nthena, kweniso ivi vingakhozga soni ŵanji awo ŵizapo.

Kasi pamuŵa vyakutimbiskana matambulara?

Yayi. Ŵakaboni ŵa Yehova ŵakuchitako yayi vyakutimbiskana matambulara, chifukwa kaluso aka nkhakufuma ku chisopa chautesi.c Ŵakaboni ŵali na nthowa zinyake izo ŵakulongolera kuti ŵakuŵakhumbira viwemi awo ŵatorana waka.

Kasi ŵakutorana ŵamuŵathilira mpunga?

Yayi. Mu vyaru vinyake, ŵanthu ŵakuthilira awo ŵatorana waka mpunga, maluŵa (confetti), panji vinthu vinyake. Ŵakugomezga kuti vinthu ivi vipangiskenge kuti ŵakutorana ŵaŵe na mwaŵi, chimwemwe, kweniso umoyo utali. Kweni Ŵakaboni ŵa Yehova ŵakuchitako yayi vinthu vyakukhwaskana na kugomezga vyamizimu. Ivi vikusazgapo kukhumbirana mwaŵi, ndipo vikususkana na fundo za mu Baibolo.—Yesaya 65:11.

Kasi kwamuŵa vyakurya na vyakumwa?

Pa nyengo ya nkhani ya ukwati ku Nyumba ya Ufumu, pakuŵavya vyakurya panji vyakumwa. Ŵakutorana ŵanyake ŵakusankha kuŵa na chiphikiro pamanyuma pa kukwatiska uko kukuŵa vyakurya panji vyakumwa. (Mupharazgi 9:7) Usange ŵasankha kuti paŵe moŵa, ŵakuwoneseska kuti uleke kuŵa unandi chomene kweniso ŵakupeleka ku ŵekha awo ŵali na vyaka ivyo malango ghakuzomerezga.—Luka 21:34; Ŵaroma 13:1, 13.

Kasi kwamuŵa sumu panji kuvina?

Usange ŵakutorana ŵakukhumba kuŵa na chiphikiro, ŵangasankha kuti paŵe sumu na kuvina. (Mupharazgi 3:4) Ŵakusankha sumu ziwemi izo iwo ŵakutemwa panji izo zingaŵa ziwemi ku ŵabali ŵawo kuyana na mitheto yakwawo. Ku Nyumba ya Ufumu kanandi ŵakwimbangaso sumu izo fundo zake zikufuma mu Malemba.

Kasi Ŵakaboni ŵa Yehova ŵakukondwelera zuŵa la ukwati wawo?

Pakuti fundo za mu Baibolo zikuzomerezga panji kukanizga yayi kukondwelera zuŵa la ukwati, ŵakutorana awo Mbakaboni ŵakusankha ŵekha kukondwelera panji kuleka kukondwelera zuŵa la ukwati wawo. Usange ŵasankha kukondwelera, ŵangachita paŵekha panji na ŵabwezi kweniso ŵabali ŵawo.