Kasi Wupu wa Watch Tower Bible and Tract Society Ni Vichi?
Wupu wa Watch Tower Bible and Tract Society of Pennsylvania ukamba mu 1884 mwakuyana na malango gha Commonwealth of Pennsylvania, U.S.A ndipo chilato chake nkhupanga ndalama yayi. Ŵakaboni ŵa Yehova ŵakugwiliskira ntchito wupu uwu pa ntchito iyo yikuchitika pa charu chose, ya kulemba mabuku ghakulongosora Baibolo na kusindikizga Mabaibolo.
Wupu uwu ngwakukhumbikwa pa nkhani ya “kusopa, kusambizga, na kovwira ŵanthu,” chomenechomene, “pakupharazga na kusambizga uthenga wa Ufumu wa Chiuta uwo Yesu Khristu wakulaŵilira.” Kuti munthu ŵaŵe membara wa wupu uwu, wakuchita kupempheka ndipo vikwendera unandi wa vyawanangwa ivyo wakupeleka yayi. Mamembara na awo ŵakwendeska wupu uwu ŵakovwira Wupu Wakulongozga wa Ŵakaboni ŵa Yehova.
Mawupu Ghanyake
Ŵakaboni ŵa Yehova ŵakugwiliskira ntchito wupu wa Watch Tower Bible and Tract Society of Pennsylvania, na mawupu ghanyake mu vyaru vinandi. Mawupu agha ni “Watch Tower,” panji “Watchtower.”
Mawupu agha ghakovwira pa ntchito izi:
Kulemba na kusindikizga mabuku. Tili kusindikizga Mabaibolo pafupifupi 220 miliyoni na mabuku ghakulongosora Baibolo pafupifupi 40 biliyoni. Tikung’anamura mabuku ghithu mu viyowoyero vyakujumpha 900. Tili na webusayiti ya jw.org ndipo ŵanthu ŵangaŵerenga Baibolo pa webusayiti iyi kwambura kulipira mu viyowoyero vyakujumpha 160. Pa webusayiti iyi ŵangasangaposo mazgoro gha mu Baibolo gha mafumbo ghakupambanapambana nga, “Kasi Ufumu wa Chiuta ni vichi?”
Masambiro. Tili na masukulu ghakupambanapambana uko ŵanthu ŵakusambizgika Baibolo. Mwachiyelezgero, kwamba mu 1943, Ŵakaboni ŵa Yehova ŵakujumpha 9,000 ŵasambira mu Sukulu ya Giliyadi. Ivi vyawovwira pa ntchito ya umishonale kweniso kuti ntchito yithu yendenge makora pa charu chose. Sabata yiliyose, ŵanthu mamiliyoni ghanandi, kusazgapo awo Mbakaboni ŵa Yehova yayi, tikusopera lumoza. Tikusambizgaso ŵanthu kumanya kuŵerenga na kulemba. Tili na buku ilo tikuŵasambizgira ndipo lili mu viyowoyero 120.
Wovwiri. Tikovwirapo para kwachitika masoka. Mu 1994, tikawovwira ŵanthu ku Rwanda, apo kukachitika nkhondo ya pa wenenawene kweniso mu 2010, ku Haiti, apo kukachitika chindindindi.
Mbunenesko kuti mawupu ghakuzomerezgeka agha ghawovwira pa vinthu vinandi, kweni ntchito yithu yikuthemba mawupu agha yayi. Mkhristu waliyose wali na udindo uwo Chiuta wali kumupa wakupharazga na kusambizga makani ghawemi. (Mateyu 24:14; 28:19, 20) Tikugomezga Chiuta kuti ntchito yithu yende makora kweniso iyo ndiyo walutilirenge kukuzga.—1 Ŵakorinte 3:6, 7.