Kasi Ningachita Wuli Kuti Niŵe Kaboni wa Yehova?

Pa Mateyu 28:19, 20, Yesu wakalongosora ivyo munthu wangachita kuti waŵe Kaboni wa Yehova. Lemba ili likuti munthu wakwenera kuyowoya panji kupharazga vya Yehova.

Chakwamba: Mukwenera kusambira Baibolo. Yesu wakatuma ŵasambiri ŵake kuti ‘ŵakazgore ŵanthu kuŵa ŵasambiri’ na kuŵasambizga. (Mateyu 28:19, 20) Lizgu ilo lili kung’anamulika kuti “msambiri,” likung’anamura munthu uyo “wakusambira.” Baibolo lili na fundo zakovwira kuti munthu waŵe wakukondwa, chomenechomene izo Yesu wakasambizga. (2 Timote 3:16, 17) Ŵakaboni ŵa Yehova ŵangamusambizgani Baibolo kwaulere.—Mateyu 10:7, 8; 1 Ŵatesalonika 2:13.

Chachiŵiri: Mukwenera kuchita ivyo mukusambira. Yesu wakati ŵasambiri ŵake ŵakwenera “kusungilira vinthu vyose” ivyo wakaŵasambizga. (Mateyu 28:20) Ichi chikung’anamura kuti munthu wakusambira Baibolo kuti wamanye ivyo likuyowoya, kweniso kuti wasinthe maghanoghano na nkharo yake. (Milimo 10:42; Ŵaefeso 4:22-29; Ŵahebere 10:24, 25) Wose awo ŵakusungilira ivyo Yesu wakayowoya, ŵakusankha ŵekha kumulondezga na kujipeleka kwa Yehova Chiuta.—Mateyu 16:24.

Chachitatu: Mukwenera kubatizika. (Mateyu 28:19) Baibolo likuyaniska ubatizo na kusunga nyifwa. (Yaniskani na Ŵaroma 6:2-4.) Vikuŵa nga kuti munthu wafwa ku milimo yake yakale na kwamba umoyo uphya. Para mukubatizika mukulongora pakweru kuti mwachita vinthu viŵiri vyakwambilira ivyo Yesu wakayowoya, ndipo mukupempha Chiuta kuti wamupani njuŵi yituŵa.—Ŵahebere 9:14; 1 Petrosi 3:21.

Kasi ningamanya wuli kuti nili wakwenelera kubatizika?

Phalirani ŵalara ŵa mpingo. Ŵachezgenge namwe kuti ŵamanye usange mukupulikiska nadi ivyo vikukhumbikwa, mukuchita ivyo mukusambira, ndipo mwasankha mwekha kujipeleka kwa Chiuta.—Milimo 20:28; 1 Petrosi 5:1-3.

Kasi ŵana awo ŵapapi ŵawo Mbakaboni ŵa Yehova nawo ŵakwendera fundo izi?

Enya. Ŵana ŵithu ‘tikuŵasambizga maghanoghano gha Yehova’ nga umo Baibolo likuyowoyera. (Ŵaefeso 6:4) Kweni para ŵakukura, ŵakwenera kusankha ŵekha kusambira, kupulikira, na kulondezga ivyo Baibolo likusambizga pambere ŵandabatizike. (Ŵaroma 12:2) Munthu ni mwanangwa kusankha pa nkhani ya kusopa.—Ŵaroma 14:12; Ŵagalatiya 6:5.