Chifukwa Wuli Ŵakaboni ŵa Yehova Ŵali Kusintha Vinthu Vinyake Ivyo Ŵakagomezganga?

Vinthu vyose ivyo tikugomezga vikufuma mu Baibolo, ntheura tili kusintha vinthu vinyake ivyo tikagomezganga chifukwa chakuti tili kusandaso na kughapulikiska makora Malemba.a

Para tikusintha vinthu tikukolerana na fundo iyo yili pa lemba la Zintharika 4:18, apo pakuti: “Nthowa ya ŵarunji yili nga mbungweru wa matandakucha uwo ukuŵaliraŵalira m’paka muhanya pakati.” Nga umo ungweru wa zuŵa ukovwilira munthu kuti wawone makora, Chiuta nayo wakutovwira pachokopachoko kuti tipulikiske makora fundo zinyake za mu Malemba pa nyengo yakwenelera. (1 Petrosi 1:10-12) Nga umo Baibolo likayowoyerathu, Chiuta wawovwira chomene ŵanthu kuti ŵamanye unenesko mu “nyengo yaumaliro iyi.”​—Daniyeli 12:4.

Lekani kuzizwa panji kutimbanizgika chifukwa cha kusintha kwa ivyo tikugomezga. Ŵateŵeti ŵa Yehova ŵa mu nyengo yakale nawo, pakwamba ŵakapulikiskanga makora yayi vinthu vinyake kweni ŵakati ŵapulikiska makora, ŵakasintha ivyo ŵakagomezganga.

• Pakwamba Mozesi wakawonanga nga kuti wafikapo kuti wangawombora mtundu wa Israyeli, kweni pakajumpha vyaka 40 kuti Yehova wamuzomerezge kuti wawombore ŵanthu ŵake.​—Milimo 7:23-25, 30, 35.

• Ŵapositole ŵakatondeka kupulikiska uchimi wakuyowoya vya nyifwa na kuwuka kwa Mesiya.—Yesaya 53:8-12; Mateyu 16:21-23.

• Ŵakhristu ŵanyake ŵakwambilira ŵakaghanaghananga mwakubudika vya nyengo iyo “zuŵa la Yehova” lizamwizira.​—2 Ŵatesalonika 2:1, 2.

Kweni paumaliro Chiuta wakaŵawovwira kuti ŵapulikiske makora vinthu, nase tili na chigomezgo chose kuti Yehova walutilirenge kutovwira kupulikiska vinthu.​—Yakobe 1:5.