Kasi Baibolo Likusambizga Kuti Para Munthu Wafwa Wakukababikaso ku Malo Ghanyake?
Ivyo Baibolo likuyowoya
Yayi. Nanga ni mazgu ghakuti “kubabikaso kunyake” panji fundo yakukhozgera chisambizgo ichi mulije mu Baibolo. Chigomezgo cha kubabikaso ku malo ghanyake chikujitha pa chisambizgo chakuti mzimu ukufwa yayi.a Ndipouli, Baibolo likusambizga kuti mzimu ni munthu wamusuma ndipo ukufwa. (Genizesi 2:7; Ezekiyeli 18:4) Para munthu wafwa, wakuleka kuŵako.—Genizesi 3:19; Mupharazgi 9:5, 6.
Kasi pali mphambano wuli pakati pa kubabikaso ku malo ghanyake na chiwuka?
Chisambizgo cha mu Baibolo cha chiwuka chikujintha pakuti mzimu wa munthu ulutilire kuŵa wamoyo yayi. Pa chiwuka, ŵanthu awo ŵali kufwa ŵazamuŵaso ŵamoyo na nkhongono za Chiuta. (Mateyu 22:23, 29; Milimo 24:15) Chiwuka chikutipa chigomezgo chiwemi chakuti mu charu chiphya ŵanthu ŵazamufwaso yayi.—2 Petrosi 3:13; Chivumbuzi 21:3, 4.
Utesi pakuyowoya vya kubabikaso ku malo ghanyake kweniso Baibolo
Utesi: Baibolo likuti ntchimi Eliya yikababikaso ku malo ghanyake na kuzgoka Yohane Mubatizi.
Unenesko: Chiuta wakayowoyerathu kuti: “Nkhumutumirani ntchimi Eliya,” ndipo Yesu wakalongora kuti Yohane Mubatizi ndiyo wakafiska uchimi uwu. (Malaki 4:5, 6; Mateyu 11:13, 14) Ndipouli, ivi vikung’anamura kuti Eliya wakakababikaso kunyake na kuzgoka Yohane Mubatizi yayi. Yohane mwenecho wakakana kuti wakaŵa Eliya. (Yohane 1:21) M’malo mwake, Yohane wakachitanga mulimo wa nga Eliya, kupharazga uthenga wa Chiuta kuti ŵanthu ŵang’anamuke mtima. (1 Mathemba 18:36, 37; Mateyu 3:1) Yohane nayo wakalongora kuti wakaŵa ‘na nkhongono nga Eliya.’—Luka 1:13-17.
Utesi: Baibolo para likuyowoya vya “kubabikaso” likung’anamura kuti para munthu wafwa wakukababikaso ku malo ghanyake.
Unenesko: Baibolo likulongora kuti kubabikaso kukuchitika mwauzimu ndipo ivi vikuchitika uku munthu wachali wamoyo. (Yohane 1:12, 13) Munthu wakubabikaso chifukwa cha ivyo wakachitanga kumanyuma yayi, kweni ni thumbiko lakufuma kwa Chiuta, ilo wakupeleka ku awo ŵakulindilira njombe yapadera munthazi.—Yohane 3:3; 1 Petrosi 1:3, 4.
a Chigomezgo chakuti mzimu ukufwa yayi na chakuti munthu wakubabikaso pamanyuma pakuti wafwa chikambira ku Babuloni wa mu nyengo yakale. Pamanyuma, ŵanthu ŵakusanda vinjeru vya ŵanthu ku India ŵakambiska chisambizgo chakuchemeka Karma. Kuyana na buku la Britannica Encyclopedia of World Religions, chisambizgo cha Karma ni “dango ilo likuti ivyo munthu wakuchita pasono, vili na vyakufumapo vyake mu umoyo wake unyake.”—Peji 913.