“Nkhaŵa na Mafumbo Ghanandi Chomene Kuluska Mazgoro”

UMO NKHAŴIRA KALE

Nkhababikira ku La Ceiba, Honduras. Kukwithu tiliko ŵana 5, ine ndine waumaliro kweniso niliko nekha mwanalume. Ndine wakumangwa. Tikakhalanga ku malo ghakofya chomene ndipo banja lakwithu likaŵa likavu chomene. Vinthu vikanangikirathu mu banja lithu adada ŵati ŵafwa pangozi ku ntchito, panyengo iyi nkhaŵa na vyaka 4.

Amama ŵakafukafukanga kuti ŵalere ine na ŵadumbu ŵane, kweni nawo vinthu vikaŵasuzganga, ŵakakwaniskanga yayi kuti ŵanigulire vyakuvwara. Mu nyengo ya vula nkhapulikanga mphepo chomene chifukwa nkhaŵavya champhempo.

Apo nkhakuranga, nkhasambira Chiyowoyero cha Mawoko cha ku Honduras (LESHO), ndipo nkhamba kuyowoyeskana na ŵanthu ŵakumangwa. Kweni amama na ŵadumbu ŵane ŵakachimanyanga yayi chiyowoyero ichi, ntheura kuti tipulikane, ŵakagwiliskiranga waka ntchito majesicha. Amama ŵakanitemwanga chomene ndipo ŵakanivikiliranga. Nangauli ŵakachimanyanga makora yayi chiyowoyero cha mawoko, kweni ŵakaniphaliranga kuti ningachitangako yayi nkharo ziheni nga kukhweŵa hona kweniso kumwa moŵa mwakujumphizga. Ntheura nkhukondwa kuti nkhakura mwana muwemi chomene, nindakhweŵepo hona panji kuloŵera.

Apo nkhaŵa mwana, amama ŵakalutanga nane ku Tchalitchi la Katolika, kweni pakaŵavya icho nkhatorangapo chifukwa kukaŵavya munthu wakung’anamulira mu chiyowoyero cha mawoko. Vikanikwenyelezganga chomene, mwakuti apo nkhaŵa na vyaka 10 nkhaleka kuluta ku tchalitchi. Kweni nkhakhumbiskiskanga chomene kuti nimumanye Chiuta.

Mu 1999, apo nkhaŵa na vyaka 23, nkhasangana na mwanakazi munyake wa ku United States uyo wakaŵa wa tchalitchi la evangelical. Wakamba kunisambizga Baibolo kweniso Chiyowoyero cha Mawoko cha ku America (ASL). Nkhakondwa chomene na ivyo nkhasambira mu Baibolo mwakuti nkhasankha kuti nizakaŵe muliska. Ntheura nkhaluta ku Puerto Rico kuti nkhasambire sukulu yakusambizga Baibolo ya ŵanthu ŵakumangwa. Mu 2002 nkhawelera ku La Ceiba, ndipo nkhambiska tchalitchi la ŵanthu ŵakumangwa. Ŵabwezi ŵane ndiwo ŵakanovwiranga kuti tchalitchi ili lende makora, yumoza wa iwo wakaŵa Patricia. Paumaliro ine na Patricia tikatorana.

Ku tchalitchi nkhapharazganga mu Chiyowoyero cha Mawoko cha ku Honduras, nkhalongoranga ŵanthu vithuzi vya nkhani za mu Baibolo, kweniso nkhaŵalongosoleranga nkhani za mu Baibolo kuti ŵapulikiske makora. Nkhenderangaso ŵanthu ŵakumangwa mu matawuni ghapafupi kuti niŵakhozge na kuŵawovwira umo ŵangachitira para ŵasangana na masuzgo. Nkhachitapo umishonale ku United States na Zambia. Kweni kuyowoya unenesko, nkhalimanyanga makora yayi Baibolo. Ine nkhaphaliranga waka ŵanthu ivyo nkhapulika na kuŵalongosolera waka vithuzi mbwenu! Kweni nkhaŵa na mafumbo ghanandi chomene kuluska mazgoro.

Zuŵa linyake, ŵanthu mu tchalitchi lane ŵakamba kuthandazga nkhani zautesi zakukhwaskana na ine. Ŵakatenge nkhuloŵera, kweniso niliso na vibwezi. Nkhakhuŵara chomene ndipo nkhakwiya. Pakati pajumpha kanyengo ine na Patricia tikalileka tchalitchi ili.

UMO BAIBOLO LASINTHIRA UMOYO WANE

Ŵakaboni ŵa Yehova ŵakizanga kanandi waka ku nyumba kwithu kweni ine na Patricia tikaŵachimbizganga. Kweni tikati tafumamo mu tchalitchi lithu, Patricia wakazomera kusambira Baibolo na mbumba yinyake ya Ŵakaboni ŵa Yehova, Thomas na Liccy. Nkhazizwa chomene kuwona kuti ŵanthu aŵa ŵakamanyanga chiyowoyero cha mawoko nangauli iwo ŵakaŵa ŵakumangwa yayi. Paumaliro nane nkhazomera kusambira Baibolo.

Tikasambira myezi yinandiko ndipo tikagwiliskiranga ntchito mavidiyo gha mu Chiyowoyero cha Mawoko cha ku America. Kweni ŵanyithu ŵanyake ŵakati ŵatiphalira kuti Ŵakaboni ŵa Yehova ŵakwendera fundo za ŵanthu, mbwenu tikaleka kusambira Baibolo. Nangauli Thomas wakanipa maukaboni ghakukwana kuti Ŵakaboni ŵa Yehova ŵakwendera fundo za ŵanthu yayi, kweni nkhamugomezga yayi.

Pakati pajumpha myezi yichoko waka, Patricia wakasuzgika chomene maghanoghano, ndipo wakalomba kwa Chiuta kuti watumeso Ŵakaboni ŵa Yehova ku nyumba kwithu. Pakati pajumpha nyengo yichoko waka, neba uyo wakaŵa Kaboni wakiza kunyumba na kuphalira Patricia kuti wangakapempha Liccy kuti waŵasambizgenge Baibolo. Liccy wakalongora kuti ni mubwezi wanadi. Sabata yiliyose wakizanga kuzakakhozga Patricia na kusambira nayo Baibolo. Kweni ine nkhaŵa kuti nichali kuŵakayikira Ŵakaboni ŵa Yehova.

Mu 2012, Ŵakaboni ŵa Yehova ŵakaŵa na upharazgi ŵapadera ndipo ŵakalongoranga ŵanthu ŵakumangwa vidiyo yakuti Kasi Mungatemwa Kumanya Unenesko wa Mu Baibolo? mu Chiyowoyero cha Mawoko cha ku Honduras. Liccy wakatilongora vidiyo iyi. Nkhati nawonera vidiyo iyi, nkhazizwa kuwona kuti ivyo nkhasambizganga ku tchalitchi vyakuti kuli moto wa helo kweniso kuti mzimu ukufwa yayi mulije mu Baibolo.

Sabata yakulondezgapo nkhaluta ku Nyumba ya Ufumu ya Ŵakaboni ŵa Yehova kuti nkhadumbiskane na Thomas. Nkhamuphalira kuti nkhukhumba kusambizga Baibolo ŵanthu ŵakumangwa, kweni panekha, nga njumoza wa Ŵakaboni ŵa Yehova cha. Nkhakhumbanga kuti nambiske tchalitchi lane la ŵanthu ŵakumangwa. Thomas wakaniwonga chifukwa cha maghanoghano ghawemi, kweni wakanilongora lemba la Ŵaefeso 4:5, ilo likulongosora uwemi wa kukolerana mu Mpingo waunenesko Wachikhristu.

Thomas wakanipaso vidiyo yakuti Jehovah’s Witnesses—Faith in Action, Part 1: Out of Darkness mu Chiyowoyero cha Mawoko cha ku America. Vidiyo iyi yikulongosora umo ŵanthu ŵachoko waka ŵakasandira Baibolo kuti ŵapulikiske fundo za kuzirwa. Apo nkhawoneleranga vidiyo iyi, nkhajipulika nga umo ŵanalume aŵa ŵakajipulikiranga. Nane nkhapenjanga unenesko nga umo ŵakachitiranga iwo. Vidiyo iyi yikanikhorweska kuti Ŵakaboni ŵa Yehova ŵakusambizga nadi unenesko chifukwa ŵakugomezga fundo za mu Baibolo. Ntheura nkhambiraso kusambira Baibolo. Mu 2014, ine na Patricia tikabatizika na kuŵa Ŵakaboni ŵa Yehova.

VITUMBIKO IVYO NASANGA

Nkhutemwa chomene mpingo wa Ŵakaboni ŵa Yehova chifukwa chakuti ngutuŵa nga umo waliri Chiuta. Ŵanthu ŵake nawo mbatuŵa mu kayowoyero kweniso umo ŵakuchitira vinthu na ŵanyawo. Ŵakutemwa mtende ndipo ŵakukhozgana chomene. Ŵakaboni ŵa Yehova mbakukolerana ndipo wose ŵakusambizga vyakuyana waka nanga ŵangapambana vyaru panji viyowoyero.

Nkhukondwa chomene kuti nili kumanya ivyo Baibolo likusambizga. Mwachiyelezgero, nkhasambira kuti Yehova ni Chiuta Wankhongonozose, Fumu ya chilengiwa chose. Wakutemwa ŵanthu wose, ŵakumangwa na ŵakupulika wuwo. Nkhuwonga chomene Yehova chifukwa cha kunilongora chitemwa. Nasambira kuti charu chizamuŵaso paradiso, ndipo taŵanthu tizamukhala mwakukondwa kweniso muyirayira pa charu chapasi. Nkhulindilira mwakunweka kuzakawona vinthu ivi vikuchitika!

Ine na Patricia tikutemwa chomene kuphalirako ŵanthu ŵakumangwa uthenga wa mu Baibolo. Pasono tikusambira Baibolo na ŵanyake awo ŵali mu tchalitchi ilo tikasopanga kale. Kweni pasono nkhumanya ivyo nkhusambizga, vyapambana na umo vikaŵira kale. Nati namba kusambira Baibolo na Ŵakaboni ŵa Yehova, ndipo nkhasanga mazgoro gha mafumbo agho nkhaŵa nagho.