Kasi Mukukhozgera Muwuso wa Yehova?

“Nenani mwa ŵamitundu kuti, ‘Yehova ndiye wakuwusa!’”—SALMO 96:10.

1, 2. (a) Kasi nchakucitika wuli cakuzirwa ico cikacitika mu Okutobala 29 C.E.? (b) Kasi cakucitika ici cikakhwaska wuli umoyo wa Yesu?

MU OKUTOBALA 29 C.E., pakacitika cinthu cakuzirwa comene ico cindacitikepo pa caru capasi. Mateyu wakati: ‘Ndipo Yesu wakati wabapatizika, ndipera ngawakuzuwuka mu maji: ndipo wonani, kucanya kukamujulikira, ndipo [Yohane Mbapatizi] wakawona mzimu wa Ciuta ukikhanga nga ndi njiŵa, ndipo ukiza pa [Yesu]; ndipo henani, lizgu likafuma kucanya, likati, Uyo ndi Mwana wane wakutemweka, Mweneuyo nkhuca nayo.’ Iyi njimoza mwa nkhani izo zikalembeka na awo ŵakalemba mabuku ghakwambilira ghanayi gha Malemba gha Cigiriki.—Mateyu 3:16, 17; Marko 1:9-11; Luka 3:21, 22; Yohane 1:32-34.

² Wati waphakazgika na mzimu utuŵa, Yesu wakaŵa Mesiya, panji Khristu, kung’anamura Wakuphakazgika. (Yohane 1:33) Pa nyengo iyi, “mphapu” yakulayizgika, iyo ni Yesu, yikawoneka. Satana wakeneranga kuzakaluma citende ca mphapu iyi, ndipo mphapu iyi yikeneranga kuzakabwanya mutu wa mulwani mukuru wa Yehova. (Genesis 3:15) Kufuma pa nyengo iyo, Yesu wakamanya makora kuti wakeneranga kufiska cilato ca Yehova. Cilato ici cikukhwaskana na muwuso ndiposo Ufumu wa Yehova.

3. Kasi Yesu wakanozgekera wuli kuti wakhozgere muwuso wa Yehova?

³ Kuti wanozgekere mulimo wake, ‘Yesu wakazura na mzimu utuŵa, wakawerako ku Yordani ndipo wakalongozgekera na mzimu mu mapopa.’ (Luka 4:1; Marko 1:12) Kwa mazuŵa 40 agho wakaŵa mu mapopa, Yesu wakaŵa na nyengo ya kughanaghanira comene nkhani ya muwuso iyo Satana wakambiska. Wakaghanaghaniraso ivyo wakenera kucita mwakuti wakhozgere muwuso wa Yehova. Nkhani ya muwuso yikukhwaska vilengiwa vyose, vyakucanya na vya pano pasi. Antheura tikwenera kuwona umo Yesu wakacitira mwakugomezgeka, ndiposo ivyo tikwenera kucita kuti tikhozgere muwuso wa Yehova.—Job 1:6-12; 2:2-6.

Muwuso wa Yehova Ukasuskika

4. Kasi Satana wakacita vici kuti wasuske muwuso wa Yehova?

⁴ Satana wakawonanga vyose ivyo vikacitikanga. Mwaluŵiro wakawukira “mphapu” ya “mwanakazi” wakuyelezgera wa Ciuta. (Genesis 3:15) Satana wakayezga Yesu katatu. Yesu wakayezgeka kuti wacite vinthu ivyo vingamukondweska m’malo mwa kucita ivyo Ŵawiske ŵakamutuma. Ciyezgo ca citatu cikaŵa ca kususka muwuso wa Yehova. Wakati wamulongora “maufumu ghose gha pano pasi na ucindami wawo,” Satana wakati kwa Yesu: “Vyose vyeneivi nditi ndikupenge, usange uwenge pasi na kundilambira.” Yesu wakamanya kuti Dyabulosi wali na mazaza pa “maufumu ghose gha pano pasi.” Pakuzgora Satana, Yesu wakalongora kuti wali ku cigaŵa ca muwuso wa Yehova. Wakazgora Satana kuti: “Wukapo, Satana: cifukwa kuli kulembeka, Ulambirenge Fumu Ciuta wako, ndipo umuteŵeterenge Iyo yekha.”—Mateyu 4:8-10.

5. Kasi ni mulimo wuli unonono uwo Yesu wakenera kufiska?

⁵ Yesu wakalongora makoraghene kuti cilato cake cikuru cikaŵa ca kukhozgera muwuso wa Yehova. Mwakuyana na ucimi wakuyowoya za kulumika citende kwa “mphapu” ya mwanakazi, Yesu wakamanya makora kuti wakenera kuŵa wakugomezgeka mpaka nyifwa mwakuti walongore kuti Ciuta ndiyo wakwenelera kuwusa. (Mateyu 16:21; 17:12) Yesu wakenera kulongoraso kuti Ufumu wa Ciuta ndiwo ni nthowa iyo Yehova wazamutheleskera Satana, na kwiziska mtende. (Mateyu 6:9, 10) Kasi Yesu wakafiska wuli mulimo unonono uwu?

“Ufumu wa Ciuta Waneng’enera”

6. Kasi Yesu wakalongora wuli kuti Ufumu ni nthowa iyo Ciuta ‘wazamuparanyira milimo ya Satana’?

⁶ Pakwamba pa mulimo wake, “Yesu wakiza ku Galileya, na kupharazga ivangeli la Ciuta, na kuti, Nyengo yafiskika, ndipo Ufumu wa Ciuta waneng’enera.” (Marko 1:14, 15) Na mtima wose wakati: ‘Nkhwenera kupharazga makani ghawemi gha Ufumu wa Ciuta: cifukwa ceneici ndico nkhatumikira.’ (Luka 4:18-21, 43) Yesu wakendendekanga mu caru ca Galileya, “kupharazga na kuwuzga makani ghawemi gha Ufumu wa Ciuta.” (Luka 8:1) Yesu wakacitangaso milimo yankhongono yinandi, nga ni kulyeska mizinda yinandi, kuzikiska cimphepo, kucizga ŵalwari, ndiposo kuwuska ŵakufwa. Kwizira mu milimo yankhongono iyi, Yesu wakalongora kuti Ciuta wangamazga viheni vyose ndiposo masuzgo agho ghalikuŵako cifukwa ca cigaruka ico cikacitika mu Edeni. Uku kuzamuŵa ‘kuparanya milimo ya Satana.’—1 Yohane 3:8.

7. Kasi Yesu wakaphalira ŵalondezgi ŵake kucita vici, ndipo nchivici cikacitika?

⁷ Kuti wafiske makora mulimo wa kupharazga makani ghawemi gha Ufumu, Yesu wakasora ŵalondezgi ŵake ŵakugomezgeka na kuŵasambizga mulimo uwu. Pakwamba, wakacema ŵapositole ŵake 12 ndipo “wakaŵatuma kupharazga Ufumu wa Ciuta.” (Luka 9:1, 2) Pamanyuma pake wakatuma ŵanyake 70 kuti ŵakapharazge uthenga wakuti: “Ufumu wa Ciuta waneng’enera kwa imwe.” (Luka 10:1, 8, 9) Ŵapositole aŵa ŵakati ŵawera, ŵakamuphalira Yesu umo mulimo wa kupharazga Ufumu ukendera makora. Yesu wakaŵaphalira kuti: ‘Nkhawonanga Satana wakusonthomoka kucanya nga ndi leza.’—Luka 10:17, 18.

8. Kasi umoyo wa Yesu ukalongora vici?

⁸ Yesu wakaŵikapo mtima comene pakucita mulimo uwu, ndipo wakapharazganga Ufumu nyengo zose para mwaŵi wasangika. Wakapharazganga mwambura kuleka, kwamba mulenji mpaka namise, ndiposo wakakhumbanga vinandi yayi pa umoyo wake. Yesu wakati: “Ŵakambwe ŵali na micembo, na viyuni vya mudera vili na vivwimbo; kweni Mwana wa Munthu walive pakugoneka mutu wake.” (Luka 9:58; Marko 6:31; Yohane 4:31-34) Nyengo yicoko waka pambere wandafwe, mwacikanga Yesu wakaphalira Pontiyo Pilato kuti: “Ceneici ndico nkhababikira, ndipo ndico nkhizira mu caru, mwakuti ndipanikizge na unenesko.” (Yohane 18:37) Umoyo wa Yesu ukalongora kuti, iyo wakaŵa msambizgi waluso panji wakucita milimo yankhongono pera yayi, nesi kuŵa waka Mponoski wakujipeleka. Kweni wakakhozgera muwuso wa Yehova na kucitira ukaboni wakuti Ciuta wazamufiska khumbo lake kwizira mu Ufumu wake.—Yohane 14:6.

“Kwamara!”

9. Ni mwawuli umo Satana wakalumira citende ca “mphapu” ya mwanakazi wakuyelezgera wa Ciuta?

⁹ Satana Dyabulosi wakakondwa yayi na vyose ivyo Yesu wakacita pakukhozgera Ufumu. Kwizira mu ŵandyali ndiposo visopa, awo ni “mphapu” yake ya pa caru capasi, Satana wakayezga kanandi waka kuti wakome “mphapu” ya mwanakazi wakuyelezgera wa Ciuta. Kufuma apo wakababikira mpaka ku umaliro wa umoyo wake wa pa caru capasi, Satana na ŵalondezgi ŵake ŵakamulondalondanga Yesu. Mu cilimika ca 33 C.E., nyengo yikakwana yakuti Mwana wa munthu wapelekeke mu mawoko gha Mulwani mwakuti walumike citende. (Mateyu 20:18, 19; Luka 18:31-33) Nkhani za mu mabuku ghakwambilira ghanayi gha Malemba gha Cigiriki zikulongora umo Yuda Isikariyote, mulara wa ŵasofi, ŵalembi, Ŵafalisi ndiposo Ŵaroma, ŵakakhuŵilizgikira na Satana kuti Yesu weruzgike na kukomeka nyifwa yakuŵinya comene ya pa khuni lakusuzgikirapo.—Milimo 2:22, 23.

10. Kasi Yesu wakamara kucita vici kwizira mu nyifwa yake ya pa khuni lakusuzgikirapo?

¹⁰ Kasi mukujipulika wuli peneapo mukughanaghanira za nyifwa ya Yesu ya pa khuni lakusuzgikirapo, iyo yikaŵa yakuŵinya comene? Mutepanji mukukumbuka sembe yakuwombora ŵanthu ŵakwananga iyo Yesu wakapeleka na mtima wose. (Mateyu 20:28; Yohane 15:13) Mukwenera kuti mukukhwaskika comene na citemwa cikuru ca Yehova pakupeleka Mwana wake kuŵa sembe. (Yohane 3:16) Mutepanji namwe mukujipulika nga ni umo mulara wa ŵasilikari wa Ŵaroma wakajipulikira, apo wakati: “Nadidi, mweneuyu wakaŵa Mwana wa Ciuta.” (Mateyu 27:54) Mazgu agho wakayowoya msilikari uyu ghakaŵa ghaunenesko nadi. Kweniso kumbukani mazgu ghaumaliro agho Yesu wakayowoya apo wakaŵa pa khuni lakusuzgikirapo. Wakati: “Kwamara!” (Yohane 19:30) Kasi wakamara kucita vici? Yesu wakacita vinthu vinandi comene apo wakaŵa pa caru capasi. Kweni cinthu cikuru ico wakizira cikaŵa kukhozgera muwuso wa Yehova. Kweniso ucimi ukayowoyerathu kuti “mphapu” yizamusuzgika comene na Satana mwakuti yituŵiske zina la Yehova. (Yesaya 53:3-7) Nangauli iyi yikaŵa milimo yinonono comene, kweni Yesu wakafiska yose. Wakamalizga nadi!

11. Kasi Yesu wazamucita vici kuti wazakafiske ucimi uwo ukayowoyeka mu Edeni?

¹¹ Cifukwa cakuti Yesu wakaŵa wakugomezgeka ndiposo wakupulikira, wakawuskika na thupi la wunthu yayi, kweni nga ni “mzimu wakulenga umoyo.” (1 Ŵakorinte 15:45; 1 Petros 3:18) Yehova wakalayizga Mwana wake wakucindikika kuti: “Khalani pa woko lane lamalyero, ndisuke ndiŵike ŵalwani ŵinu ŵaŵenge citambaliro ca malundi ghinu.” (Salmo 110:1) “Ŵalwani” ŵa Yesu ni Satana ndiposo wose awo ni “mphapu” yake. Pakuŵa Mesiya, uyo ni Fumu ya Ufumu wa Yehova, Yesu Khristu wazamuparanya ŵacigaruka wose awo ŵali kucanya na pa caru capasi. (Civumbuzi 12:7-9; 19:11-16; 20:1-3, 10) Pamanyuma pake, ucimi wa pa Genesis 3:15 uzamufiskika. Cinyakeso ico cizamufiskika ni lurombo lwa Yesu ulo wakasambizga ŵalondezgi ŵake, lwakuti: “Ufumu winu wize. Khumbo linu licitike pano pasi, nga nkhucanya.”—Mateyu 6:10; Ŵafilipi 2:8-11.

Uyo Tingamulondezga

12, 13. (a) Kasi ŵanthu ŵakucita wuli na makani ghawemi gha Ufumu lero? (b) Kasi tikwenera kujifumba vici peneapo tikulondezga malwayo gha Yesu?

¹² Nga ni umo Yesu wakacimira, lero makani ghawemi gha Ufumu ghakupharazgika mu vyaru vinandi. (Mateyu 24:14) Cifukwa ca upharazgi uwu, ŵanthu ŵanandi ŵakujipatulira kwa Ciuta. Ŵakukondwa na vitumbiko ivyo Ufumu wa Ciuta uzamwiziska. Ŵakulindilira mwakunweka kuzakaŵa na umoyo wamuyirayira mu paradiso, umo muzamuŵa mtende na civikiliro. Ndipo mwakukondwa ŵakuphalirako ŵanji za cilindizga cawo. (Salmo 37:11; 2 Petros 3:13) Kasi ndimwe yumoza mwa ŵanthu awo ŵakupharazga Ufumu? Usange ni nthena, mukucita makora comene. Ndipouli pali cinthu cinyake ico waliyose wakwenera kughanaghanira.

¹³ Mpositole Petrosi wakalemba kuti: “Khristu nayo wakakomwera imwe, na kumusidirani bambiro, mwakuti mulondezge malwayo ghake.” (1 Petros 2:21) Petrosi apa kuti wakazunura mwamphu wa Yesu pakupharazga, panji luso lwake pakusambizga cara, kweni wakazunura umo wakasuzgikira. Pakuti Petrosi wakaŵako mu nyengo ya Yesu, wakawonanga kukhumbisiska kwake kuti wasuzgike mwakuti wajilambike ku muwuso wa Yehova, na kulongora kuti Satana ni mutesi. Kasi tingalongora wuli kuti tikulondezga malwayo gha Yesu? Tikwenera kujifumba kuti: ‘Kasi nili wakunozgeka kusuzgika mwakuti nikhozgere na kucindika muwuso wa Yehova kufika mphani? Kasi nkharo yane ndiposo uteŵeti wane vikulongora kuti nkhukhozgera comene muwuso wa Yehova?’—Ŵakolose 3:17.

14, 15. (a) Kasi Yesu wakacita wuli na ivyo wakapempheka kuti wacite, ndipo cifukwa wuli wakacita nthena? (b) Kasi ni nkhani wuli iyo tikwenera kukumbukira nyengo zose? (Sazganipo fundo za mu bokosi lakuti, “Ŵani ku Cigaŵa ca Yehova.”)

¹⁴ Zuŵa lililose tikukumana na viyezgo ndiposo tikwenera kusankha vyakuti ticite, kwali ni vikuru panji vicoko. Kasi nchivici cingatovwira kuti ticite makora? Mwaciyelezgero, kasi tikucita wuli para takumana na ciyezgo ico cingatimbanizga ukhaliro withu Wacikhristu? Kasi Yesu wakacita wuli apo Petrosi wakamuphalira kuti wajilengere lusungu? Yesu wakamuzgora kuti: “Luta ku nyuma zane, Satana: . . . cifukwa kuti ukupwelera vya Ciuta cara, kweni vya ŵanthu.” (Mateyu 16:21-23) Kasi tikucita wuli na ivyo vingatimbanizga umoyo withu wauzimu, nga ni para tapika mwaŵi wa nchito ya ndalama zinandi, panji mwaŵi wakuti tisazgireko masambiro ghakukhwaskana na nchito iyo tikugwira? Zuŵa linyake apo ŵanthu awo ŵakawonanga minthondwe iyo Yesu wakacita “ŵakakhumbanga kwiza na kumukoserezga kuti ŵamukore ufumu,” mwaluŵiro wakafumako kwa iwo.—Yohane 6:15.

¹⁵ Cifukwa wuli Yesu wakacitapo kanthu mwaluŵiro pa cakucitika ici ndiposo vinyake? Cifukwa cakuti wakamanyanga kuti pakaŵa cinthu cinyake cakuzirwa comene kuluska kujivikilira panji kujighanaghanira yekha. Wakakhumbanga kucita khumbo la Yehova ndiposo kukhozgera muwuso wake, mwambura kupwelerako masuzgo ghalighose. (Mateyu 26:50-54) Mwantheura, usange tikuleka kughanaghanirapo nkhani ya muwuso wa Yehova, mwakupambana na umo Yesu wakacitira, mbwenu ndikuti tatondeka kucita vinthu mwakwenelera. Cifukwa wuli? Cifukwa nchakuti tingakoleka luŵiro na maucenjezi gha Satana, uyo ni nkhwantha pakupangiska cinthu ciheni kuwoneka ciwemi comene, nga ni umo wakacitira apo wakapusikanga Heva.—2 Ŵakorinte 11:14; 1 Timote 2:14.

16. Kasi cilato cithu cikuru pakovwira ŵanji nchivici?

¹⁶ Para tili mu uteŵeti, tikuyezgayezga kulongora ŵanthu ivyo Baibolo likuyowoya pa ivyo ŵakwenjerwa navyo. Iyi ni nthowa yiwemi comene yakovwilira ŵanthu kuti ŵanweke kusambira Baibolo. Ndipouli, cilato cithu cikuru kuti nchakovwira waka ŵanthu kumanya ivyo Baibolo likuyowoya, panji vitumbiko ivyo Ufumu wa Ciuta uzamwiziska yayi. Kweni tikwenera kuŵawovwira kuti ŵapulikiske nkhani ya muwuso wa Yehova. Kasi iwo ŵanwekenge kuŵa Ŵakhristu ŵaunenesko, na kunyamura khuni lawo lakusuzgikirapo, ndiposo kusuzgika cifukwa ca Ufumu? (Marko 8:34) Kasi ŵaŵenge ŵakunozgeka kuŵa mu gulu la ŵanthu awo ŵakukhozgera muwuso wa Yehova, na kulongora kuti Satana ni mutesi ndiposo musesi? (Zintharika 27:11) Ni mulimo withu kovwira ŵanji kuti ŵakhozgere muwuso wa Yehova.—1 Timote 4:16.

Apo Ciuta Wazamuŵa ‘Vyose ku Vyose’

17, 18. Kasi tikulindilira nyengo wuli usange tili ku cigaŵa ca muwuso wa Yehova?

¹⁷ Peneapo tikuyezgayezga comene kuŵa ku cigaŵa ca muwuso wa Yehova, kwizira mu nkharo yithu kweniso uteŵeti, tikulindilira nyengo peneapo Yesu Khristu ‘wapelekenge Ufumu kwa Ciuta Ŵawiske.’ Kasi pazamuŵa pawuli? Mpositole Paulosi wakalongosora kuti: ‘Para wamalizga ufumu wose na mazaza ghose na nkhongono. Cifukwa kukwenelera Iyo kuwusa, wasuke waŵike ŵalwani ŵake wose kusi ku malundi ghake. Penepapo Mwana nayo wamkulambiskika kwa Mweneuyo wakamulambiskira vyose, mwakuti Ciuta waŵe vyose ku vyose.’—1 Ŵakorinte 15:24, 25, 28.

¹⁸ Tizamusangwa comene pa nyengo iyo Ciuta wazamuŵa ‘vyose ku vyose.’ Pa nyengo iyo, Ufumu uzamuŵa kuti wafiska cilato cake. Wose awo ŵakususka muwuso wa Yehova ŵazamuŵa kuti ŵaparanyika. Pa caru cose pazamuŵa mtende ndiposo vinthu vizamwendanga mwakuyana na khumbo la Ciuta. Mwakuyana na mazgu gha wamasalmo, cilengiwa cose cizamwimba kuti: “Pelekani kwa Yehova ucindami wakwenelera zina lake; . . . Nenani mwa ŵamitundu kuti, “Yehova ndiye wakuwusa!”—Salmo 96:8, 10.

Kasi Mungazgora?

• Kasi Yesu wakakhozgera wuli nkhani ya muwuso wa Ciuta?

• Kasi Yesu wakamara kucita vici kwizira mu uteŵeti wake ndiposo nyifwa yake?

• Tingalongora wuli kuti tikulondezga malwayo gha Yesu pakukhozgera muwuso wa Yehova?

[Bokosi\Cithuzithuzi pa peji 11]

ŴANI KU CIGAŴA CA YEHOVA

Nga ni umo ŵabali ŵa ku Korea ndiposo mu vyaru vinyake ŵakumanyira, para Ŵakhristu ŵakukumana na viyezgo vyakofya, nchiwemi kukumbukira cifukwa ico ŵakuyezgekera.

Yumoza wa Ŵakaboni ŵa Yehova uyo wakakakikapo mu muwuso wakale wa ku Russia, wakati: ‘Ico cikatovwira kuti tizizipizge ni kumanya makora nkhani ya muwuso iyo yikambika mu munda wa Edeni. Tikamanya kuti tikwenera kukhozgera muwuso wa Yehova. Kumanya kuti tikwenera kukhozgera muwuso uwu kukatovwira kuti tiŵe ŵakukhora ndiposo ŵakugomezgeka.’

Yumoza wa Ŵakaboni ŵa Yehova wakalongosora ico cikamovwira iyo ndiposo Ŵakaboni ŵanyake apo ŵakaŵa mu jere. Wakati: “Yehova wakaŵa nase. Nangauli tikakhalanga makora yayi, kweni tikaŵa maso mwauzimu. Tikakhozgananga na kukumbuskana kuti tikenera kukhozgera muwuso wa Yehova.”

[Cithuzithuzi pa peji 8]

Kasi Yesu wakakhozgera wuli muwuso wa Yehova apo wakayezgekanga na Satana?

[Cithuzithuzi pa peji 10]

Kasi Yesu wakamara kucita vici kwizira mu nyifwa yake?