Cifukwa Wuli Baibolo Likuzunura Yayi Mazina gha Ŵanthu Ŵanyake?

Mu buku la Ruth, munthu uyo wakakana kucita mwakuyana na Dango la Mozesi wakucemeka waka kuti “ngana.” (Ruth 4:1-12; NW) Kasi tikwenera kudumura kuti ŵanthu awo Baibolo likuŵazunura yayi mazina, ndikuti ŵakaŵa ŵaheni panji ŵambura kuzirwa?

Yayi. Wonani ciyelezgero cinyake. Apo Yesu wakatuma ŵasambiri ŵake kuti ŵakamunozgere Paska, wakaŵaphalira kuti “lutani mu msumba kwa Ngana” ndipo mukanozgere Paska ku nyumba yake. (Mateyu 26:18) Kasi tikwenera kughanaghana kuti munthu uyo Yesu wakamuzunura kuti “Ngana,” wakaŵa muheni panji wambura kuzirwa mwakuti ŵakeneranga yayi kumuzunura zina? Yayi, cifukwa “Ngana” uyo wakuyowoyeka apa wakwenera kuti wakaŵa msambiri wa Yesu. Kweni pakuti mu nkhani iyi zina lake likakhumbikwanga viŵi yayi, ŵakalireka waka.

Nakuti mu Baibolo muli mazina gha ŵanthu ŵanandi awo ŵakaŵa ŵaheni. Kweniso muli nkhani za ŵanthu ŵanandi ŵakugomezgeka awo mazina ghawo ghakuzunulika yayi. Mwaciyelezgero, zina la mwanakazi wakwamba Eva, ndakumanyikwa comene. Ndipouli, cifukwa ca kujighanaghanira yekha kweniso kuleka kupulikira vikapangiska kuti Adamu wanange. Ndipo tose wali kutiziyamo. (Ŵaroma 5:12) Kweni zina la muwoli wa Nowa likuzunulika yayi mu Baibolo, nangauli tikusambirako vinandi kwa iyo. Mwaciyelezgero, wakaghanaghaniranga ŵanji kweniso kovwirana na mfumu wake pakucita mulimo wakuzirwa. Nangauli wandazunulike, cikung’anamura kuti wakaŵa wambura kuzirwa yayi nesi kuleka kutemweka na Ciuta.

Paliso ŵanthu ŵanji awo mazina ghawo ghandazunulike mu Baibolo, nangauli ŵakacita vinthu vinyake vyakuzirwa comene kuti khumbo la Yehova lifiskike. Kumbukani kasungwana ka ku Israyeli ako kakagwiranga nchito ku nyumba kwa Namani mulara wa ŵankhondo ku Siriya. Mwacikanga kakaphalira muwoli wa Namani za nchimi ya Yehova ya ku Israyeli. Ivi vikapangiska kuti munthondwe ukuru ucitike. (2 Mathemba 5:1-14) Mwana msungwana wa Yefita nayo wakalongora cipulikano. Wakajipeleka kuti wafiske cilapo ca ŵawiske ndipo wakatengwa yayi nesi kubaba ŵana. (Ŵeruzgi 11:30-40) Paliso ŵanthu ŵanyake ŵanandi awo ŵakuzunulika yayi mazina. Ŵanji ni awo ŵakalemba masalimo ghakujumpha 40 kweniso nchimi zakugomezgeka izo zikacita milimo yakuzirwa comene.—1 Mathemba 20:37-43.

Kweniso pali ŵangelo ŵanandi ŵakugomezgeka awo mazina ghawo ghakuzulika yayi. Nangauli ŵalipo mamiliyoni ghanandi, kweni Baibolo likuzunurapo mazina gha ŵangelo ŵaŵiri pera, Gabriyeli na Mikayeli. (Daniel 7:10; Luka 1:19; Yuda 9) Ŵanji wose Baibolo likuŵazunura yayi mazina. Mwaciyelezgero, awiske ŵa Samusoni [Manowa] ŵakafumba mungelo munyake kuti: “Kasi zina lako ndiwe njani, kuti para mazgu ghako ghafiskika tikucitire ulemu?” Mungelo wakazgora kuti: “Ukufumbiraci zina lane.” Mwakujiyuyura, mungelo uyu wakakana kupokera nchindi izo zikeneleranga Ciuta pera.—Ŵeruzgi 13:17, 18.

Baibolo likuyowoya yayi cifukwa ico mazina ghanyake ghakulekera kuzunulika. Kweni tingasambirako kanthu ku ŵanthu ŵakugomezgeka awo ŵakateŵetera Ciuta kweni ŵakaŵavya khumbo lakuti ŵamanyikwe nesi kupika nchindi.